អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជាលោកស្រី រ៉ូណា ស្មីត (Rhona Smith)បានបង្ហាញក្តីព្រួយបារម្ភថា កម្ពុជាកំពុងតែស្ថិតនៅចំណុចដ៏គ្រោះថ្នាក់មួយ ដោយលើកឡើងថាមានការជ្រែតជ្រែងផ្នែកនយោបាយពីអ្នកមានអំណាច ការដាក់សម្ពាធលើគណបក្សប្រឆាំងតាមរយៈប្រព័ន្ធតុលាការ និងការបង្កើតច្បាប់មួយចំនួនមានលក្ខណៈរឹតត្បិតសិទ្ធិសេរីភាព។
លោកស្រី រ៉ូណា ស្មីត បានលើកឡើងបែបនេះនៅក្នុងសន្និសីទសារព័ត៌មានមួយនៅទីស្នាក់ការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជានារសៀលនេះ បន្ទាប់ពីបានបញ្ចប់ទស្សនកិច្ចរយៈពេល១០ថ្ងៃ។
លោកស្រី រ៉ូណា ស្មីត បានលើកឡើងថា ច្បាប់ទាំងអស់នៅកម្ពុជាត្រូវតែអនុវត្តឲ្យស្មើភាពគ្នា និងដោយយុត្តិធម៌ដល់គ្រប់គណបក្សនយោបាយ និងសមាជិកគណបក្សនយោបាយ។ លោកស្រីថា ការអនុវត្តច្បាប់ឲ្យមានភាពស្មើគ្នាចំពោះគណបក្សនយោបាយនេះ ដោយបញ្ជាក់ថា ដើម្បីរក្សាលំហរប្រជាធិបតេយ្យក្នុងដំណើរឆ្ពោះទៅរកការបោះឆ្នោតនៅពេលខាងមុខ។
អ្នកស្រីបន្តថា ការជ្រែតជ្រែងជាថ្មីរបស់អ្នកមានអំណាចលើប្រព័ន្ធតុលាការ និងការវាយដំលើរាងកាយរបស់អ្នកតំណាងរាស្រ្តបក្សប្រឆាំងនាពេលថ្មីៗក៏ជាចំណុចគួរឲ្យព្រួយបារម្ភពីស្ថានភាពនយោបាយនៅកម្ពុជា។
អ្នកស្រីបន្ថែមថា៖ “ខ្ញុំបានដឹងពីសំណុំរឿងមួយចំនួនបានកើតមាន និងដំណើរកាជាថ្មីប្រឆាំងនឹងសមាជិកគណបក្សប្រឆាំង។ ជាការពិតតុលាការនៅកម្ពុជាត្រូវអនុវត្តច្បាប់កម្ពុជាឲ្យបានស្មើភាពគ្នា និងមិនជាប់ពាក់ព័ន្ធនឹងនិន្នាការនយោបាយ…សំណុំរឿងប្រឆាំងនឹងគណបក្សប្រឆាំងនេះបានដាក់សម្ពាធលើគណបក្សប្រឆាំង ហើយសំណុំរឿងបែបនេះមិនឃើញមានកើតឡើងចំពោះគណបក្សដទៃនោះទេ”។
លោកស្រី រ៉ូណា ស្មីត បានលើកឡើងទៀតថា ការបង្កើតច្បាប់ស្តីពីសមាគម និងអង្គការមិនមែនរដ្ឋាភិបាល ច្បាប់បោះឆ្នោតជ្រើសតាំងសមាជិកសភា និងសេចក្តីព្រាងច្បាប់សហជីព បានធ្វើឲ្យមានកង្វល់លើសេរីភាពសម្តែងមតិ និងការជួបជុំជាដើម។ លោកស្រីសង្ឃឹមថា រដ្ឋាភិបាលកម្ពុជានឹងធានាការអនុវត្តច្បាប់នេះស្របទៅនឹងសន្ធិសញ្ញាសិទ្ធិមនុស្សអន្តរជាតិ។
ប្រធានគណៈកម្មការសិទ្ធិមនុស្សកម្ពុជារបស់រដ្ឋាភិបាល លោក ម៉ក់ សម្បត្តិ មានប្រសាសន៍ថា ក្នុងការបង្កើតច្បាប់មួយៗ រដ្ឋាភិបាលកម្ពុជាបានដាក់ឲ្យពិនិត្យ និងពិភាក្សាជាច្រើនដំណាក់កាលដែលលោកថា ដើម្បីធានាឲ្យគ្រប់ភាគីពាក់ព័ន្ធអាចទទួលយកបាន។ លោកថា កម្ពុជាបានអនុវត្តតាមកតិកាសញ្ញា សន្ធិសញ្ញា និងពិធីសារជាច្រើន ដើម្បីធានាពីការគោរពសិទ្ធិមនុស្សនៅកម្ពុជា។ លោកបន្តថា លោកស្រី រ៉ូណា ស្មីត បានចំណាយពេលតិចតួចនៅកម្ពុជា និងមិនបានយល់ច្បាស់ពីស្ថានភាពនៅកម្ពុជា។ លោកចាត់ទុកការលើកឡើងរបស់លោកស្រី រ៉ូណា ស្មីត ថាគ្រាន់តែជាការបញ្ចេញមតិប៉ុណ្ណោះ។
លោកបន្ថែមថា៖ “ហើយអូនឃើញស្រាប់ហើយ ច្បាប់អង្គការចេញហើយឥឡូវមានអ្នកណាធ្វើការតវ៉ាដូចជាអត់មានអីទេ ទាំងការអនុវត្តក៏រលូន អ៊ីចឹងបានថាការលើកឡើងគាត់ចេះតែលើកទៅកុំឲ្យអង្គការអស់ហ្នឹងថាម៉េចមិនលើកទាមទារខ្លះផង ខ្ញុំគិតថាមានតែប៉ុណ្ណឹងទេ”។
គួរបញ្ជាក់ថា នេះជាការបំពេញបេសកកម្មលើកទីពីររបស់លោកស្រីមកកាន់ប្រទេសកម្ពុជា បន្ទាប់ពីលោកស្រីត្រូវបានអង្គការសហប្រជាជាតិតែងតាំងកាលពីខែមីនា ឆ្នាំ២០១៥ ដើម្បីរាយការណ៍ពីស្ថានភាពសិទ្ធិមនុស្សនៅកម្ពុជា។ ក្នុងដំណើរបេសកកម្មរបស់លោកស្រីនៅកម្ពុជារយៈពេល១០ថ្ងៃនេះ លោកស្រីបានជួបពិភាក្សាជាមួយមន្ត្រីជាន់ខ្ពស់រដ្ឋាភិបាល មន្ត្រីគណបក្សប្រឆាំង តំណាងអង្គការសង្គមស៊ីវិល និងអាជ្ញាធរខេត្តមួយចំនួន៕