ក្រសួងដែនសមុទ្រកូរ៉េខាងត្បូង បាននិយាយថា ក្រុមកម្មករជួយសង្គ្រោះ ដែលបានស្រង់សាឡាងលិច Sewol នោះ អាចនឹងរកឃើញសាកសពម្នាក់ ដែលបានបាត់ខ្លួនចាប់តាំងពីឧបទ្ទវហេតុលិចនាវាចម្លងនោះកាលពីឆ្នាំ២០១៤មកម៉្លេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ក្រសួងនេះ បាននិយាយក្នុងសេចក្ដីប្រកាសព័ត៌មានមួយថា ខ្លួននឹងរៀបចំសន្និសីទកាសែតដ៏ខ្លីមួយ ស្ដីពីការរកឃើញគ្រោងឆ្អឹងមនុស្ស ដែលគេសង្ស័យថា ជាជនរងគ្រោះម្នាក់ដែលបានបាត់ខ្លួន។
នាវាចម្លងនោះ ត្រូវបានគេស្រង់ឡើងលើផ្ទៃទឹកកាលពីសប្ដាហ៍មុន ជិត ៣ឆ្នាំក្រោយពីវាលិច និងសម្លាប់មនុស្សជាង ៣០០នាក់ ហើយសាឡាងនោះ ត្រូវបាននាំយកទៅមាត់ច្រាំង។
ជនរងគ្រោះស្ទើរតែទាំងអស់ សុទ្ធតែជាក្មេងសិស្សសាលា ហើយសពចំនួន ៩ មិនត្រូវបានគេរកឃើញនោះឡើយ ដោយនាំឲ្យគេសង្ស័យថា សពទាំង ៩នោះ អាចជាប់នៅក្នុងសាឡងចម្លងនោះ។
ទីភ្នាក់ងារព័ត៌មានយ៉ុនហាប់របស់កូរ៉េខាងត្បូង បានផ្សាយថា សំណល់ឆ្អឹងនោះ ត្រូវបានគេស្រង់ដាក់លើនាវាមួយគ្រឿង ដែលបានស្រង់សាឡាងចម្លងនោះ៕