អ្នកមានជម្លោះដីធ្លីជាង១០ឆ្នាំ នៅតំបន់បឹងកក់ ដែលទើបទទួលបានប្លង់កម្មសិទ្ធិ បានជំរុញទៅអាជ្ញាធរពន្លឿនដោះស្រាយដីធ្លីជូនប្រជាសហគមន៍ពួកគេ ដែលសេសសល់ជាង១០គ្រួសារ និងសហគមន៍ដទៃ ទៀត ដោយថា ដើម្បីកុំឲ្យពួកគេប៉ះពាល់ដល់ជីវភាពគ្រួសារ។
តំណាងអ្នកមានជម្លោះដីធ្លីភូមិ១ លោក ចាន់ ពុទ្ធិស័ក្តិ បានប្រាប់VOD បន្ទាប់ពីពួកគេ២២គ្រួសារ ទទួលបានប្លង់កម្មសិទ្ធិ ពីសាលារាជធានីភ្នំពេញ នាថ្ងៃទី២៧ ខែធ្នូនេះថា សាលារាជធានីភ្នំពេញ ត្រូវពន្លឿនដោះស្រាយបញ្ហាដីធ្លីដែលនៅសេសល់នៅភូមិ១ចំនួន៧គ្រួសារ និងភូមិ២២ចំនួន៦គ្រួសារ ស្ថិតក្នុងតំបន់បឹងកក់ និងប្រជាសហគមន៍ដែលមានជំម្លោះដីធ្លីផ្សេងទៀត ជាពិសេសតំបន់បុរីកីឡា ឲ្យបានឆាប់ ដោយថា កុំឲ្យពួកគេ ជួបបញ្ហាប្រឈមជីវភាពគ្រួសារ ខណៈគ្មានជំរករស់នៅសមរម្យ។
លោកថ្លែងថា «បើដោះស្រាយបញ្ចប់ឲ្យពួកគាត់[អ្នកមានជម្លោះដីធ្លីបឹងកក់ និងអ្នកបុរីកីឡា]លឿនទៅ គាត់អាចមានសេរីភាពថ្មី មានជីវិតថ្មីក្នុងការរស់នៅក្នុងការប្រកបរបបចិញ្ចឹមជីវិត កុំឲ្យរងគ្រោះ រំារ៉ៃ ដូចខ្ញុំ រំារ៉ៃរាប់ឆ្នាំចឹង ព្រោះដីធ្លីផ្ទះសំបែងមានសារសំខាន់ណាស់ គឺជាអាយុជីវិតសម្រាប់យើងទំាងអស់គ្នា បើអត់មានដី គឺអត់មានជីវិតទេ ដូចជាមនុស្សអនាថាចឹង»។
អ្នកបឹងកក់ម្នាក់ទៀត អ្នកស្រី គឹម លី ដែលទើបទទួលបានប្លង់កម្មសិទ្ធិនៅថ្ងៃនេះ បានអះអាងថា សាលាក្រុងបានព្រមានពួកគេមិឲ្យចេញមុខតវ៉ានៅទីសាធារណៈនោះទេ ដោយថា បើពួកគេបន្តធ្វើនឹងប្រឈមមុខនឹងច្បាប់។ ករណីនេះ អ្នកស្រីបានបញ្ជាក់ថា បើថ្ងៃណាមួយប្រជាសហគមន៍ដែលមិនទាន់បានប្លង់ ហើយចេញតវ៉ា អ្នកស្រីថា គាត់នៅតែចូលរួមជាមួយប្រជាសហគមន៍ដែលរងគ្រោះ ដោយថា មិនខ្លាចការព្រមានរបស់អាជ្ញាធរនោះទេ។
អ្នកស្រីនិយាយថា «ទុកកង្វល់ដូចតែគ្នាទេ គាត់មានកង្វល់ ខ្ញុំបានធូស្រាល តែគាត់នៅខ្វល់ ចឹងបានថា ខ្ញុំជួយអ្នករងគ្រោះដីធ្លីទំាងអស់គ្នាដែលធ្លាប់ពិបាកវេទនាទំាងអស់គ្នា ត្រូវតែជួយគេវិញ ព្រោះគេធ្លាប់ជួយខ្ញុំ ឲ្យគាត់ទទួលបានលំនៅឋានដូចរូបខ្ញុំចឹង»។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី ហាក់មិនចាប់អារម្មណ៍និងការលើកឡើងរបស់ប្រជាសហគមន៍បឹងកក់ ដែលថាមន្ត្រីសាលារាជធានីភ្នំពេញ ព្រមានមិនឲ្យចូលរួមបាតុកម្ម ឬ តវ៉ាណាមួយ ជាមួយអ្នកមានជម្លោះដីធ្លីដទៃទៀតនោះទេ ដោយថានេះជាសិទ្ធិរបស់ពួកគេ។
ដោយឡែក លោក ភក្តី បានច្រានចោលលើការលើកឡើងរបស់អ្នកបឹងកក់ដែលថានៅសល់១៣គ្រួសារទៀតមិនទាន់ទទួលបានប្លង់ ដោយលោកថា សាលារាជធានីបានដោះស្រាយជូនប្រជាពលរដ្ឋនៅតំបន់បឹងកក់រួចរាល់ហើយ។
លោកអះអាងថា «ខ្ញុំចង់បញ្ជាក់ជាថ្មីថា ពុំមានបងប្អូនរបស់យើងដែលនៅសេសសល់ថា មិនទាន់ដោះស្រាយទទួលយក ឧទាហរណ៍ដូចខ្ញុំជម្រាបថា ប៉ុន្មានប្លង់[២២ប្លង់]គឺបានដោះស្រាយរួចរាល់អស់ហើយ នៅឡើយតែអ្នកខ្លះបានបំពេញនីតិវិធីហើយ ករណីនេះ ហើយអ្នកខ្លះទៀតកំពុងតែនៅក្នុងនីតិវិធី សុរិយោដីនៅពេលដែលគេធ្វើ ក្រោយពេលដែលគាត់បានឯកភាពរួចរាល់ទៅហើយ នៃការទទួលយកការដោះស្រាយទៅតាមករណីរបស់ពួកគាត់»។
ដោយឡែក តំណាងអ្នកបុរីកីឡា អ្នកស្រី ស ស៊ន ប្រាប់វីអូឌីកាលពីម្សិលមិញថា អាជ្ញាធរបានកំណត់ថ្ងៃឱសានវាទជាលើកទី២ ដោយពន្យាពេល២សប្តាហ៍ទៀត គិតពីថ្ងៃទី២៣ធ្នូ ដល់ថ្ងៃទី៥ខែមករា ឆ្នាំ២០១៨ខាងមុខ ដើម្បីទុកពេលឲ្យពួកគេជាង១០គ្រួសារ ចរចា យកសំណងតាមគោលនយោបាយ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត យល់ថា សាលាក្រុងនិងអាជ្ញាធរពាក់ព័ន្ធត្រូវចុះទៅពិនិត្យនិងស្រង់ស្ថិតិអ្នករងគ្រោះដីធ្លីនៅតំបន់បឹងកក់ និងបុរីកីឡាឲ្យបានច្បាស់ ដោយថា កុំឲ្យរបាយការណ៍របស់អាជ្ញាធរនិងការលើកឡើងរបស់ប្រជាពលរដ្ឋមានភាពផ្ទុយគ្នាបែបនេះ។
លោក សុផាត បានបញ្ជាក់ថា បើសាលាក្រុងមិនពន្លឿនធ្វើការដោះស្រាយជូនអ្នកសេសសល់តំបន់បឹងកក់១៣គ្រួសារ និងសហគមន៍បុរីកីឡាឲ្យបានឆាប់ទេ នឹងធ្វើប៉ះពាល់ដល់មុខមាត់រដ្ឋាភិបាល។
លោកយល់ថា «នៅដែលដែលគេរិះគន់អំពីការធ្លាក់ចុះនៃលទ្ធិប្រជាធិបតេយ្យ ការអនុវត្តសិទ្ធិមនុស្សនៅកម្ពុជា គេមិនមែនបំភ្លេចចោលរឿងដីធ្លីទេ គេតែងតែផ្សារភ្ជាប់និងការបណ្តេញចេញ ជម្លោះដីធ្លីដែល មិនបានដោះស្រាយ ដែលរំលោភដីប្រជាពលរដ្ឋ ប្រជាពលរដ្ឋរាប់សែននាក់រងគ្រោះ គេផ្សារភ្ជាប់រហូត មានន័យថា វាពិតជាប៉ះពាល់ដល់មុខមាត់រដ្ឋាភិបាលហើយ»។
កាលពីឆ្នាំ២០១១ រដ្ឋាភិបាល បានចេញអនុក្រឹត្យមួយ ដោយបានកាត់ដីចំនួន ១២.៤៤ ហិចតា ឲ្យប្រជាពលរដ្ឋជាង៧០០គ្រួសារ នៅតំបន់បឹងកក់។ ប៉ុន្តែអ្នកបឹងកក់ថា ជិត៥ឆ្នាំនៅតែមិនទាន់មានដំណោះស្រាយ។
ក្រោយមកនៅក្នុងវេទិកាជាតិលើកទី២ ស្តីពី «ការការពារ និងអភិរក្សធនធានធម្មជាតិ» នាថ្ងៃទី២២សីហា ឆ្នាំ២០១៧ លោកនាយករដ្ឋមន្រ្តី ហ៊ុន សែន បានបញ្ជាផ្ទាល់មាត់ឲ្យអភិបាលរាជធានីភ្នំពេញថ្មី គឺ លោក ឃួង ស្រេង ត្រូវដោះស្រាយបញ្ហាជម្លោះដីធ្លីនៅតំបន់បឹងកក់ឲ្យអស់ ខណៈបច្ចុប្បន្នតំណាងអ្នកមានជម្លោះដីធ្លីនៅតំបន់បឹងកក់ដែលទទួលបានប្លង់នៅថ្ងៃនេះ នៅតែអះអាងថា ប្រជាពលរដ្ឋ១៣គ្រួសារទៀត អាជ្ញាធរមិនទាន់ដោះស្រាយជូនពួកគេនៅឡើយ។ ប៉ុន្តែត្រូវបានអាជ្ញាធរបានច្រានចោលការលើកឡើងនេះ៕
