ប្រទេសចិន នៅថ្ងៃនេះ បានជំរុញទៅកូរ៉េខាងជើង ឲ្យគោរពទៅតាមសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ និងបញ្ឈប់ទង្វើទាំងឡាយណា ដែលអាចធ្វើឲ្យភាពតានតឹងនៅលើឧបទ្វីបកូរ៉េកាន់តែអាក្រក់ឡើង បន្ទាប់ពីរដ្ឋឯកោមួយនេះ បានបាញ់សាកល្បងគ្រាប់មីស៊ីលជាថ្មីម្ដងទៀត។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដោយបានស្រង់សេចក្ដីថ្លែងការណ៍របស់ក្រសួងការបរទេសចិន។
ក្នុងសេចក្ដីថ្លែងការណ៍នោះ ក្រសួងការបរទេសចិន បានលើកឡើងថា ចិនក៏សង្ឃឹមថា គ្រប់ភាគីទាំងអស់អាចធ្វើសកម្មភាពដោយប្រយ័ត្នប្រយែង ដើម្បីបង្ការស្ថានការណ៍កុំឲ្យរីកធំឡើង។
ចិនបានលើកឡើងដូច្នេះ បន្ទាប់ពីកូរ៉េខាងជើងបានធ្វើតេស្តគ្រាប់មីស៊ីលអន្តរទ្វីបជាថ្មីកាលពីយប់មិញនេះ ក្រោមការត្រួតពិនិត្យដោយផ្ទាល់ពីមេដឹកនាំកូរ៉េខាងជើង លោក គីម ជុងអ៊ុន។
ក្រៅប្រតិកម្មរបស់ចិន កូរ៉េខាងត្បូងបានដាក់ពង្រាយខែលការពារមីស៊ីលបន្ថែមទៀត ខណៈមេដឹកនាំជប៉ុនវិញ បានប្រាប់ទៅសហគមន៍អន្តរជាតិ ឲ្យបង្កើនសម្ពាធលើរបបក្រុងព្យុងយ៉ាង។ ចំណែកឯអាមេរិកវិញ បានព្រមានថា កូរ៉េខាងជើងកំពុងតែធ្វើសកម្មភាពគឃ្លើន និងប្រកបដោយគ្រោះថ្នាក់។
ទោះជាយ៉ាងណា វាដូចរាល់ដងអញ្ចឹង បណ្ដាប្រទេសទាំងនេះ សុទ្ធតែបញ្ចេញប្រតិកម្មរៀងៗខ្លួន ក្រោយពីកូរ៉េខាងជើងបាញ់សាកល្បងគ្រាប់មីស៊ីលម្ដងៗ៕