កូរ៉េខាងជើង បាននិយាយនៅថ្ងៃនេះថា ខ្លួនបានធ្វើតេស្តដោយជោគជ័យនូវគ្រាប់មីស៊ីលឆ្លងទ្វីប ដែលមានសមត្ថភាពវាយប្រហារដល់ទឹកដីអាមេរិកដីគោក ដែលការធ្វើតេស្តនេះ នាំឲ្យមានការព្រមានយ៉ាងស្រួចស្រាវពីប្រធានាធិបតីអាមេរិក និងបង្កឲ្យចិនខឹងសម្បារ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ទីភ្នាក់ងារព័ត៌មានរដ្ឋកូរ៉េខាងជើង KCNA បាននិយាយថា មេដឹកនាំកូរ៉េខាងជើង លោក គីម ជុងអ៊ុន បានចេញទៅពិនិត្យមើលការបាញ់សាកល្បងគ្រាប់មីស៊ីលនោះទាំងកណ្ដាលយប់មិញនេះ ហើយនិយាយថា នេះគឺជា “ការព្រមានធ្ងន់ធ្ងរ”សម្រាប់អាមេរិកថា អាមេរិកនឹងមិនជៀសផុតពីមហន្តរាយនោះឡើយ ប្រសិនបើខ្លួនព្យាយាមវាយប្រហារ។
ទូរទស្សន៍រដ្ឋកូរ៉េខាងជើង បានផ្សព្វផ្សាយរូបភាពនៃការបាញ់គ្រាប់មីស៊ីលនោះ ដោយបង្ហាញនូវមីស៊ីលហោះចេញជាមួយភ្លើងភ្លឺចិញ្ចាចនៅកណ្ដាលស្បៃរាត្រីងងឹត ហើយបង្ហាញរូបភាពលោក គីម ទះដៃអបអរជាមួយជំនួយការយោធា។
KCNA បានផ្សាយថា ការបាញ់សាកល្បងនោះ បញ្ជាក់យ៉ាងច្បាស់អំពីទំនុកចិត្តនៃប្រព័ន្ធ ICBM បង្ហាញពីសមត្ថភាពនៃការវាយប្រហាររបស់ ICBM ទៅលើតំបន់ និងទីកន្លែងណាមួយនៅពេលណាមួយ និងបង្ហាញឲ្យឃើញច្បាស់ថា ដីគោកអាមេរិកទាំងមូល ស្ថិតនៅក្នុងរយៈចម្ងាយដែលគ្រាប់មីស៊ីលកូរ៉េខាងជើងអាចរត់ទៅដល់៕
