កាសែតរបស់ថៃបានឲ្យដឹងថាកម្មករខ្មែរ៥នាក់ដែលជាអ្នកបើកទូកនេសាទលើដែនសមុទ្រថៃត្រូវបានអាជ្ញាធរថៃចាប់ខ្លួនកាលពីព្រឹកថ្ងៃអាទិត្យ ដោយសមត្ថកិច្ចសង្ស័យថាអ្នកទាំងនោះជាប់ពាក់ព័ន្ធនឹងករណីរំលោភសេពសន្ថវៈលើស្រ្តីជនជាតិបារាំង។
កាសែតបាងកកប៉ុស្ត៍របស់ថៃបានចុះផ្សាយកាលពីល្ងាចថ្ងៃអាទិត្យថាកម្មករខ្មែរទាំង៥នាក់ត្រូវបានសមត្ថកិច្ចថៃចាប់ខ្លួននៅទីតាំងផ្សេងគ្នា ដោយ៣នាក់ចាប់បាននៅក្បែរកន្លែងកើតហេតុនៅលើកោះកុត ក្នុងខេត្តត្រាតប្រទេសថៃ ក្បែរខេត្តកោះកុង វេលាម៉ោង៥ព្រឹកថ្ងៃអាទិត្យនិង២នាក់ផ្សេងទៀតត្រូវបានចាប់ខ្លួន នៅពេលដែលអ្នកទាំងពីរកំពុងឆ្លងដែនមកកាន់ខេត្តកោះកុងប្រទេសកម្ពុជាវិញ។
កាសែតបាងកកប៉ុស្តិ៍ឲ្យដឹងទៀតថាហេតុការណ៍នេះកើតឡើងតាំងពីល្ងាចថ្ងៃសៅរ៍ ខណៈស្រ្តីជនជាតិបារាំងពីរនាក់និងបុរសជនជាតិបារាំងពីរនាក់ផ្សេងទៀតបានដើរត្រឡប់ពីកន្លែងពួកគេកំសាន្តទៅបរិភោគអាហារពេលល្ងាចនៅកន្លែងស្នាក់របស់ពួកគេ ដែលមានចម្ងាយប្រហែល១គីឡូម៉ែត្រពីគ្នា។ កាសែតដដែលបានដកស្រង់សម្តីនគរបាលថៃថាអ្នកនេសាទខ្មែរពីរនាក់បាននិយាយលេងជាមួយជនជាតិបារាំងទាំងនោះ ហើយពេលដែលជនជាតិបារាំងទាំងនោះរៀបចាកចេញពីពួកគេ ក៏មានមនុស្ស៣នាក់ផ្សេងទៀតបានចេញពីព្រៃនិងចាប់ស្រ្តីពីរនាក់យកទៅរំលោភនិងបានវាយបុរសជនជាតិបារាំងពីរនាក់ឲ្យរងរបួស។
បើតាមការសែតដដែល សមត្ថកិច្ចថៃឲ្យដឹងថាជនជាតិខ្មែរទាំងប្រាំនាក់នោះមានឈ្មោះ ធី អាយុ ២០ឆ្នាំ បុត្រ មាន អាយុ២០ឆ្នាំ យឹម អាយុ២៥ឆ្នាំ ផៃ អាយុ២២ឆ្នាំ និងជឿន អាយុ២៥ឆ្នាំ។ ស្រ្តីជនជាតិបារាំងដែលរងគ្រោះនោះ ម្នាក់អាយុ៥៧ឆ្នាំនិងម្នាក់ទៀតមានអាយុ២៨ឆ្នាំ ហើយអ្នកទាំងពីរនិងបុរសជនជាតិបារាំងម្នាក់ទៀតបានរងរបួសធ្ងន់ធ្ងរនិងកំពុងសម្រាកព្យាបាលនៅមន្ទីរពេទ្យមួយក្នុងស្រុកមួង ខេត្តត្រាតប្រទេសថៃ។
កាសែតបាងកកប៉ុស្ត៍ដដែលឲ្យដឹងថា នៅព្រឹកថ្ងៃចន្ទនេះ សមត្ថកិច្ចថៃនឹងបន្តសាកសួរអ្នកទាំងប្រាំនាក់បន្តទៀតទាក់ទងករណីរំលោភសេពសន្ថវៈនេះ។
អ្នកនាំពាក្យក្រសួងការបរទេសកម្ពុជា លោក ជុំ សុន្ទរី ប្រាប់វីអូឌី(VOD)នៅព្រឹកនេះថា លោកបានដឹងព័ត៌មាននេះតាមរយៈសារព័ត៌មានបរទេស តែលោកថា លោកមិនទាន់បានទទួលព័ត៌មានលម្អិតពីមន្ត្រីទូតខ្មែរប្រចាំប្រទេសថៃនោះនៅឡើយ។ លោកបន្ថែមថា៖ “ខ្ញុំអត់ទាន់បានទទួលព័ត៌មាន ខ្ញុំឃើញតែព័ត៌មានក្នុងអ៊ីនធឺណែត ឥឡូវកំពុងតែរង់ចាំរបាយកាណ៍ពីស្ថានតំណាង(មន្ត្រីទូត)នៅថៃថារឿងហ្នឹងវាកើតឡើងយ៉ាងម៉េច”។
គួរបញ្ជាក់ថាកាលពីចុងឆ្នាំ២០១៥ តុលាការថៃបានកាត់ទោសប្រហារជីវិតជនជាតិមីយ៉ានម៉ា(ភូមា)ពីរនាក់ពាក់ព័ន្ធនឹងការរំលោភនិងសម្លាប់ជនជាតិអង់គ្លេសពីរនាក់នៅកោះតៅប្រទេសថៃ៕