រដ្ឋមន្ត្រីសុខាភិបាលថៃបានថ្លែងថារដ្ឋាភិបាលនឹងស៊ើបអង្កេតករណីសង្ស័យថាទារក៣នាក់និងទារកក្នុងផ្ទៃម្នាក់ ឆ្លងវីរុសហ្ស៊ីកា។ នេះដោយយោងតាមការផ្សាយរបស់ Asia Correspondent។
បើតាម Asia Correspondent ប្រសិនបើរកអាជ្ញាធរសុខាភិបាលថៃរកឃើញការឆ្លងវីរុសនេះទៅលើទារកនោះ នោះវានឹងក្លាយជាករណីឆ្លងលើកដំបូងដែលកើតឡើងនៅតំបន់អាស៊ីអាគ្នេយ៍។
Asia Correspondent បានដកស្រង់សម្ដីរដ្ឋមន្ត្រីសុខាភិបាលថៃ លោក ពីយ៉ាសាខន សាកុនសត្យាដន ដែលបានថ្លែងថា ការស៊ើបអង្កេតនឹងត្រូវធ្វើឡើងដោយហ្មត់ចត់ ដោយសារតែករណីទាំងនោះគឺជាបញ្ហារសើប។
ការឆ្លងវីរុសហ្ស៊ីកាអាចបង្កផលវិភាគធ្ងន់ធ្ងរដល់ស្ត្រីមានផ្ទៃពោះនិងទារកក្នុងផ្ទៃរបស់ពួកគេ។ ប្រសិនបើឆ្លងវីរុសនេះ វាអាចបង្កឲ្យទារកកើតមកខុសប្រក្រតីនិងមានការវិវត្តខួរក្បាលមិនពេញលក្ខណៈ។ ទារកដែលឆ្លងវីរុសនេះ ច្រើនតែកើតមកមានក្បាលតូចខុសពីធម្មតា៕
