ជនសង្ស័យជាប់ពាក់ព័ន្ធនឹងគ្រឿងញៀនដល់ទៅ ៣៦នាក់ ត្រូវបានសមត្ថកិច្ចចាប់ខ្លួនកាលពីថ្ងៃសុក្រកន្លងមកនេះ នៅក្នុងប្រតិបត្តិការបង្ក្រាបគ្រឿងញៀននៅតាមខេត្តចំនួន ៥។ នេះដោយផ្អែកតាមរបាយការណ៍នគរបាលជាតិ។
របាយការណ៍ដដែល ដែលបានផ្សាយលើវេបសាយនគរបាលជាតិ បានបង្ហាញថា បទល្មើសគ្រឿងញៀន ១៧ករណី ត្រូវបានសមត្ថកិច្ចបង្ក្រាបបាននៅរាជធានីភ្នំពេញ ខេត្តព្រះសីហនុ កំពត កំពង់ឆ្នាំង និងសៀមរាប ដោយឃាត់ខ្លួនជនសង្ស័យដល់ទៅ ៣៦នាក់ ត្រឹមតែថ្ងៃទី២៦ ខែឧសភា។
របាយការណ៍នគរបាលជាតិ បានឲ្យដឹងថា ជនសង្ស័យពាក់ព័ន្ធនឹងគ្រឿងញៀនដល់ទៅ ៧៧៣៧នាក់ ត្រូវបានសមត្ថកិច្ចចាប់ខ្លួន ក្នុងយុទ្ធនាការបង្ក្រាបគ្រឿងញៀន ៣៤៣៥ករណី នៅទូទាំងប្រទេស នៅចន្លោះថ្ងៃទី០១ ខែមករា ដល់ថ្ងៃទី១២ ខែឧសភា ឆ្នាំ២០១៧នេះ៕
