តំណាងរាស្ត្រគណបក្សសង្រ្គោះជាតិម្នាក់ទៀត ចូលឆ្លើយបំភ្លឺក្នុងនាមជាសាក្សីតាមដីកាកោះរបស់តុលាការ ករណីដែលរដ្ឋាភិបាលចោទ លោក ជុន ច័ន្ទបុត្រ ថាបន្លំខ្លួនចូលពន្ធនាគារ។
នៅព្រឹកថ្ងៃសុក្រទី២៨ខែមេសាឆ្នាំ២០១៧នេះ តំណាងរាស្ដ្រគណបក្សប្រឆាំងមួយរូបទៀតគឺលោកស្រី មួរ សុខហួរ បានចូលខ្លួនឆ្លើយបំភ្លឺក្នុងនាមជាសាក្សីនៅសាលាដំបូងរាជធានីភ្នំពេញ ដោយមានលោក សំ សុគង់ ជាមេធាវីប្រឹក្សាដដែល ពាក់ព័ន្ធករណីដែលរដ្ឋាភិបាលចោទថានាយរងវិទ្យុអាស៊ីសេរី លោក ជុន ច័ន្ទបុត្រ បានបន្លំខ្លួនចូលក្នុងពន្ធនាគារព្រៃសរ ជាមួយតំណាងរាស្ដ្របក្សប្រឆាំង ខណៈពួកគេចូលសួរសុខទុក្ខអ្នកជាប់ឃុំក្នុងពន្ធនាគារ។
លោកស្រី មួរ សុខហួរ បានចូលខ្លួនឆ្លើយបំភ្លឺតាមដីកាកោះរបស់តុលាការ បន្ទាប់ពីតំណាងរាស្ដ្របក្សសង្គ្រោះជាតិលោក ឡុង រី ក៏បានចូលឆ្លើយបំភ្លឺរួចហើយក្នុងសំណុំរឿងដូចគ្នានេះ កាលពីថ្ងៃព្រហស្បតិ៍ម្សិលមិញ។
លោកមេធាវី សំ សុគង់ មានប្រសាសន៍ថា លោកស្រី មួរ សុខហួរ គ្រាន់តែអាចបំភ្លឺក្នុងនាមជាសាក្សី ដើម្បីផ្ដល់ការពិតដែលលោកស្រីដឹងដល់តុលាការ។ ប៉ុន្ដែលោកសុំមិនធ្វើអត្ថាធិប្បាយចំពោះខ្លឹមសារនៃការសួរនេះទេ ដោយថា ជាការសម្ងាត់ក្នុងនីតិវិធីស៊ើបអង្កេតរបស់តុលាការ។
តុលាការក្រុងភ្នំពេញ បានចេញដីកាកោះហៅនាយករងវិទ្យុអាស៊ីសេរីផ្នែកភាសាខ្មែរ លោក ជុន ច័ន្ទបុត្រ ឲ្យចូលបំភ្លឺនៅដើមសប្តាហ៍ក្រោយ ជុំវិញការចោទថា បានបន្លំខ្លួនចូលពន្ធនាគារ កាលពេលថ្មីៗនេះ។
នាយករងវិទ្យុអាស៊ីសេរីលោក ជុន ច័ន្ទបុត្រ បានបដិសេធថា លោកមិនបានបន្លំខ្លួនចូលពន្ធនាគារដូចការចោទប្រកាន់ទេ ប៉ុន្ដែគឺលោកគ្រាន់តែចង់ជួបលោក គឹម សុខ ជាអ្នកវិភាគ ដែលត្រូវតុលាការបានឃុំខ្លួន បន្ទាប់ពីរិះគន់ករណីឃាតកម្មបាញ់សម្លាប់លោក កែម ឡី៕