លោក សម រង្ស៊ី អះអាងថា ចលនាសង្គ្រោះជាតិផ្ដួចផ្ដើមដោយរូបលោកផ្ទាល់នោះ នឹងធ្វើសកម្មភាពឈានទៅដាក់សម្ពាធដៃគូប្រកួត ឲ្យពិចារណាលែងក្រាញអំណាច បើកចំហប្រជាធិបតេយ្យឡើងវិញ ក្រោយពីគណបក្សប្រឆាំងដ៏ធំរបស់លោក ត្រូវបានរំលាយហើយក៏ដោយ។
គណបក្សសង្គ្រោះជាតិ ដែលទទួលបានសំឡេងគាំទ្រពីប្រជាពលរដ្ឋប្រហែល ៣លានសំឡេងនៅក្នុងការបោះឆ្នោតជាតិកាលពីឆ្នាំ២០១៣នោះ ត្រូវបានតុលាការកំពូលសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុន ទៅតាមបណ្ដឹងរបស់រដ្ឋាភិបាល ហើយថ្នាក់ដឹកនាំ ១១៨រូបរបស់បក្សប្រឆាំងមួយនេះ ក៏ត្រូវបានដាក់ឲ្យស្ថិតក្រោមការហាមឃាត់មិនឲ្យធ្វើនយោបាយរយៈពេល ៥ឆ្នាំផងដែរ។
បីខែក្រោយពីបក្សប្រឆាំងត្រូវបានរំលាយ ហើយមេដឹកនាំបក្សនេះ គឺលោក កឹម សុខា នៅតែបន្តស្ថិតនៅក្រោមការឃុំខ្លួននៅក្នុងពន្ធនាគារដដែលនោះ លោក សម រង្ស៊ី ដែលកំពុងរស់នៅនិរទេសខ្លួននៅឯបរទេសដើម្បីគេចចេញពីបណ្ដឹងតាមផ្លូវតុលាការនៅកម្ពុជានោះ បានសម្រេចបង្កើត «ចលនាសង្គ្រោះជាតិ»នៅឯសហរដ្ឋអាមេរិក ដូចដែលលោកបានប្រកាសឲ្យដឹងកាលពីប៉ុន្មានសប្ដាហ៍មុនដូច្នោះដែរ។
ក្នុងវីដេអូដែលបង្ហោះនៅលើទំព័រហ្វេសប៊ុករបស់លោកនៅថ្ងៃនេះ លោក សម រង្ស៊ី បានថ្លែងថា ចលនាថ្មីនេះ នឹងបំផុសឲ្យពលរដ្ឋតស៊ូមតិឡើងវិញ តាមរយៈបាតុកម្មអហិង្សាប្រឆាំងទៅនឹងការរំលាយគណបក្សរបស់លោក។
លោក សម រង្ស៊ី ថ្លែងទៀតថា ចលនានេះនឹងពន្យល់ទៅកងកម្លាំង កុំឲ្យយកពលរដ្ឋ អ្នកតស៊ូមតិធ្វើជាសត្រូ ប្រាប់ទៅសហគមអន្តរជាតិ ឲ្យឈប់ឲ្យគាំទ្ររដ្ឋាភិបាលរបស់លោក ហ៊ុន សែន ទាំងវិស័យការទូត ទាំងការផ្តល់ប្រាក់កម្ចី ដែលលោកថា ចលនាទាំងអស់នេះ នឹងដាក់សម្ពាធលើបក្សកាន់អំណាច ឲ្យវិលទៅត្រឡប់ទៅដើរគន្លងលទ្ធិប្រជាធិបតេយ្យ និងបើផ្លូវឲ្យគណបក្សរបស់លោក ដែលបានរំលាយទៅហើយនោះ បានចូលរួមបោះឆ្នោតឡើងវិញ។
លោកថ្លែងថា៖ «ឥឡូវ ហ៊ុន សែន ដើម្បីរស់ត្រូវខ្វីលុយគេ។ ខ្ចីពីលោកសេរីផង ហើយខ្ចីពីចិនផង។ ខ្ចីកាន់តែច្រើនឡើងៗ ហើយបើឈប់ខ្ចីពេលណា សេដ្ឋកិច្ចស្រុកខ្មែរនឹងឡុងចុង ហើយ ហ៊ុន សែន ក៏មិនអាចនៅក្រាញអំណាចបានទៀតទេ។ ដូច្នេះចលនាសង្គ្រោះជាតិនេះត្រូវតែធ្វើចលនាជាមួយម្ចាស់លុយប្រាក់កម្ចីថា កុំឲ្យ ហ៊ុន សែន ខ្ចីលុយទៀត ពីព្រោះ ហ៊ុន សែន អស់ភាពស្របច្បាប់ហើយ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ឲ្យដឹងកាលពីចុងសប្តាហ៍មុនថា ចលនាសង្គ្រោះជាតិគ្មានឥទ្ធិពលអ្វីដល់រដ្ឋាភិបាលទេ។ លោកបានប្រៀបប្រដូចចលនានេះទៅនឹងមនុស្សជិតស្លាប់ទៅហើយ ដែលនៅសល់តែដង្ហើមចុងក្រោយតែប៉ុណ្ណោះ។
ប៉ុន្តែ អ្នកវិភាគនយោបាយ លោក អ៊ូ វីរៈ វិភាគថា ចលនានេះជាព្រួញមុខពីរ មានសម្ពាធខ្លះទៅលើរដ្ឋាភិបាលផង និងបង្កើតជារលកជំរុញឲ្យមានការប្រឈមនៃការបែកបាក់ផ្ទៃក្នុងផងដែរ។ លោកហៅចលនានេះថា ជាសំឡេងស្គរដាស់អារម្មណ៍នៃសេរីភាពបញ្ចេញមតិ។
លោកថា៖ «គាត់ដើរតវ៉ានៅលើឆាកអន្តរជាតិ វាតែងតែមានសម្ពាធដល់រដ្ឋាភិបាល និងគណបក្សប្រជាជនកម្ពុជាហើយ។ អាហ្នឹងធម្មតាទេ ក្នុងរូបភាពចលនាហ្នឹងក៏ដោយ ឬមួយក្នុងរូបភាពគាត់ផ្ទាល់ក៏ដោយ ក្នុងរូបភាពដែលគាត់ប្រកាសពីមុនមកក៏ដោយក៏ដូចតែគ្នាដែរ។ អញ្ចឹង ចលនាហ្នឹងជារូបភាពអន្តរជាតិមិនដូរទេ ឬមួយមិនខុសពីមុនទេ។ ប៉ុន្តែ រូបភាពសម្រាប់អតីតគណបក្សសង្គ្រោះជាតិ វាអាចធ្វើឲ្យបែកបាក់ ធ្វើឲ្យឈ្លោះគ្នាផ្ទៃក្នុងអីអញ្ចឹងទៅ»។
ទោះជាយ៉ាងណា លោក កឹម សុខា តាមរយៈមេធាវី និងកូនស្រីរបស់លោក បានបញ្ជាក់ពីជំហរមិនចូលរួម និងមិនគាំទ្រចលនាថ្មីផ្ដួចផ្ដើមដោយលោក សម រង្ស៊ី នោះទេ ហើយថា នៅតែទាមទារយកគណបក្សសង្គ្រោះជាតិត្រឡប់មកវិញ ដោយថា ជាតំណាងឆន្ទៈរបស់ពលរដ្ឋជាង ៣លាននាក់៕
