តំបន់មាត់សមុទ្រនៅភាគឦសានប្រទេសអូស្ត្រាលី បានរងខ្យល់ព្យុះ និងភ្លៀងធ្លាក់ខ្លាំង នៅថ្ងៃនេះ ខណៈដែលព្យុះស៊ីក្លូនដ៏ខ្លាំងមួយ បានបោកបក់ទៅលើតំបន់ទេសចរណ៍ដែលល្បីល្បាញខាងឆ្នេរខ្សាច់ប៉ប្រះទឹក។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដែលផ្សាយថា ព្យុះនេះក៏បានជំរុញឲ្យប្រជាជនប្រហែល ៣ម៉ឺននាក់ ភៀសខ្លួនរកកន្លែងសុវត្ថិភាពផងដែរ។
ព្យុះស៊ីក្លូន Debbie បានបង្កើនឥទ្ធិពលរបស់ខ្លួនកាលពីយប់មិញរហូតដល់កម្រិតបួន ដោយគ្រាន់តែល្បឿនខ្យល់ស្ថិតក្រោមកម្រិតគ្រោះថ្នាក់បំផុតតែប៉ុណ្ណោះ។ អាជ្ញាធរអូស្ត្រាលីបានព្រមានថា ព្យុះនេះអាចបង្កើនដល់កម្រិតប្រាំ នៅពេលវាបោកបក់មកដល់ដីគោក។
ល្បឿនខ្យល់ជាង ២២០គីឡូម៉ែត្រក្នុងមួយម៉ោង បានបោកបក់យ៉ាងខ្លាំងក្លាទៅលើកោះ Whitsunday ជាទីដែលភ្ញៀវទេសចរកំពុងជ្រកកោនក្នុងសណ្ឋាគារនានា។
ក្រុមអាជ្ញាធរ បានប្រមូលស្បៀង និងប្រេងឥន្ធនៈ ចំណែកឯកងទ័ពបានស្ថិតនៅក្នុងលក្ខណៈប្រុងជើងការ សម្រាប់ដោះស្រាយបញ្ហាក្រោយព្យុះនេះ៕