សហភាពអន្តរសភា កាលពីថ្ងៃម្សិលមិញនេះ បានថ្កោលទោសជាថ្មីទៅលើរដ្ឋាភិបាលកម្ពុជា និងបានជំរុញទៅរដ្ឋាភិបាលនេះ ឲ្យផ្ដល់សិទ្ធិខាងនយោបាយដល់អតីតបក្សប្រឆាំងវិញ។
គណបក្សសង្គ្រោះជាតិ ដែលមានសំឡេងគាំទ្រពីប្រជាពលរដ្ឋប្រហែល ៣លានសំឡេងទាំងនៅក្នុងការបោះឆ្នោតជាតិឆ្នាំ២០១៣ និងការបោះឆ្នោតឃុំសង្កាត់ឆ្នាំ២០១៧នោះ ត្រូវបានតុលាការកំពូលសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុន ហើយបានហាមឃាត់សិទ្ធិខាងនយោបាយរយៈពេល ៥ឆ្នាំ ទៅលើក្រុមមន្ត្រីជាន់ខ្ពស់ ១១៨រូបរបស់បក្សនេះផងដែរ។
ជាងនេះទៅទៀត មេដឹកនាំបក្សប្រឆាំង លោក កឹម សុខា នៅតែស្ថិតនៅក្រោមការឃុំខ្លួនអស់រយៈពេលជាង ៦ខែមកហើយ ចាប់តាំងពីលោកត្រូវបានចាប់ខ្លួនកាលពីដើមខែកញ្ញាឆ្នាំមុន។
នៅឯសន្និបាតលើកទី ១៣៨របស់ខ្លួន នៅទីក្រុងហ្សឺណែវ កាលពីថ្ងៃម្សិលមិញនេះ សហភាពអន្តរសភា ហៅកាត់ថា IPU បានចាត់ទុកវិធានការទាំងឡាយទៅលើបក្សប្រឆាំងដ៏ធំនៅកម្ពុជាថា ជាការរំលោភទៅសិទ្ធិជាមូលដ្ឋានរបស់សមាជិកសភា។
សហភាពអន្តរសភា ដែលប្រមូលផ្ដុំទៅដោយសមាជិកសភាមកពីប្រទេសចំនួន ១៧៨នៅទូទាំងពិភពលោក ក៏បានបង្ហាញការសោកស្ដាយថា ការរំលោភបំពានទៅលើបក្សប្រឆាំង តែងតែកើតមានជាយូរមកហើយ នៅមុនការបោះឆ្នោតនៅកម្ពុជាកាលពីពេលកន្លងមក។
សហភាពអន្តរសភា បានថ្លែងក្នុងសេចក្ដីប្រកាសព័ត៌មានរបស់ខ្លួនថា៖ «IPU ជំរុញទៅអាជ្ញាធរកម្ពុជា ឲ្យផ្ដល់ឲ្យជាបន្ទាន់នូវអាសនៈសភាទាំង ៥៥ដល់សមាជិកសភាគណបក្សសង្គ្រោះជាតិ និងចាប់ផ្ដើមកិច្ចសន្ទនាខាងនយោបាយឡើងវិញ ប្រសិនបើចាំបាច់ មានការជួយគាំទ្រពី IPU»។
ទោះជាយ៉ាងណា លោកនាយករដ្ឋមន្ត្រី ហ៊ុន សែន បានថ្លែងបញ្ជាក់ជាសាធារណៈកាលពីថ្ងៃអង្គារកន្លងមកនេះថា លោកនឹងមិនចរចាជាមួយក្រុមអតីតបក្សប្រឆាំងនោះឡើយ ហើយក៏មិនលើកលែងទោសដល់ក្រុមសមាជិកគណបក្សសង្គ្រោះជាតិ ដែលកំពុងជាប់ឃុំក្នុងពន្ធនាគារផងដែរ ក្នុងនោះមានទាំងលោក កឹម សុខា ផងដែរ៕
