ក្រសួងធនធានទឹក និងឧតុនិយម បានជូនដំណឹងដល់ប្រជាពលរដ្ឋឲ្យមានការប្រុងប្រយ័ត្នខ្ពស់បំផុតអំពីបាតុភូតផ្គរន្ទះ និងខ្យល់កន្ត្រាក់ ចាប់ពីថ្ងៃ២៨មេសាដល់ថ្ងៃ០៦ឧសភាខាងមុខនេះ។
ក្នុងសេចក្តីជូនដំណឹងចុះថ្ងៃទី២៥ខែមេសា ក្រសួងធនធានទឹក និងឧតុនិយម ឲ្យដឹងថា កម្ពុជាអាចមានបាតុភូត ផ្គរន្ទះ ខ្យល់កន្ត្រាក់ ជាពិសេសនៅថ្ងៃទី២៨មេសាដល់ថ្ងៃទី៣០មេសា ដោយអំឡុងពេលនោះ បាតុភូតនេះ អាចនឹងកើតមានឡើងកាន់តែច្រើននៅតំបន់វាលទំនាប និងតំបន់ខ្ពង់រាប។
សេចក្តីជូនដំណឹងដដែលបានឲ្យដឹងទៀតថា បាតុភូតនេះ ក៏ប្តូរទិសដៅ ដោយមានខ្យល់បក់មកពីទិសខាងត្បូង និងទិសនីរតី បង្កឲ្យមានភ្លៀងបន្តធ្លាក់រាយប៉ាយស្ទើរទូទំាងប្រទេស រហូតដល់ថ្ងៃទី០៦ខែឧសភា ឆ្នាំ២០១៧ ខាងមុខនេះផងដែរ។
ក្រសួងធនធានទឹកបានឲ្យដឹងថា មូលហេតុដែលបង្កឲ្យមានបាតុភូតទាំងនេះ គឺបណ្ដាលមកពីកម្ពុជា កំពុងទទួលរងឥទ្ធិពលសំពាធទាប ទើបនាំឲ្យបន្ដគ្រប់បណ្ដប់លើប្រទេសកម្ពុជា។
កាលពីដើមសប្តាហ៍នេះ របាយការណ៍ឲ្យដឹងថា មនុស្សយ៉ាងតិច៤នាក់ស្លាប់និង៣នាក់ទៀតរងរបួស ខណៈផ្ទះប្រជាពលរដ្ឋច្រើនខ្នងទៀតបានរងការបំផ្លិចបំផ្លាញ ក្រោយភ្លៀងខ្យល់ និងផ្គររន្ទះ បានបោកបក់ លើខេត្តមួយចំនួនដូចជា ខេត្តស្វាយរៀង កំពង់ឆ្នាំង កណ្តាល និងបាត់ដំបងជាដើម៕
