ពលរដ្ឋនៅសហគមន៍ចំនួនពីរខាងក្រោយសាលាតិចណូ ស្នើឲ្យរដ្ឋាករទឹកក្រុងភ្នំពេញឲ្យជួយអន្តរាគមន៍ក្នុងការទូរទាត់តម្លៃនៃការប្រើប្រាស់ទឹកដែលពួកគេថាកើនលើសពីតម្លៃនៃការប្រើប្រាស់ធម្មតាមួយទ្វេរពីរ។
ពលរដ្ឋជិត២០នាក់ដែលតំណាងឲ្យជិត៥០គ្រួសានៅភូមិ១៥និង១៦ ក្នុងសង្កាត់ទឹកល្អក់១ បាននាំគ្នាមកដាក់ញ្ញាត្តិនៅរដ្ឋាករទឹកភ្នំពេញ បន្ទាប់ពីពូកគេថាវិក័យប័ត្រទឹកសម្រាប់ពីរខែចុងឆ្នាំ២០១៦ មានភាពមិនប្រក្រតី ដោយសារមានការកើនតម្លៃលើសពីការប្រើប្រាស់ខែមុនៗ ពី២០០ទៅ៣០០ភាគរយ។
តំណាងពលរដ្ឋដែលបានមកដាក់ញ្ញាត្តិ អ្នកស្រី ទិត សៀប បានឲ្យអ្នកសារព័ត៌មានដឹងថាក្នុងរយៈពេល១០ខែឆ្នាំ២០១៦តម្លៃនៃការប្រើប្រាស់ទឹករបស់គ្រួសារអ្នកស្រីគឺធម្មតាទេចន្លោះពី៣០ម៉ែត្រគូប ទៅ៤០ម៉ែត្រគូប តែរយៈពេល២ខែចុងឆ្នាំការប្រើប្រាស់ទឹករបស់គ្រួសារអ្នកស្រីកើនដល់ជាង១០០ម៉ែត្រគូប ដែលអ្នកស្រីថានេះជាភាពមិនប្រក្រតីមួយដែលមិនអាចទទួលយកបាន។
អ្នកស្រីថា៖ «ពលរដ្ឋផ្សេងទៀតគាត់រៀបរាប់ថាគ្រួសាររបស់គាត់ហ្នឹងគាត់បរិមាណនៃការប្រើប្រាស់របស់គាត់ហ្នឹងតែ៣ម៉ឺនទៅបួនម៉ឹនអញ្ចឹង តែខ្លះឡើងដល់៣០ម៉ឺន តែខាងរដ្ឋាករគាត់បន្ទោសបុគ្គលិកថាបុគ្គលិកគាត់អ្នកកត់លេខសល់ពីខែមុនពីឆ្នាំមុនអីអញ្ចឹង។ ហើយយកមកបូកជាមួយខែ១១ ១២នេះ តែរបស់ខ្ញុំអត់មានខុសទេទាំងលេខអាន និងលេខក្រដាសគាត់សរសេរត្រូវគ្នាទាំងអស់ ពលរដ្ឋអ្នកអាចទទួលយកបានទេ! ហើយថ្ងៃស្អែកប្រជុំទៅអត់មានប្រសិទ្ធភាពពួកខ្ញុំប្រហែលឡើងដល់សម្តេច ហ៊ុន សែន ហើយ»។
តំណាងពលរដ្ឋម្នាក់ទៀតលោក ភឿង ពិសី បានឲ្យដឹងថាពលរដ្ឋដែលរងផលប៉ះពាល់ទាំងអស់នោះគឺមិនព្រមបង់ប្រាក់តាមវិក័យប័ត្រនេះទេ ក៏ព្រោះតែតម្លៃហួសពីអ្វីដែលពួកគេអាចទទួលយកបាន។ លោកថាពលរដ្ឋធ្លាប់ឡើងតវ៉ាពីរដងរួចមកហើយតែរដ្ឋាករទឹកហាក់ដូចជាគ្មានដំណោះស្រាយសម្រាប់ពួកគេនោះទេ។
លោក ពិសី៖ «បើគិតជាលុយចំពោះខែមុនៗ ខ្ញុំប្រើអស់តែ១១ម៉ឺនប្រាំរយទេ តែដល់ខែ១១ និង១២នេះខ្ញុំចំណាយដល់ទៅ២២ម៉ឺនបួនពាន់ប្រាំបីរយហាសិប គឺទ្វេរដង។ ហើយមានអ្នកខ្លះមិនត្រឹមតែទ្វេដងទេគឺមួយគុណជាបីគុណជាបួនហ្នឹងផ្ទះអ្នកផ្សេងទៀត! ហើយការឡើងមកតវ៉ានៅថ្ងៃនេះគឺដើម្បីភាពត្រឹមត្រូវមួយសម្រាប់សហគមន៍ខ្ញុំទាំងអស់គ្នា»។
អគ្គនាយិការងរដ្ឋាករទឹកភ្នំពេញលោកស្រី ងិន ចន្ទ្រា បានបកស្រាយថា មូលហេតុដែលមានការគិតតម្លៃពីរខែចុងឆ្នាំកើនច្រើនខុសពីធម្មតានោះ មកពីការសរុបប្រចាំឆ្នាំដោយប្រព័ន្ធថ្មីរបស់រដ្ឋាករទឹករកឃើញថាមានភាពមិនប្រក្រតីនៃកុងទ័រទឹកហើយភាពមិនប្រក្រតីនេះកើតឡើងដោយសារតែកំហុសរបស់មន្ត្រីចុះមើលលេខនាឡិកាទឹក។ ទោះជាយ៉ាងណាលោកស្រីទទួលកំហុសនេះ ដោយរដ្ឋាករទឹកក៏បានសម្រេចឲ្យគ្រួសារដែលរងផលប៉ះពាល់ទាំងនោះបង់រំលោះទៅលើប្រាក់ទូទាត់នេះ ហើយរដ្ឋាករទឹកនឹងគិតតម្លៃជាមធ្យមនៃការប្រើប្រាស់ជូនពួកគេ។
លោកស្រីថា៖ «នេះជាកំហុសរបស់ពួកខ្ញុំ ហើយពួកខ្ញុំនឹងធ្វើតាមអ្វីដែលជាការសំណូមពរ។ តាមពិតសំណូមពររបស់ពួកគាត់គាត់មានរូបមន្តហើយអស់ហើយ យើងត្រូវតែដកអ្វីដែលគាត់ប្រើប្រាស់ចូលទៅក្នុងកំរិតពីរ។ … នេះព្រោះតែបញ្ហាដែលគាត់(អ្នកចុះមើលកុងទ័រ)មិនអាន! ដល់ពេលមិនអានគាត់ប៉ានស្មានៗយក។ ឧទាហរណ៍ផ្ទះមួយមិញពីរខែអស់តែ៣០ម៉ែត្រគូបទេ មួយខែគាត់ប្រើតែ១៥ម៉ែត្រគូបទេ តែគាត់(អ្នកចុះមើលកុងទ័រ) ស្មានប៉ុនហ្នឹងរហូត តែការពិតគាត់ប្រើដល់៤០ម៉ែត្រគូប មិនសល់ដប់ម៉ែត្រគូបដល់គាត់ចេះតែស្មានៗ អាដប់ម៉ែត្រមួយវគ្គៗទៅវាចូលដល់រយម៉ែត្រគូបហើយ ធ្វើឲ្យកំរិតនៃការទូរទាត់របស់គាត់វាចូលដល់កំរិតពីរនិងកំរិតបីវាថ្លៃ»។
បើតាមលោកស្រី ចន្ទ្រា មន្ត្រីដែលចុះទៅមើលនាឡិកាទឹកដែលធ្វេសប្រហែសនោះនឹងត្រូវចូលខ្លួនទៅទទួលកំហុសនៅចំពោះមុខក្រុមប្រឹក្សាវិន័យ ដែលអាចនឹងត្រូវបណ្តេញចេញពីការងារផង។
ទោះជាយ៉ាងណាពលរដ្ឋដែលតវ៉ានៅថ្ងៃនេះមួយចំនួននៅតែទទួចឲ្យរដ្ឋាករទឹកទម្លាក់ចោលតម្លៃដែលពួកគេថាបានបង់លើសនេះ ដោយព្រមានពីការតវ៉ាជាថ្មីទៀតបើសិនជាមិនមានដំណោះស្រាយណាសមរម្យសម្រាប់ពួកគេ៕