ឧត្ដមស្នងការអង្កការសហប្រជាជាតិទទួលបន្ទុកសិទ្ធិមនុស្ស OHCHR កាលពីថ្ងៃម្សិលមិញនេះ បានអំពាវនាវទៅអាជ្ញាធរកម្ពុជា ឲ្យដោះលែងសកម្មជនការពារសិទ្ធិមនុស្ស ៥រូប ដោយគ្មានការពន្យារពេល ក្រោយពីពួកគេជាប់ឃុំបណ្ដោះអាសន្នអស់រយៈពេល ១ឆ្នាំ។
មន្ត្រីការពារសិទ្ធិមនុស្សអាដហុក លោក យី សុខសាន្ត អ្នកស្រី លឹម មុន្នី លោក នី សុខា និងលោក ណៃ វង់ដា និងអគ្គលេខាធិការរង គ.ជ.ប. លោក នី ចរិយា ត្រូវបានសមត្ថកិច្ចចាប់ខ្លួនកាលពីថ្ងៃទី២៨ ខែមេសាឆ្នាំមុន ក្រោយពីត្រូវបានតុលាការចោទប្រកាន់ពីបទសូកប៉ាន់សាក្សី និងសមគំនិតក្នុងរឿងសូកប៉ាន់សាក្សី ពាក់ព័ន្ធនឹងមេដឹកនាំបក្សប្រឆាំង លោក កឹម សុខា ដែលត្រូវបានគេទម្លាយថា មានស្នេហាលួចលាក់ជាមួយនារីកាត់សក់ កញ្ញា ខុម ចាន់តារាទី ហៅស្រីមុំ។
គិតត្រឹមថ្ងៃម្សិលមិញនេះ ពួកគេត្រូវបានឃុំខ្លួនបណ្ដោះអាសន្នរង់ចាំសវនាការអស់រយៈពេលមួយឆ្នាំហើយ ប៉ុន្តែ សាលាដំបូងរាជធានីភ្នំពេញ បានសម្រេចឲ្យបន្តឃុំខ្លួនអ្នកទាំង ៥នាក់ រយៈពេល ៦ខែទៀត។
ក្នុងសេចក្ដីថ្លែងការណ៍កាលពីថ្ងៃម្សិលមិញនេះ អ្នកនាំពាក្យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស អ្នកស្រី អេលីហ្សាបេត ត្រូសសែល បានលើកឡើងថា OHCHR សោកស្ដាយចំពោះការបន្តឃុំខ្លួនអ្នកទាំង ៥ បើទោះបីជាក្រុមការងារអង្កការសហប្រជាជាតិ បានចាត់ទុកថា ការឃុំខ្លួនសកម្មជនការពារសិទ្ធិមនុស្សទាំង ៥រូបនេះ ត្រូវបានធ្វើឡើងដោយបំពានក្ដី។
អ្នកស្រីបានអំពាវនាវទៅអាជ្ញាធរកម្ពុជា ឲ្យដោះលែងពួកគេដោយគ្មានការពន្យាពេល ដោយថា ការបន្តឃុំខ្លួនអ្នកទាំង ៥រូប គួរធ្វើឡើងក្នុងរយៈពេលខ្លីប៉ុណ្ណោះ ដោយផ្អែកតាមភស្តុតាងច្បាស់លាស់ និងសម្អាងផ្លូវច្បាប់ត្រឹមត្រូវ៕
