អង្គភាពប្រឆំាងអំពើពុករលួយ (ACU) ចាត់វិធានការច្បាប់លើក្រឡាបញ្ជីតុលាការខេត្តបន្ទាយមានជ័យ ដោយថាបានគាបសង្កត់ទារប្រាក់ពីជនរងគ្រោះចន្លោះ ២ទៅ៤ម៉ឺនដុល្លារ ជាថ្នូរចេញសាលក្រមស្ថាពរ ធ្វើឲ្យប៉ះពាល់ដល់ប្រព័ន្ធយុត្តិធម៌នៅកម្ពុជា។
នៅក្នុងសេចក្តីប្រកាសព័ត៌មានកាលពីថ្ងៃទី២៨មីនានេះ អង្គភាពប្រឆំាងអំពើពុករលួយ បានឲ្យដឹងថា អតីតក្រឡាបញ្ជីនៅតុលាការខេត្តកោះកុង-រាជធានីភ្នំពេញ និងបច្ចុប្បន្នធ្វើក្រឡាបញ្ជីនៅខេត្តបន្ទាយមានជ័យ លោក ហង្ស សាមឿន បានយកអំណាច មុខងាររបស់ខ្លួនទារប្រាក់ពីជនរងគ្រោះ២ឬ៤ម៉ឺនដុល្លារ បូកនឹងកាត់ដីមួយដុំ ឬទាមទាររថយន្តម៉ាស្តារមួយគ្រឿងជាដើម ដើម្បីជាថ្នូរចេញលិខិតបញ្ជាក់សាលក្រមស្ថាពរ និងរូបមន្តអនុវត្ត ដែលច្បាប់ហាម ធ្វើឲ្យប៉ះពាល់ដល់ឯករាជ្យភាពតុលាការ និងមុខមាត់រដ្ឋាភិបាល។
សេចក្តីប្រកាសព័ត៌មានមានខ្លឹមសារថា«អំពើរបស់បុគ្គល ហង្ស សាមឿន នេះ បានធ្វើឲ្យប៉ះពាល់ដល់កិត្តិយសរបស់មន្ត្រីសាធារណៈដទៃទៀត ព្រមទំាងធ្វើឲ្យប៉ះពាល់ដល់ជំនឿទុកចិត្តរបស់ប្រជាជន និងមហាជន លើការដឹកនាំរបស់រាជរដ្ឋាភិបាលយ៉ាងធ្ងន់ធ្ងរ»។
សេចក្តីប្រកាសព័ត៌មានដដែលបញ្ជាក់ថាករណីក្រឡាបញ្ជីដែលទារប្រាក់ពីជនរងគ្រោះបែបនេះ ធ្វើឲ្យសាធារណមតិជាតិ អន្តរជាតិ វាយប្រហារលើស្ថាប័នតុលាការ រាជរដ្ឋាភិបាលកម្ពុជាផងដែរ។
យ៉ាងណាក៏ដោយ អង្គភាពប្រឆំាងអំពើពុករលួយ (ACU) បានកសាងសំណុំរឿងលោក ហង្ស សាមឿន បញ្ជូនទៅតុលាការឲ្យចាត់វិធានការច្បាប់ ដោយចោទប្រកាន់ពីបទ វិតិក្រម។
មាត្រា៥៩៣នៃក្រមនីតិវិធីព្រហ្មទណ្ឌបទល្មើសវិតិក្រមត្រូវផ្តន្ទាទោសដាក់ពន្ធនាគារពី ២ ទៅ៥ឆ្នាំ និងពិន័យជាប្រាក់ពី ៤លានរៀល ទៅ១០លានរៀល។
គួររំលឹកថាកាលពីសប្តាហ៍ អង្គភាពប្រឆាំអំពើពុករលួយ ក៏បានចាប់ខ្លួនមន្ត្រីនគរបាលស័ក្តិ៣ម្នាក់ ឈ្មោះ ហ៊ុយ ហឿន ធ្វើការនៅនាយកដ្ឋានប្រឆាំងបទល្មើសសេដ្ឋកិច្ចនៃក្រសួងមហាផ្ទៃ ដោយចោទថាបានបានប្រព្រឹត្តបទល្មើសជាក់ស្តែដើរប្រមូលលុយពីក្រុមហ៊ុនសហគ្រាសនិងបុគ្កលឯកជននានា ក្នុងរាជធានីភ្នំពេញ ប្រមាណជា១០០កន្លែង គ្មានច្បាប់អនុញ្ញាតិ៕