សាស្ត្រាចារ្យវិទ្យាសាស្ត្រនយោបាយ លោកបណ្ឌិត សុខ ទូច ត្រូវបានតែងតាំងជាប្រធានរាជបណ្ឌិតសភាកម្ពុជា តែជាងមួយសប្ដាហ៍ប៉ុណ្ណោះ បន្ទាប់ពីលោកថ្លែងគាំទ្រសំណើធ្វើវិសោធនកម្មច្បាប់គណបក្សនយោបាយដ៏ចម្រូងចម្រាស់។
នៅក្នុងព្រះរាជក្រឹត្យដែលចុះហត្ថលេខាដោយប្រមុខរដ្ឋស្ដីទី លោក សាយ ឈុំ កាលពីថ្ងៃម្សិលមិញនេះ លោក សុខ ទូច ត្រូវបានដំឡើងពីអនុប្រធាន ទៅជាប្រធានរាជបណ្ឌិតសភាកម្ពុជា ជំនួសអ្នកស្រី ខ្លូត ធីតា ទៅតាមការស្នើសុំរបស់លោកនាយករដ្ឋមន្ត្រី ហ៊ុន សែន។
បើតាមព្រះរាជក្រឹត្យដាច់ដោយឡែកមួយទៀតចេញក្នុងថ្ងៃតែមួយ អតីតប្រធានរាជបណ្ឌិតសភា អ្នកស្រីបណ្ឌិត ខ្លូត ធីតា ត្រូវបានលោក ហ៊ុន សែន តែងតាំងជាទីប្រឹក្សារបស់លោក មានឋានៈស្មើនឹងទេសរដ្ឋមន្ត្រី។
ការដំឡើងឋានៈលោក សុខ ទូច នេះ ត្រូវបានធ្វើឡើងតែជាងមួយសប្ដាហ៍ប៉ុណ្ណោះ បន្ទាប់ពីលោកថ្លែងគាំទ្រសំណើវិសោធនកម្មច្បាប់ស្ដីពីគណបក្សនយោបាយ ដែលត្រូវបានគេមើលឃើញថា ជាការព្យាយាមរបស់បក្សកាន់អំណាច ដើម្បីរាំងខ្ទប់ជីវិតនយោបាយរបស់អតីតមេបក្សប្រឆាំង លោក សម រង្ស៊ី។
ក្រៅពីគាំទ្រសំណើវិសោធនកម្មច្បាប់នេះហើយ លោក សុខ ទូច កាលពីថ្ងៃទី២០ ខែកក្កដានេះ មានបំណងចង់ឲ្យមានច្បាប់ហាមឃាត់ការប្រើពាក្យមួយចំនួន ដូចជា ពាក្យ “សង្គ្រោះ” និងពាក្យ “បដិវត្តន៍” ជាដើម៕
