ឧត្តមស្នងការអង្គការសហប្រជាជាតិ ហៅកាត់ថា OHCHR បានរិះគន់លើច្បាប់ស្ដីពីគណបក្សនយោបាយរបស់រដ្ឋាភិបាលកម្ពុជាថា គ្មានភាពច្បាស់លាស់ និងខុសពីគោលការណ៍ច្បាប់អន្ដរជាតិដោយថា ការធ្វើខុសរបស់បុគ្គលតែម្នាក់ ពុំគួរឈានដល់ការរំលាយគណបក្សទាំងមូលទេ។
យោងតាមរបាយការណ៍ ចេញផ្សាយនៅថ្ងៃចន្ទទី២៧ខែមិនាឆ្នាំ២០១៧ ឧត្តមស្នងការអង្គការសហប្រជាជាតិ (OHCHR) លើកឡើងថា បទបញ្ញតិ្ដមួយចំនួនក្នុងច្បាប់ស្ដីពីគណបក្សនយោបាយ ដែលត្រូវបានរដ្ឋសភាកម្ពុជាអនុម័តថា មានភាពមិនច្បាស់លាស់ និងអាចបកស្រាយតាមការយល់ឃើញរបស់បក្សកាន់អំណាច ដូចជា ត្រង់ពាក្យថា ធ្វើឲ្យបែកបាក់ «ឯកភាពជាតិ» និង «បូរណភាពដែនដី» នៃប្រទេសកម្ពុជាជាដើម។
បើតាមរបាយការណ៍ ឧត្តមស្នងការអង្គការសហប្រជាជាតិយល់ថា ការអះអាងរបស់រដ្ឋាភិបាលកម្ពុជា ដែលចង់ការពារលទ្ធិប្រជាធិបតេយ្យសេរីពហុបក្ស និងឯកភាពជាតិនោះ គឺមិនមែនសម្រេចបានតាមរយៈការបំបិទសំឡេងប្រឆាំងនោះទេ។
ឧត្តមស្នងការអង្គការសហប្រជាជាតិឲ្យអនុសាសន៍ថា រដ្ឋសភាកម្ពុជា គួរកែពាក្យ «ឯកភាពជាតិ» «ចេតនាធ្វើឲ្យប៉ះពាល់របបរាជានិយមអាស្រ័យរដ្ឋធម្មនុញ្ញ និងប្រជាធិបតេយ្យសេរីពហុបក្ស» និង «សន្ដិសុខជាតិ» ឡើងវិញ ឬត្រូវកំណត់និយមន័យពាក្យទាំងអស់នេះឲ្យបានច្បាស់ មុនដាក់ទោសនរណាម្នាក់។
ការលើកឡើងក្នុងរបាយការណ៍របស់ឧត្តមស្នងការអង្គការសហប្រជាជាតិទំនងជាសំដៅដល់អតីតប្រធានគណបក្សសង្គ្រោះជាតិគឺលោក សម រង្ស៊ី ដែលបានបង្ខំចិត្តនិរទេសខ្លួនទៅក្រៅប្រទេស ក្រោយលោកទទួលរងបណ្ដឹងជាច្រើនករណីពីមន្ត្រីជាន់ខ្ពស់គណបក្សប្រជាជន។ រដ្ឋាភិបាលកម្ពុជា ត្រូវបានមជ្ឈដ្ឋានជាតិ និងអន្ដរជាតិមើលឃើញថា បានព្យាយាមបណ្ដេញលោក សម រង្ស៊ី ចេញពីឆាកនយោបាយ និងចង់រំលាយបក្សប្រឆាំង មុនការបោះឆ្នោតមកដល់ តាមរយៈការធ្វើការច្បាប់ស្ដីពីគណបក្សនយោបាយ។
ក្រៅពីនេះ ឧត្តមស្នងការអង្គការសហប្រជាជាតិលើកឡើងថា ការរំលាយបក្សណាមួយចោល គឺមិនគួរធ្វើតាមទំនើងចិត្តរបស់រដ្ឋាភិបាល ឬបក្សកាន់អំណាចនោះទេ ដោយថា ការប្រព្រឹត្តខុសរបស់បុគ្គលតែម្នាក់ ពុំគួរឈានដល់ការរំលាយគណបក្សរបស់គេទាំងមូលនោះទេ។
ឧត្តមស្នងការអង្គការសហប្រជាជាតិផ្ដល់អនុសាសន៍ថា វិធានការរំលាយគណបក្សនយោបាយគួរតែជាជម្រើសចុងក្រោយ និងថ្លឹងថ្លែងឲ្យបានសុក្រិត្យបំផុត។ ឧត្តមស្នងការអង្គការសហប្រជាជាតិបានស្នើឲ្យបន្ថែមឃ្លាថា «ការរំលាយគណបក្សណាមួយ អាចធ្វើទៅបាន លុះណាតែជាជម្រើសចុងក្រោយ នៅពេលវិធានការច្បាប់ផ្សេងទៀតបានត្រូវបានប្រើប្រាស់អស់» តែប៉ុណ្ណោះ៕
