អ្នកវិភាគបញ្ហាសង្គម បានលើកឡើងប្រហាក់ប្រហែលគ្នាថា ការដែលគណបក្សសិទ្ធិមនុស្សប្រកាសរំលាយខ្លួនឯងកាលពីពេលថ្មីៗនេះ អាចជាព្រួញមុខពីរ។
គណបក្សសិទ្ធិមនុស្ស កាលពីថ្ងៃទី២៨ ខែមករា បានផ្ញើលិខិតមួយប្រាប់ទៅក្រសួងមហាផ្ទៃថា ខ្លួនសម្រេចរំលាយខ្លួនឯងចេញពីឆាកនយោបាយចាប់ពីថ្ងៃជូនដំណឹងទៅហើយ។
ការប្រកាសរំលាយខ្លួនរបស់គណបក្សមួយនេះ ធ្វើឡើងចំពេលអតីតមេដឹកនាំបក្សប្រឆាំង លោក សម រង្ស៊ី ដែលកំពុងរស់នៅនិរទេសខ្លួនឯងនៅឯក្រៅប្រទេសនោះ បានប្រកាសបង្កើតចលនាសង្គ្រោះជាតិ ទាំងគ្មានការយល់ព្រមពីលោក កឹម សុខា ដែលកំពុងជាប់ឃុំ ក្រោយពីការរំលាយគណបក្សសង្គ្រោះជាតិមុនការបោះឆ្នោតពីសំណាក់តុលាការកំពូល តាមបណ្តឹងរបស់បក្សកាន់អំណាចជាដើម។
អ្នកឃ្លាំមើលពីការអភិវឌ្ឍសង្គម លោក ប៊ួ បញ្ញា វិភាគថា ការប្រកាសរំលាយរបស់គណបក្សសិទ្ធិមនុស្ស អាចជាសារប្រាប់ទៅអ្នកគាំទ្រថា បើទោះបីជាមេដឹកនាំពេលនេះ មានការខ្វែងគំនិតគ្នាខ្លះក៏ដោយ ប៉ុន្តែ ពួកគេនឹងមិនបែកបាក់គ្នាទេ។
លោក ប៊ូ បញ្ញា វិភាគទៀតថា កត្តាទី២ អាចជាយុទ្ធសាស្ត្ររុញទូកបណ្តោយទឹក ចង់ដាក់សម្ពាធនទៅដៃគូប្រកួត តាមរយៈស្វែងរកជំនួយពីសហគមន៍អន្តរជាតិ ឲ្យចាប់អារម្មណ៍កាន់តែខ្លាំងពីបញ្ហានយោបាយដែលកំពុងកើតមាននៅកម្ពុជា។
លោកថា៖«រុញទូកបណ្តោយទឹកនេះ មានន័យថា រុញស្ថានការណ៍ហ្នឹងឲ្យទៅមុខ ទៅតាមអ្វីដែលគណបក្សប្រជាជនកម្ពុជាចង់បាន មានន័យថា រលាយអស់ហើយ ឲ្យអន្តរជាតិមើលឃើញថា គណបក្សប្រឆាំងក្លាយជាអ្នករងគ្រោះកាន់តែខ្លាំង ហើយអាចនឹងដាក់សម្ពាធណាមួយកាន់តែខ្លាំងទៅថ្ងៃអនាគត ពីព្រោះគណបក្សប្រឆាំងលែងមាននរណាចូលរួមបានហើយ ព្រោះរំលាយគណបក្សសិទ្ធិមនុស្សចោលហើយហ្នឹង»។
គណបក្សសិទ្ធិមនុស្ស ត្រូវបានបង្កើតឡើងដោយលោក កឹម សុខា កាលពី ១១ឆ្នាំមុន ហើយបានឈ្នះបានអាសនៈចំនួន ៣នៅក្នុងការបោះឆ្នោតជាតិឆ្នាំ២០០៨ និងអាសនៈជាច្រើនទៀតនៅក្នុងការបោះឆ្នោតក្រុមប្រឹក្សាឃុំសង្កាត់នៅឆ្នាំ២០១២ មុននឹងគណបក្សនេះប្របាច់បញ្ចូលគ្នាជាមួយគណបក្ស សម រង្ស៊ី បង្កើតបានជាគណបក្សសង្គ្រោះជាតិ នៅឆ្នាំ២០១២។
អ្នកវិភាគនយោបាយ លោកបណ្ឌិត មាស នី វិភាគថា ការប្រកាសរំលាយនេះ អាចជាយុទ្ធសាស្ត្រ មិនចង់ឲ្យដៃគូប្រកួតយកបញ្ហានៃការចាប់ឃុំខ្លួនលោក កឹម សុខា ទៅរំលាយគណបក្សសិទ្ធិមនុស្សទៅថ្ងៃអនាគត ដូចករណីរំលាយគណបក្សសង្គ្រោះជាតិ និងថា មួយវិញទៀត អាចជាសារប្រាប់ថា ពួកគេនឹងមិនវិលទៅរកទ្រនុំចាស់រៀងៗខ្លួននោះឡើយ។
លោកថា៖ «ខ្ញុំមើលទៅអ្នកទាំងពីរហ្នឹង ហាក់កំពុងតែលេងល្បែងជាមួយគ្នា។ ចំណែកគណបក្សប្រជាជនកម្ពុជា ក៏ដូចជាមិនស្រួលចិត្តប៉ុន្មានទេ ក្នុងការតាមដានមើលការវិវឌ្ឍនយោបាយ ពិសេសការប្រែប្រួលរបស់គណបក្សសង្គ្រោះជាតិនោះបាទ»។
សាស្ត្រាចារ្យវិទ្យាសាស្ត្រនយោបាយ លោក សូ ចន្ថា វិភាគប្រហាក់ប្រហែលថា ការប្រកាសរំលាយទ្រនុំចាស់ចោលនេះ អាចផ្តល់ទំនុកចិត្តឡើងវិញដល់អ្នកគាំទ្រថា បក្សប្រឆាំងបើទោះបីពួកគេជួបព្យុះភ្លៀងក៏ដោយ ក៏ពួកគេមិនបែកបាក់គ្នាទេ។
សាស្ត្រាចារ្យវិទ្យាសាស្ត្រនយោបាយរូបនេះ ពន្យល់ថា បើទោះបីជាពេលនេះ អ្នកនយោបាយកំពុងប្រើល្បិតស្នៀត យកឈ្នះគ្នាតែរៀងៗខ្លួនក៏ដោយ ប៉ុន្តែថា អ្វីដែលនាំនាវាកម្ពុជាទៅរកភាពរីកចម្រើនដ៏ពិតប្រាកដមួយ គឺការស្វែងរកដំណោះស្រាយឈានទៅធានាការបោះឆ្នោតមួយដោយត្រឹមត្រូវ និងយុត្តិធម៌ ឈរលើស្មាតីបង្រួបបង្រួមជាតិ។
លោកថា៖ «បើសិនជាមានការសម្របសម្រួលនយោបាយ ដើម្បីឈានទៅដល់ការបង្រួបបង្រួមជាតិនោះ ខ្ញុំគិតថា អាហ្នឹងអាចមានការអនុញ្ញាតិឲ្យមានការចូលរួមការបោះឆ្នោត និងអាចធ្វើឲ្យសង្គ្រោះជាតិរស់ឡើងវិញនោះ។ ប៉ុន្តែ បើសិនជាគ្មានការសម្របសម្រួលនយោបាយទេ ខ្ញុំគិតថា នឹងគ្មានអ្វីកើតឡើងទេ។ អ្វីដែលខ្ញុំសង្ឃឹមនោះ គឺចង់ឃើញដំណើរការប្រកួតប្រជែងនៅកម្ពុជានោះ ដោយប្រក្រតីភាព មិនចង់ឃើញខ្មែរចាត់ទុកគ្នាជាសត្រូវ ហើយកម្ទេចគ្នាទៅវិញទៅមកនោះទេ»។
យ៉ាងណាក៏ដោយ គណបក្សសិទ្ធិមនុស្សបញ្ជាក់ថា ការប្រកាសរំលាយនេះ មានសារ ៣សំខាន់ គឺដើម្បីបញ្ជាក់ពីជំហរនៃការរួបរួមក្រោមស្លាកកគណបក្សសង្រ្គោះជាតិតែមួយ មិនមានការបែកបាក់របស់អ្នកប្រជាធិបតេយ្យ និងមិនធ្វើតាមអ្វីដែលគូប្រកួតចង់ឲ្យដើរ ក្រោយពីការរំលាយគណបក្សសង្រ្គោះជាតិ និងទី៣ គឺគោរពឆន្ទ:ម្ចាស់ឆ្នោតជាង ៣លាននាក់៕