ទីភ្នាក់ងារព័ត៌មានរដ្ឋកូរ៉េខាងជើងបានរាយការណ៍នៅថ្ងៃនេះថា មេដឹកនាំកូរ៉េខាងជើង លោក គីម ជុងអ៊ុន បានត្រួតពិនិត្យមើលការសាកល្បងប្រព័ន្ធថ្មីប្រឆាំងនឹងយន្តហោះចម្បាំង និងបានបញ្ជាឲ្យផលិតវាឲ្យបានច្រើន និងដាក់ពង្រាយនៅទូទាំងប្រទេស។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
Reuters ផ្សាយបន្តថា សកម្មភាពនេះធ្វើឡើងតែប៉ុន្មានសប្ដាហ៍ក្រោយពីកូរ៉េខាងជើងបានបាញ់សាកល្បងគ្រាប់មីស៊ីលបាលីស្ទីក ដែលរំលោភទៅនឹងទណ្ឌកម្មរបស់អង្គការសហប្រជាជាតិ។
ទីភ្នាក់ងារព័ត៌មានរដ្ឋ KCNA មិនបានបញ្ជាក់ឲ្យបានជាក់លាក់ពីប្រភេទអាវុធនោះទេ ឬក៏ពេលវេលាជាក់លាក់នៃការសាកល្បងអាវុធនោះដែរ ប៉ុន្តែ បានផ្សាយថា ការសាកល្បងនោះរៀបចំឡើងដោយសាលាវិទ្យាសាស្ត្រការពារជាតិ ជាទីភ្នាក់ងារជាប់ក្នុងបញ្ជីខ្មៅ ដែលត្រូវបានគេជឿថា កំពុងផលិតគ្រាប់មីស៊ីល និងអាវុធនុយក្លេអ៊ែរ។
កូរ៉េខាងជើងបានជំរុញការអភិវឌ្ឍប្រព័ន្ធសព្វាវុធយ៉ាងធំធេង ចាប់តាំងពីដើមឆ្នាំមុន ក្នុងនោះមានទាំងមីស៊ីលចម្ងាយឆ្ងាយ ដែលអាចវាយប្រហារដល់ទឹកដីអាមេរិក ហើយថ្មីៗនេះ បានសាកល្បងគ្រាប់មីស៊ីលអន្តរទ្វីប ដែលបង្ហាញពីការរីកចម្រើនខាងបច្ចេកទេស៕
