អាជ្ញាធរកម្ពុជាបានឲ្យដឹងថា ជនជាតិចិនចំនួន ៦១នាក់ទៀតត្រូវបានឃាត់ខ្លួន និងបណ្ដេញចេញពីកម្ពុជា ដោយសារពាក់ព័ន្ធនឹងករណីឆរបោក គំរាមកំហែង ជម្រិតទាប្រាក់តាមអ៊ីនធើណែត។
អគ្គស្នងការនគរបាលជាតិ បានឲ្យនៅគេហទំព័ររបស់ខ្លួនថា កាលពីព្រឹកថ្ងៃទី២៨ ខែ តុលានេះជនជាតិចិន ៦១ នាក់ទៀត ត្រូវបានបណ្ដេញចេញពីកម្ពុជាតាមរយៈយន្តហោះពិសេសមួយគ្រឿងរបស់សន្តិសុខជាតិនៃសាធារណៈរដ្ឋប្រជាមានិតចិនមកទទួល។
អគ្គស្នងការនគរបាលជាតិបានបន្តឲ្យដឹងថា ជនជាតិចិនទាំងនោះត្រូវបានបង្ក្រាប និងឃាត់ខ្លួននៅចន្លោះថ្ងៃទី១៧-២១ ខែតុលា នៅក្នុងរាជធានីភ្នំពេញ ខេត្តកណ្តាល និងខេត្តព្រះសីហនុ ដោយជាប់ពាក់ព័ន្ធករណីឆរបោក គំរាមកំហែង ជំរិតទារប្រាក់តាមប្រព័ន្ធបច្ចេកទេសវិទ្យា(VOIP)។
អគ្គស្នងការនគរបាលជាតិបានបន្តថា ចាប់ពីឆ្នាំ២០១៤មក អគ្គនាយដ្ឋានអន្តោប្រវេសន៍បានបង្ក្រាបករណីឆរបោក គំរាមកំហែង ជំរិតទារប្រាក់តាមប្រព័ន្ធបច្ចេកវិទ្យា(VOIP) ១៥លើក ឃាត់ជនសង្ស័យជាជនបរទេសបាន ១១៨៧ នាក់ ក្នុងនោះមានស្រី ២៤២នាក់។
យ៉ាងណាចាប់ពីដើមឆ្នាំ២០១៧ រហូតដល់ខែតុលានេះ អគ្គនាយកដ្ឋានអន្តោប្រវេសន៍ បង្ក្រាបករណីឆរបោក គំរាម កំហែង ជំរិតទារប្រាក់តាមប្រព័ន្ធបច្ចេកវិទ្យា (VOIP) បាន ៥លើក ដោយឃាត់ជនសង្ស័យជាជនជាតិចិនបាន ៤០៧ ក្នុងនោះស្រី ៧៦នាក់៕
