ពលរដ្ឋថៃចំនួន ១ម៉ឺននាក់ នឹងត្រូវបានអនុញ្ញាតឲ្យចូលថ្វាយបង្គំសពព្រះមហាក្សត្រថៃ ភូមិបុល អាដុលយ៉ាតេជ នៅអាសនៈដម្កល់សពនៅប្រាសាទតុសិត នៅរៀងរាល់ថ្ងៃ។ នេះដោយយោងតាមសេចក្ដីប្រកាសរបស់រាជវាំងថៃ ដែលត្រូវបានកាសែតបាងកក ប៉ុស្តិ៍ដកស្រង់យកមកចុះផ្សាយ។
ស្ដេច ភូមិបុល អាដុលយ៉ាតេជ បានសោយទិវង្គតកាលពីថ្ងៃទី១៣ ខែតុលាកន្លងមកនេះ ដែលជំរុញឲ្យពលរដ្ឋថៃរាប់ម៉ឺននាក់ ប្រមូលម្ដុំគ្នាកាន់ទុក្ខនៅមុខរាជវាំងថៃ។
ប៉ុន្តែ កាសែតបាងកក ប៉ុស្តិ៍ បានផ្សាយថា នេះជាលើកដំបូងហើយ ដែលមហាជន ត្រូវបានបើកឲ្យចូលថ្វាយបង្គំសពក្សត្រ ភូមិបុល នៅក្នុងមហាប្រាសាទតុសិត ចាប់តាំងពីការសោយទិវង្គតរបស់ក្សត្រអង្គនេះ។
កាសែតថៃមួយនេះ បន្តថា ប្រជាជនថៃរាប់ម៉ឺននាក់ ស្ថិតក្នុងសម្លៀកបំពាក់ខ្មៅ នៅតែបន្តបោះជំរុំនៅជុំវិញបរិវេណរាជវាំងថៃ ដើម្បីបង្ហាញមរណទុក្ខចំពោះក្សត្រ ភូមិបុល ដែលជានិមិត្តរូបនៃឯកភាពជាតិថៃ នៅក្នុងរយៈពេល ៧០ឆ្នាំចុងនេះ៕