មន្ត្រីជាន់ខ្ពស់និងជាអ្នកនាំពាក្យគណបក្សសង្គ្រោះជាតិ លោក យឹម សុវណ្ណ អះអាងថា លោកអាចបង្រៀនមេឃុំមកពីគ្រប់គណបក្សនយោបាយ ឲ្យចេះគ្រប់គ្រងលុយចំនួន៥០ម៉ឺនដុល្លារ ក្នុងការអភិវឌ្ឍមូលដ្ឋាន ជាលុយផ្តល់ពីថ្នាក់ជាតិប្រចាំឆ្នាំ។
លោក យឹម សុវណ្ណ សរសេរនៅលើហ្វេសប៊ុករបស់លោក កាលពីម្សិលមិញថា លោករៀនអនុបណ្ឌិតមកពីជប៉ុនធានា ក្នុងការបណ្តុះបណ្តាលឲ្យមេឃុំនិងចៅសង្កាត់គ្រប់គណបក្សនយោបាយ អាចមានសមត្ថភាពគ្រប់គ្រងលុយចំនួនកន្លះលានដុល្លារក្នុង១ឆ្នាំបាន។ លោកសរសេរថា៖ «បើអស់លោកបណ្ឌិតទាំងអស់នោះ អះអាងថាធ្វើមិនបាន ខ្ញុំ យឹម សុវណ្ណ អនុបណិ្ឌតដែលបានសិក្សានៅប្រទេសជប៉ុន ធានាថានឹងបណ្តុះបណ្តាលមេឃុំ និងចៅសង្កាត់ មកពីគ្រប់គណបក្សនយោបាយ អោយមានសមត្ថភាព គ្រប់គ្រងលុយ កន្លះលានដុល្លារក្នុងមួយឆ្នាំ អោយទាល់តែបាន។ បើ២៥ឆ្នាំហើយ នៅតែអះអាងថាធ្វើប៉ុណ្ណឹងមិនបានបងប្អូនគ្មាន ហេតុផលអី ដែលត្រូវបោះឆ្នោតអោយម្តងទៀតទេ»។
លោក យឹម សុវណ្ណ លើកឡើងបែបនេះ បន្ទាប់មន្ត្រីនៅរាជបណ្ឌិតសភាកម្ពុជាមួយក្រុម ភាគច្រើនជាបណ្ឌិត រួមទាំងលោកបណ្ឌិត សុខ ទូច ផង អះអាងថា គោលនយោបាយលុយកន្លះលានដុល្លាររបស់គណបក្សសង្គ្រោះជាតិមិនទាន់អាចអនុវត្តន៍បានទេ ព្រោះមេឃុំចៅសង្កាត់មួយចំនួនសមត្ថភាពនៅទាប៕
