អង្គការអន្តរជាតិមួយ បានចេញរបាយការណ៍ ដោយចោទប្រកាន់មេដឹកនាំបក្សកាន់អំណាច លោក ហ៊ុន សែន ថាកំពុងយកប្រព័ន្ធយុត្តិធម៌ធ្វើយុទ្ធនាការជាប្រព័ន្ធកម្ចាត់អ្នករិះគន់។
អង្គការលើកលែងទោសអន្តរជាតិ (Amnesty International) បានចេញរបាយការណ៍ លើកឡើងថា បក្សកាន់អំណាច ហាក់បានប្រើវិធានការបំបាត់សិទ្ធិសេរីភាពបញ្ជេញមតិ ការជួបជុំដោយសន្តិវិធី បានកើតឡើងមុនការបោះឆ្នោតឆ្នាំ២០១៧ និង២០១៨។
របាយការណ៍ដដែលនេះបានលើកឡើងទៀតថា អាជ្ញាធរវិញ បានប្រើប្រព័ន្ធយុត្តិធម៌កាន់តែខ្លាំង ហើយកម្លាំងសន្តិសុខ ឲ្យនៅតែបន្តយាយី និងធ្វើទារុណកម្មលើសង្គមស៊ីវិល និងបំបិតសំឡេងរិះគន់។ អ្នកការពារសិទ្ធិមនុស្សត្រូវបានចាប់និងឃុំខ្លួន អ្នកនយោបាយ បក្សប្រឆាំង ត្រូវក្លាយជាមុខសញ្ញា ចោទប្រកាន់ឃុំខ្លួនដ៏យូរ និងថាអ្នកដែលហ៊ានចេញមុខនិយាយរឿងនយោបាយត្រូវបានសម្លាប់ ហើយអ្នកប្រព្រឹត្តបទល្មើសនៅតែគ្មានទោស។
អង្គការលើកលែងទោសអន្តរជាតិមួយនេះ បានចាត់ទុកថា ការឃុំខ្លួនសកម្មជនតំបន់បឹងកក់ អ្នកស្រី ទេព វន្នី ការចាប់ខ្លួនមន្ត្រីអាដហុក និងមន្ត្រី គ.ជ.ប សកម្មជនបក្សប្រឆាំង និងការយាយីអតីតមេដឹកនាំបក្សប្រឆាំង លោក សម រង្ស៊ី ជាដើមថា រដ្ឋាភិបាលរបស់លោក ហ៊ុន សែន «ហាក់បីដូចជាបានចាប់ផ្តើមធ្វើយុទ្ធនាការជាប្រព័ន្ធមួយ ដើម្បីកម្ចាត់អ្នកដែលហ៊ានរិះគន់ តាមរយៈសំណុំរឿងព្រហ្មទណ្ឌគ្មានហេតុផល និងប្រឌិត»។
អ្ននាំពាក្យគណបក្សប្រជាជនកម្ពុជា លោក សួស យ៉ារ៉ា បានច្រានចោលរបាយការណ៍នេះ ដោយលោកចាត់ទុក អង្គការអន្តរជាតិមួយនេះថាកំពុងព្យាយាមបំភ្លៃការពិតនៅកម្ពុជា។
លោកថា៖ «យើងបានគិតហើយថា នេះជានយោបាយបំភ្លើស បំភ្លៃ បំផ្លែង និងបំភ័ន្តព័ត៌មានសាធារណមតិ។ ព្រោះអ្វីដែលយើងធ្វើ គឺធ្វើនៅលើក្របខណ្ឌច្បាប់ របស់ជាតិ។ អញ្ចឹងបញ្ហានេះ គណបក្សរបស់យើងកាន់អំណាច យើងមិនបានលូកលាន់ទៅលើប្រព័ន្ធយុត្តិធម៌នូវអ្វីដែលគេមានទេ។ តែប្រព័ន្ធយុត្តិធម៌គេអនុវត្តនយោបាយអនុវត្តច្បាប់គឺជារឿងកសាងនីតិរដ្ឋ។ អញ្ចឹងអ្វីដែលអង្គការអន្តរជាតិនៅខាងក្រៅធ្វើហ្នឹង គឺបានព្យាយាមលូកលាន់អធិបតេយ្យភាព របស់ខ្មែរយើង តែប៉ុណ្ណឹង»។
ប៉ុន្តែប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត យល់ថាការលើកឡើងរបស់អង្គការអន្តរជាតិមួយនេះពិតជាបានឆ្លុះបញ្ចាំងពីស្ថានការណ៍ពិតដែលកំពុងកើតមាននៅកម្ពជា។ លោកជំរុញឲ្យមន្ត្រីរដ្ឋាភិបាលគួរតែរៀនទទួលយកការពិតទៅធ្វើកំណែទម្រង់ ជាជាងប្រតិកម្មដោយការពារភាពអសកម្ម ហើយទុកបញ្ហាឲ្យនៅបន្តរីកធំក្នុងសង្គម។
លោកថា៖ «រដ្ឋជាភាគីត្រូវតែមានកាតព្វកិច្ចអនុវត្តទៅតាមបទដ្ឋានអន្តរជាតិហ្នឹងឲ្យបាន និងស្របតាមរដ្ឋធម្មនុញ្ញ ដើម្បីធានានិងលើកកម្ពស់ក៏ដូចជាការគោរពសិទ្ធិមនុស្សនិងនីតិរដ្ឋនៅកម្ពុជា អាហ្នឹងបាន ប្រទេសយើងគេចផុតពីការរិះគន់»។
ទោះជាយ៉ាងណា អង្គការលើកលែងទោសអន្តរជាតិ បានផ្តល់អានុសាសន៍ឲ្យបក្សកាន់អំណាច ឈប់ប្រើប្រព័ន្ធយុត្តិធម៌ បង្ក្រាបសំឡេងរិះគន់ និងអំពាវឲ្យទម្លាក់ចោលបទចោទប្រកាន់ទៅលើកមន្ត្រីសិទ្ធិមនុស្ស សកម្មជនដីធ្លី និងមន្ត្រីបក្សប្រឆាំងដែលកំពុងជាប់ឃុំ និងត្រូវធានាថាតុលាការជាស្ថាប័នឯករាជ្យ៕
