ចៅសង្កាត់ជាប់ឆ្នោតមួយរូបរបស់អតីតគណបក្សសង្គ្រោះជាតិ នៅខេត្តសៀមរាប បានចោទអតីតមន្ដ្រីជាប់កិច្ចសន្យារបស់ គ.ជ.ប. ថា បានអូសទាញរូបលោក ឲ្យចូលបក្សកាន់អំណាច ខណៈចៅសង្កាត់មួយរូបទៀតរបស់អតីតបក្សប្រឆាំងនៅឯខេត្តបាត់ដំបង ក៏រងការចោទថា បើកហាងលក់នំបញ្ចុកគាំទ្រចលនាឧទ្ទាម។
អតីតចៅសង្កាត់សាលាកំរើក ខេត្ដសៀមរាប លោក ជិន សុខង៉េង ឲ្យ VOD ដឹងថា កាលពីថ្ងៃទី២៧ មករា លោកបានជួបជាមួយលោក ចៀន សន ជាអតីតមន្ដ្រីជាប់កិច្ចសន្យាម្នាក់នៃគណៈកម្មាការរៀបចំការបោះឆ្នោតខេត្តសៀមរាប ហើយថា អតីតមន្ដ្រីគ.ជ.ប.រូបនេះ បានពន្យល់ពីស្ថានការណ៍នយោបាយបច្ចុប្បន្ន និងណែនាំលោកឲ្យចូលរួមជាមួយបក្សកាន់អំណាច។
អតីតចៅសង្កាត់សាលាកំរើករូបនេះ សម្ដែងការខកចិត្ត ដោយថា ស្ថាប័ន គ.ជ.ប. ជាស្ថាប័នឯករាជ្យ ប៉ុន្ដែ បែរជាមន្ដ្រីមានភាពលម្អៀងផ្នែកនយោបាយ។
លោកថា៖ «ទើបថ្មីៗ រឿងនេះ វាកើតឡើងដោយចៃដន្យ ហើយគាត់បាននិយាយឲ្យយើងគាត់សារឡើងវិញចំពោះស្ថានការណ៍នយោបាយថ្មីៗហ្នឹង ក្នុងចេតនាឲ្យយើងបកទៅរួមរស់ជាមួយគណបក្សប្រជាជន។ គាត់ត្រឹមតែជាមន្ដ្រីនៅក្នុងលេខាធិការដ្ឋាន គ.ជ.ប.។ គ្រាន់តែថា យើងខ្ញុំមិនពេញចិត្ត ដែលមន្ដ្រី គ.ជ.ប. ដែលឯករាជ្យ បែរជាមានទិន្នាការទៅគណបក្សម្ខាង»។
ប៉ុន្ដែ លោក ចៀន សន ឲ្យ VOD ដឹងថា ការលើកឡើងរបស់លោកនៅពេលនោះ គ្រាន់ជាការជជែកគ្នាលេង និងគ្មានហេតុផលនយោបាយឡើយ។ លោកថា លោកធ្លាប់ជាមន្ដ្រីជាប់កិច្ចសន្យារបស់ គ.ជ.ប. ប៉ុន្ដែ បានលាឈប់ពីការងារនោះហើយ។
លោកថា៖ «រាល់ថ្ងៃ មិនមែននៅ គ.ជ.ប. ទេ នៅ គ.ជ.ប. មានវគ្គគេ ដូចជា ២ ឬ ៣ខែអញ្ចឹងណា! តែសម្រាប់រាល់ថ្ងៃនៅការងារស៊ីវិលទេ វាមិនមែនទៅពាក់ព័ន្ធខាង គ.ជ.ប. អព្យាក្រឹត្យអីទេ។ អាហ្នឹងគ្រាន់ជាការស្គាល់គ្នា ប្រាជ្ញគ្នាលេង មិនមែនជាផ្លូវការអីទេ»។
នៅឯខេត្តបាត់ដំបងឯណោះវិញ អតីតចៅសង្កាត់អូរចារកូតាបក្សប្រឆាំង កញ្ញា ស៊ិន ចាន់ពៅរ៉ូហ្សេត ត្រូវបានតំណាងរាស្ត្របក្សកាន់អំណាច លោក ឈាង វុន ចោទប្រកាន់កាលពីសប្ដាហ៍មុនថា បានបើកហាងលក់នំបញ្ចក់ ធ្វើជាទីតាំងគាំទ្រចលនាសង្គ្រោះជាតិផ្ដួចផ្ដើមឡើងដោយលោក សម រង្ស៊ី ហើយបានហៅទីតាំងនោះថា «ប្រមូលផ្ដុំពួកឧទ្ទាម»។
ការចោទប្រកាន់របស់លោក ឈាន វុន ធ្វើឡើងតាមរយៈការសរសេរសារបញ្ចេញមតិនៅក្រោមរូបភាពរបស់កញ្ញា រ៉ូហ្ស៊េត ដែលបង្ហាះនៅលើហ្វេសប៊ុកកាលពីថ្ងៃទី២៦ ខែមករា។
លោក ឈាន វុន សរសេរបញ្ចេញមតិបន្ថែមថា៖ «បក្សនាង Rozet បានងាប់បាត់ទៅហើយ ហើយចាប់ពីពេលនោះមកដល់ពេលនេះ ចំពោះខ្ញុំ នាង(Rozet)គ្មានតម្លៃនយោបាយបន្ដិចណាសម្រាប់ទិញលក់ទេ។ ខ្ញុំបានឃើញអ្នកដែលបានប្រកាសគាំទ្រចលនាឧទ្ទាមចេញចូលហាងលក់នំបញ្ចុកនេះ ហើយខ្លះបានទាំងជួយជូតការ៉ូ ជូតតុ និងបម្រើភ្ញៀវទៀតផង។ បើទីនេះត្រូវបានប្រើប្រាស់ជាកន្លែងប្រមូលផ្តុំរងើកភ្លើងនោះ គឺពិតជាគ្រោះថ្នាក់ណាស់សម្រាប់ Rozet ហើយមិនអាចអត់ឱនបានឡើយ»។
ប៉ុន្ដែ តាមរយៈបណ្ដាញសង្គមហ្វេសប៊ុក នៅថ្ងៃទី២៧ មករា កញ្ញា រ៉ូហ្ស៊េត បានច្រានចោលការចោទប្រកាន់នេះ ដោយកញ្ញាថាមិនបានប្រព្រឹត្តអំពើខុសច្បាប់នោះឡើយ និងថា មុខរបរលក់នំបញ្ចុក គឺគ្រាន់តែដើម្បីរកប្រាក់ចិញ្ចឹមម្តាយ និងបង់រំលួសបំណុលផ្ទះប៉ុណ្ណោះ។
គណបក្សសង្គ្រោះជាតិ ត្រូវបានតុលាការកំពូលរំលាយចោល កាលពីខែវិច្ឆិកាឆ្នាំមុន ហើយសមាជិក និងមន្ដ្រីអតីតបក្សប្រឆាំងចំនួន ១១៨រូប ត្រូវបានហាមឃាត់មិនឲ្យធ្វើនយោបាយរយៈពេល ៥ឆ្នាំ ខណៈលោក កឹម សុខា ក៏កំពុងជាប់នៅក្នុងពន្ធនាគារត្រពាំងផ្លុង នាខេត្ដត្បូងឃ្មុំ ក្រោមការចោទប្រកាន់ពីរដ្ឋាភិបាលថា «ក្បត់ជាតិ»។
ក្រោយពេលតុលាការរំលាយអតីតគណបក្សប្រឆាំង លោកនាយករដ្ឋមន្ដ្រី ហ៊ុន សែន បានចេញមុខជាសាធារណៈ ដោយប្រកាសបើកផ្លូវឲ្យក្រុមប្រឹក្សាឃុំសង្កាត់ជាប់ឆ្នោត និងមន្ដ្រីរបស់អតីតគណបក្សប្រឆាំង ចូលរួមជីវិតនយោបាយជាមួយគណបក្សកាន់អំណាច ដើម្បីរក្សាតំណែង៕