តម្រួតថៃនៅថ្ងៃចន្ទនេះ បានបញ្ចេញអត្តសញ្ញាណជនសង្ស័យទីបី ដែលពាក់ព័ន្ធនឹងការបំផ្ទុះគ្រាប់បែកនៅតាមបណ្ដាខេត្តនានានៅភាគខាងត្បូងប្រទេសថៃនៅខែនេះ ដែលបានសម្លាប់មនុស្ស៤នាក់ ហើយបានភ្ជាប់ជាលើកដំបូងការវាយប្រហារទាំងនោះ ទៅនឹងពួកបំបែកខ្លួនមូស្លីមប្រតិបត្តិការនៅភាគខាងត្បូង។ នេះដោយយោងតាមទីភ្នាក់ងារព័ត៌មាន Reuters។
Reuters បានផ្សាយថា ឧស្សាហកម្មទេសចរណ៍ថៃបានរងផលប៉ះពាល់យ៉ាងធំដោយសារតែអំពើហិង្សាបង្កឡើងដោយពួកបះបោរនៅភាគខាងត្បូង ហើយអាជ្ញាធរថៃដំបូងឡើយបានទាត់ចោលទំនាក់ទំនងនៃការបំផ្ទុះគ្រាប់បែកកាលពីថ្ងៃទី១១និង១២ ខែសីហានិងក្រុមបំបែកខ្លួន។
ប៉ុន្តែតម្រួតថៃដែលបានចេញដីកាចាប់ខ្លួនជនសង្ស័យទីបីនៅថ្ងៃនេះបាននិយាយថា ជនសង្ស័យទាំង៣នេះ មានទំនាក់ទំនងទៅនឹងការបំផ្ទុះគ្រាប់បែកនានាដែលរៀបចំដោយពួកបះបោរមូស្លីម។
មនុស្ស៤នាក់ត្រូវបានសម្លាប់នៅក្នុងការបំផ្ទុះគ្រាប់បែកនៅតាមបណ្ដាតំបន់ទេសចរណ៍នានានៅភាគខាងត្បូងប្រទេសថៃនៅក្នុងខែនេះ ហើយមនុស្សជាច្រើននាក់ទៀតបានរងរបួស ក្នុងនោះមានជនបរទេសផងដែរ។
អាជ្ញាធរបានបង្ហាញតម្រុយថា ក្រុមអ្នកគាំទ្រអតីតនាយករដ្ឋមន្ត្រី ថាក់ស៊ីន ស៊ីណាវ៉ាត់ អាចជាអ្នកទទួលខុសត្រូវលើការវាយប្រហារនោះ ប៉ុន្តែលោក ថាក់ស៊ីន បានបដិសេធ។
ខេត្តផាត់តានី យ៉ាងឡា និងណារ៉ាធីវ៉ាត់ នៅភាគខាងត្បូងប្រទេសថៃ គឺជាតំបន់សម្បូរជនមូស្លីមដែលបះបោរប្រឆាំងនឹងរដ្ឋាភិបាលកណ្ដាលចាប់តាំងពីឆ្នាំ២០០៤មក។
យោងតាមក្រុមឃ្លាំមើលភាគខាងត្បូងថៃបានឲ្យដឹងថា មនុស្សជាង៦៥០០នាក់ត្រូវបានសម្លាប់នៅក្នុងតំបន់សម្បូរជនមូស្លីមនេះនៅក្នុងហេតុការណ៍បំផ្ទុះគ្រាប់បែកនិងការបាញ់ប្រហារដែលបានកើតឡើងរាល់ថ្ងៃ៕
