បណ្ដាប្រទេសនៅតំបន់អាស៊ីអាគ្នេយ៍ បានផ្លាស់ប្ដូរសេចក្ដីថ្លែងការណ៍មួយដែលគេគ្រោងប្រកាសនៅឯកិច្ចប្រជុំកំពូលអាស៊ានកាលពីថ្ងៃនេះ ដើម្បីលើកឡើងពីបញ្ហាយោធាភាវូបនីយកម្ម និងការសាងសង់សំណង់នៅលើកោះមានជម្លោះនៅសមុទ្រចិនខាងត្បូង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដែលបានឃើញសេចក្ដីព្រាងសេចក្ដីថ្លែងការណ៍នោះ។
ការផ្លាស់ប្ដូរសេចក្ដីថ្លែងការណ៍នេះ ត្រូវបានគេមើលឃើញថា ជាការប្រឈមមុខនឹងក្រុងប៉េកាំងជុំវិញជម្លោះនៅសមុទ្រចិនខាងត្បូង។
Reuters បានដកស្រង់សម្ដីប្រភពមន្ត្រីកាទូតអាស៊ាន ២រូប ដែលបានឲ្យដឹងថា តំណាងស្ថានទូតចិននៅទីក្រុងម៉ានីល បានព្យាយាមប្រើឥទ្ធិពលគ្របដណ្ដប់ទៅលើសេចក្ដីថ្លែងការណ៍នោះ តាមរយៈការបញ្ចុះបញ្ចូលក្រុមមន្ត្រីហ្វីលីពីន។
ទោះជាយ៉ាងណា សមាជិកអាស៊ាន ៤ប្រទេសទៀត មិនឯកភាពនោះឡើងចំពោះការលុបចោលពាក្យ “ការកាន់កាប់ដី និងយោធាភាវូបនីយកម្ម” ដែលត្រូវបានគេដាក់បញ្ចូលក្នុងសេចក្ដីថ្លែងការណ៍កាលពីឆ្នាំមុននៅឯប្រទេសឡាវ ប៉ុន្តែ ពាក្យទាំងពីរនេះ មិនត្រូវបានគេដាក់បញ្ចូលឡើយនៅក្នុងសេចក្ដីព្រាងសេចក្ដីថ្លែងការណ៍ដំបូងនៅឆ្នាំនេះ ដែលត្រូវបានគេឃើញកាលពីថ្ងៃពុធកន្លងមកនេះ។
ចិនមិនមែនជាសមាជិកនៃសមាគមអាស៊ាននោះឡើយ ហើយនឹងមិនចូលរួមក្នុងជំនួបកំពូលមេដឹកនាំថ្នាក់តំបន់នេះឡើយ។ ក្រុមមន្ត្រីទូតចិននៅទីក្រុងម៉ានីល មិនអាចសុំការបកស្រាយបាននោះឡើយជុំវិញបញ្ហានេះ៕
