មន្ត្រីជាន់ខ្ពស់របស់គណបក្សកុម្មុយនីស្តចិន២រូប ត្រូវបានបណ្តេញចេញពីតួនាទី និងបើកផ្លូវឲ្យមន្ត្រីជំនាញស៊ើបអង្កេតបន្ថែម បន្ទាប់ពីររកឃើញថាអ្នកទាំងពីរនោះជាប់ពាក់ព័ន្ធនឹងករណីប្រព្រឹត្តអំពើពុករលួយនៅក្នុងតំណែង។
សារព័ត៌មានរដ្ឋចិនស៊ីនហូរចុះផ្សាយថា ការបណ្តេញចេញមន្ត្រីទាំងពីរនេះចេញពីបក្ស គឺជាផ្នែកមួយនៃការអនុវត្តយុទ្ធនាការរបស់ លោក ស៊ី ជីនពីង ក្នុងការប្រយុទ្ធប្រឆាំងអំពើពុករលួយ។
ក្នុងខ្លឹមសារសង្ខេបរបស់សារព័ត៌មានរដ្ឋចិនស៊ីនហួរពីការបើកកិច្ចប្រជុំបិទទ្វារ៤ថ្ងៃរបស់បក្សកុម្មុយនីស្តហើយបានបិទបញ្ចប់កាលពីថ្ងៃព្រហស្បតិ៍ម្សិលមិញនោះ បានបង្ហាញឈ្មោះមន្ត្រីពីរនាក់គឺឈ្មោះ Fan Changmi អតីតមេបញ្ជាការរងយោធានៅ Lanzhou និងឈ្មោះ Niu Zhizhong ជាមេបញ្ជាការយោធាមួយរូប។
ស៊ីនហូរបញ្ជាក់ថា បក្សសម្រេចបណ្តេញចេញមន្ត្រីទាំងពីរនេះ ដោយសាររកឃើញមានកំហុសច្រើនពាក់ព័ន្ធអំពើពុករលួយ។ ប៉ុន្តែមិនបានផ្តល់ព័ត៌មានលម្អិតនោះទេ។
Fan Changmi ត្រូវបានរដ្ឋដាក់ការស៊ើបអង្កេតតាំងពីឆ្នាំ២០១៤ ហើយទើបប្រកាសជាផ្លូវការនៅពេលនេះ ចំណែក Niu Zhizhongក៏ត្រូវបានស៊ើបអង្កេតរកឃើញកំហុសពុករលួយដែរ។
កាលពីខែកក្កដាកន្លងទៅ មន្ត្រីជាន់ខ្ពស់គណបក្សកុម្មុយនីស្តចិនមួយរូប ត្រូវបានតុលាការក្រុងប៉េកាំងកាត់ទោសឲ្យជាប់ពន្ធនាគារអស់មួយជីវិត។
ក្នុងរយៈពេល៣ឆ្នាំដែលស្ថិតនៅក្រោមការដឹកនាំរបស់ លោក ស៊ី ជីនពីង ចិនបានកាត់ទោសមន្ត្រីរដ្ឋាភិបាលជាង១លាននាក់ ដែលពាក់ព័ន្ធករណីអំពើពុករលួយ៕
