ប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ កាលពីថ្ងៃម្សិលមិញនេះ បានជំរុញទៅអាមេរិកឲ្យបង្ហាញភាពអត់ធ្មត់ ក្រោយពីការបាញ់សាកល្បងគ្រាប់មីស៊ីលជាថ្មីម្ដងទៀតរបស់កូរ៉េខាងជើង និងជំរុញកុំឲ្យប្រលែងលេងជាមួយមេដឹកនាំកូរ៉េខាងជើង លោក គីម ជុងអ៊ុន ដែលចង់បញ្ចប់ពិភពលោក។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
មេដឹកនាំមាត់ដាចរូបនេះ បាននិយាយថា តំបន់អាស៊ីអាគ្នេយ៍ មានក្ដីបារម្ភខ្លាំងចំពោះភាពតានតឹងរវាងអាមេរិក និងកូរ៉េខាងជើង ហើយលោកថា ការដើរខុសមួយជំហ៊ាន នឹងក្លាយទៅជាមហន្តរាយ ហើយតំបន់អាស៊ីនឹងក្លាយទៅជាជនរងគ្រោះមុនគេនៅក្នុងសង្គ្រាមនុយក្លេអ៊ែរ។
លោក ឌូទើតេ បន្ថែមថា អាមេរិក ជប៉ុន កូរ៉េខាងត្បូង និងចិន កំពុងតែឈ្លោះគ្នាជាមួយបុរសម្នាក់ ដែលរីករាយនឹងការបាញ់គ្រាប់មីស៊ីល។
លោក ឌូទើតេ បច្ចុប្បន្ននេះ គឺជាប្រធានប្ដូរវេនរបស់អាស៊ាន ហើយត្រូវជជែកគ្នាតាមទូរស័ព្ទជាមួយប្រធានាធិបតីអាមេរិក លោក ដូណាល់ ត្រាំ នៅល្ងាចថ្ងៃសៅរ៍ម្សិលមិញនេះ។ លោកនិយាយថា លោកនឹងជំរុញលោក ត្រាំ មិនឲ្យប្រឈមមុខជាមួយលោក គីម ជុងអ៊ុន នោះឡើយ៕