សមាជិកព្រឹទ្ធសភាអាមេរិក ៨រូប បានប្រាប់ទៅអគ្គរដ្ឋទូតអាមេរិកប្រចាំនៅអង្គការសហប្រជាជាតិ ឲ្យជំរុញទៅដៃគូ និងតំណាងនៃប្រទេសជាសម្ព័ន្ធមិត្តរបស់អាមេរិក ឲ្យដាក់សម្ពាធមកលើរដ្ឋាភិបាលកម្ពុជា ដើម្បីស្ដារស្ថានភាពលទ្ធិប្រជាធិបតេយ្យ និងសិទ្ធិមនុស្សនៅកម្ពុជាឡើងវិញ បន្ទាប់ពីការបង្ក្រាបរបស់រដ្ឋាភិបាលទៅលើបក្សប្រឆាំង អង្គការសង្គមស៊ីវិល និងប្រព័ន្ធផ្សព្វផ្សាយកាលពីឆ្នាំមុន។
ក្រុមសមាជិកព្រឹទ្ធសភាអាមេរិកទាំងនោះ បានជំរុញបែបនេះ នៅក្នុងលិខិតមួយផ្ញើទៅអគ្គរដ្ឋអាមេរិកប្រចាំអង្គការសហប្រជាជាតិ អ្នកស្រី នីកឃី ហាឡេយ៍ (Nikki Haley) កាលពីថ្ងៃទី២៥ ខែមករានេះ។
ក្នុងលិខិតនោះ ក្រុមសមាជិកព្រឹទ្ធសភាអាមេរិក បានប្រាប់ទៅអ្នកស្រី នីកឃី ហាឡេយ៍ ថា រដ្ឋាភិបាលកម្ពុជាបានបង្ក្រាបទៅលើគណបក្សប្រឆាំង ក្រុមអង្គការសង្គមស៊ីវិល និងប្រព័ន្ធផ្សព្វផ្សាយ ដែលការបង្ក្រាបទាំងនេះ បានធ្វើឲ្យប៉ះពាល់ដល់លទ្ធិប្រជាធិបតេយ្យដ៏ផុយស្រួយនៅកម្ពុជា។
ក្នុងលិខិតដដែលនោះ ក្រុមសមាជិកព្រឹទ្ធសភាអាមេរិកដែលដឹកនាំដោយលោក ចន មេកឃែន (Jonh McCain) និងលោក បេនហ្សាមិន ខាឌីន (Benjamin Cardin) នោះ បានជំរុញទៅអ្នកស្រី នីកឃី ហាឡេយ៍ ឲ្យប្រើឥទ្ធិពលអ្នកស្រីនៅអង្គការសហប្រជាជាតិ ជំរុញឲ្យមានការដាក់រដ្ឋាភិបាលលោក ហ៊ុន សែន ឲ្យនៅឯកោ ដើម្បីកុំឲ្យទទួលបានភាពស្របច្បាប់ ដែលកើតចេញពីការបោះឆ្នោតដោយមិនសេរី និងមិនយុត្តិធម៌នៅខែកក្កដាខាងមុខ។
ក្នុងលិខិតដដែល ក្រុមសមាជិកព្រឹទ្ធសភាទាំងនោះក៏ ស្នើអ្នកស្រី នីកឃី ហាឡេយ៍ អំពាវនាវទៅដៃគូ និងសម្ព័ន្ធមិត្ត នៅក្រុមប្រឹក្សាសិទ្ធិមនុស្សនៃអង្គការសហប្រជាជាតិ ឲ្យលើកអំពីបញ្ហាកម្ពុជាក្នុងកិច្ចប្រជុំរបស់ក្រុមប្រឹក្សាសិទ្ធិមនុស្សអង្គការសហប្រជាជាតិនាពេលខាងមុខ និងពិភាក្សាជាមួយឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស អ្នករាយការណ៍ពិសេសទទួលបន្ទុកសិទ្ធិមនុស្សនៅកម្ពុជា និងតំណាងអង្គការសង្គមស៊ីវិលផង។
ក្រុមសមាជិកព្រឹទ្ធសភាអាមេរិក បានជំរុញទៅអ្នកស្រី នីកឃី ហាឡេយ៍ ឲ្យធ្វើការជាមួយរដ្ឋាភិបាលប្រទេសដទៃទៀត ដើម្បីអនុម័តសេចក្ដីសម្រេចដ៏ខ្លាំងក្លាមួយ ដែលដាក់រដ្ឋាភិបាលកម្ពុជា ឲ្យស្ថិតនៅក្រោមការឃ្លាំងមើលនៅលើឆាកអន្តរជាតិ។
វីអូឌី មិនអាចសុំការបំភ្លឺពីអ្នកនាំពាក្យក្រសួងការបរទេស លោក ជុំ សន្ទរី បានទេ នៅថ្ងៃនេះ។
ប៉ុន្តែ អ្នកនាំពាក្យគណបក្សប្រជាជនកម្ពុជា លោក សួស យ៉ារ៉ា ប្រាប់ថា លោកមិនចាប់អារម្មណ៍នឹងសម្ដីរបស់ក្រុមសមាជិកព្រឹទ្ធសភាអាមេរិកនោះទេ ដោយលោកថា បរទេសមិនអាចជ្រៀតជ្រែកកិច្ចការផ្ទៃក្នុងរបស់កម្ពុជាបាននោះទេ។
លោកមានប្រសាសន៍ថា៖«ជាគោលការណ៍របស់សហប្រជាជាតិមួយដែលមិនអនុញ្ញាតឲ្យរដ្ឋណាមួយរំលោភលើរដ្ឋណាមួយទេ ទោះបីតូច ឬធំក៏ដោយ។ អធិបតេយ្យភាព ឬឯករាជ្យភាព ត្រូវតែគោរពគ្នាទៅវិញទៅមកដោយពេញលេញ។ បើសិនជាសភាកម្ពុជាយើងថ្លែងអ្វីមួយប៉ះពាល់កិច្ចការរបស់សភាអាមេរិក តើអាមេរិកទទួលយកឬអត់? វាជារឿងមួយដែលយើងត្រូវគិតគ្នាទៅវិញទៅមក។ ចំណុចនេះហើយជាការគោរពអធិបតេយ្យគ្នាទៅវិញទៅមក»។
អ្នកវិភាគនយោបាយ លោក អ៊ូ វីរៈ យល់ថា ប្រសិនកម្ពុជាមិនបន្ទន់ជំហររបស់ខ្លួន ហើយងាកទៅស្ដារស្ថានភាពនយោបាយនៅកម្ពុជាឲ្យវិលត្រឡប់ទៅរកភាពដើមវិញទេ លោកថា អ្នកដែលរងផលប៉ះពាល់ គឺប្រជាពលរដ្ឋ។
លោកវិភាគថា៖«ខ្ញុំមើលទៅជារឿងមួយល្អ ប៉ុន្តែ បើសិនជាយើងនៅតែបន្តមានការរឹតបន្តឹង ហើយលោកខាងលិច ជាពិសេសប្រទេសដែលប្រកាន់លទ្ធិប្រជាធិបតេយ្យ គេបន្តហ៊ុំព័ទ្ធនយោបាយ និងសេដ្ឋកិច្ចប្រទេសកម្ពុជា ខ្ញុំមើលទៅនឹងគ្រោះថ្នាក់ដល់ប្រទេសកម្ពុជា ព្រោះអីយើងមើលទៅ ពេលហ្នឹង យើងទៅជាកូនអុកនៃប្រទេសចិន ដោយសារយើងអស់ជម្រើស បានន័យថា យើងអស់ជម្រើស យើងនៅពឹងចិនទំាងស្រុង យើងទៅជាឧបករណ៍របស់ប្រទេសចិន…»។
រដ្ឋាភិបាលកម្ពុជាដែលដឹកនាំដោយលោកនាយករដ្ឋមន្ត្រី ហ៊ុន សែន រងការថ្កោលទោស និងព្រមានដាក់ទណ្ឌកម្មជាបន្ដបន្ទាប់ ជុំវិញការឃុំខ្លួនមេដឹកនាំគណបក្សសង្គ្រោះជាតិ លោក កឹម សុខា ការរំលាយគណបក្សប្រឆាំងដ៏ធំមួយនេះ ការបិទប្រព័ន្ធផ្សព្វផ្សាយឯករាជ្យ និងការធ្វើទុក្ខបុកន្នេញលើសង្គមស៊ីវិល ប៉ុន្តែ រដ្ឋាភិបាល អះអាងថា ករណីទាំងនោះ គឺជាការអនុវត្តច្បាប់របស់កម្ពុជា៕
រាយការណ៍បន្ថែមដោយ លោក ណាត សុភាព
