សាលារាជធានីភ្នំពេញ កាលពីយប់មិញនេះ បានឃាត់រថយន្តធុនធំចំនួន ១៨គ្រឿង ដែលសាលារាជធានីភ្នំពេញ អះអាងថា រថយន្តទាំងនោះ ត្រូវបានកែច្នៃខុសលក្ខណៈបច្ចេកទេស និងគ្មានលិខិតអនុញ្ញាតចូលរាជធានីភ្នំពេញ។
នៅលើទំព័រហ្វេសប៊ុករដ្ឋបាលរាជធានីភ្នំពេញ សាលារាជធានីភ្នំពេញ បានរៀបរាប់ថា កាលពីយប់ឈានចូលថ្ងៃទី២៧ ខែវិច្ឆិកានេះ ក្រុមការងារត្រួតពិនិត្យយានយន្តកែច្នៃខុសលក្ខណៈរបស់សាលារាជធានីភ្នំពេញ និងសមត្ថកិច្ចពាក់ព័ន្ធ បានឃាត់រថយន្តដឹកសំពឹងសំពោង រថយន្តតទ្រុង និងរថយន្តគ្មានលិខិតអនុញ្ញាតចេញចូលរាជធានីភ្នំពេញ។
សាលារាជធានីភ្នំពេញបញ្ជាក់ថា រថយន្តចំនួន ១៨គ្រឿង ត្រូវបានរកឃើញល្មើសច្បាប់ ក្នុងនោះរថយន្តចំនួន ២គ្រឿង មានតទ្រុងខុសលក្ខណៈបច្ចេកទេស ដែលសាលារាជធានីតម្រូវឲ្យធ្វើកិច្ចសន្យាកាត់ទ្រុងចេញ។
សូមបញ្ជាក់ថា ក្រសួងសាធារណការ និងដឹកជញ្ជូន បានចុះត្រួតពិនិត្យ និងផាកពិន័យរថយន្តធុនធំជាច្រើន នៅក្នុងរយៈពេលប៉ុន្មានមកនេះ ដែលក្រសួងថា ដោយសារថយន្តទាំងនោះ ត្រូវបានកែច្នៃខុសលក្ខណៈបច្ចេកទេស និងផ្ទុកលើសទម្ងន់។
របាយការណ៍របស់ក្រសួងនេះ បានឲ្យដឹងថា កាលពីខែតុលាកន្លងមកនេះ សមត្ថកិច្ចបានផាកពិន័យរថយន្តផ្ទុកលើសចំណុះចំនួន ៨៩គ្រឿង ដោយប្រមូលបានថវិកាជាង ១៥៥លានរៀល៕