រដ្ឋាភិបាលកម្ពុជា បានសម្រេចដកលិខិតឆ្លងដែនការទូតពីអតីតមន្ដ្រីគណបក្សប្រឆាំងទាំងអស់ ដែលកំពុងនិរទេសខ្លួននៅក្រៅប្រទេស ដែលត្រូវបានចាត់ទុកជាវិធានការថ្មីមួយទៀតរបស់រដ្ឋាភិបាលកម្ពុជា ប្រឆាំងទៅនឹងមេដឹកនាំអតីតបក្សប្រឆាំង។
យោងតាមសេចក្ដីសម្រេចមួយ ចុះកាលពីថ្ងៃទី២៤ ខែវិច្ឆិកា ហើយដែល VOD ទើបតែទទួលបាននៅថ្ងៃនេះ ក្រសួងការបរទេសកម្ពុជា បានសម្រេចលុបចោលលិខិតឆ្លងដែនកាទូតរបស់តំណាងរាស្ត្រ ៥៥រូប និងសមាជិកព្រឹទ្ធសភាមួយរូបរបស់អតីតបក្សប្រឆាំង បន្ទាប់ពីបក្សប្រឆាំងដ៏ធំមួយនេះ ត្រូវបានរំលាយចោល ហើយឈ្មោះរបស់ពួកគេ ក៏ត្រូវបានលុបចេញពីបញ្ជីឈ្មោះតំណាងរាស្ត្រ និងសមាជិកព្រឹទ្ធសភាផងដែរ។
គណបក្សសង្គ្រោះជាតិ ដែលទទួលបានសំឡេងគាំទ្រប្រហែល ៣លាននាក់នៅក្នុងបោះឆ្នោតជាតិឆ្នាំ២០១៣នោះ ត្រូវបានតុលាការកំពូលសម្រេចរំលាយចោលកាលពីថ្ងៃទី១៦ ខែវិច្ឆិកា ហើយថ្នាក់ដឹកនាំចំនួន ១១៨រូបរបស់បក្សប្រឆាំងមួយនេះ ក៏ត្រូវបានហាមឃាត់មិនឲ្យធ្វើនយោបាយរយៈពេល ៥ឆ្នាំ ខណៈដែល លោក កឹម សុខា ក៏កំពុងជាបឃុំនៅក្នុងពន្ធនាគារ ក្រោមការចោទប្រកាន់ពីរដ្ឋាភិបាលថា «ក្បត់ជាតិ»៕