មន្ត្រីកម្មសិក្សាក្រសួងមុខងារសាធារណៈចំនួន ១៣៥នាក់ ស្នើសុំលោកនាយករដ្ឋមន្ត្រី ហ៊ុន សែន ជួយរក្សាមុខងារនៅក្នុងក្របខណ្ឌដដែល បន្ទាប់ពីរដ្ឋមន្ត្រីថ្មីនៃក្រសួងនេះប្រកាសបញ្ឈប់ពួកគេពីក្របខណ្ឌ។
ក្នុងលិខិតសុំអន្តរាគមន៍ តំណាងដោយមន្ត្រីកម្មសិក្សា ១៣៥នាក់ ដែលមកពីបណ្តា ២៥រាជធានី-ខេត្ត បានផ្ញើទៅលោកនាយករដ្ឋមន្ត្រី កាលពីថ្ងៃទី២១ ខែមេសានេះ បានឱ្យដឹងថា រដ្ឋមន្រ្តីមុខងារសាធារណៈ លោក ព្រុំ សុខា បានសម្រេចនិរាករណ៍ដោយបញ្ឈប់ពួកគាត់ពីការងារនៅក្នុងក្របខណ្ឌក្រសួងមុខងារសាធារណៈ កាលពីថ្ងៃទី១៦ ខែមេសា ឆ្នាំ២០២០នេះ។
ករណីនេះ តំណាងក្រុមមន្ត្រីកម្មសិក្សាទាំងអស់ ស្នើសុំលោកនាយករដ្ឋមន្ត្រី ហ៊ុន សែន អន្តរាគមន៍ជួយដល់ពួកគាត់ឱ្យបានបន្តការងារ និងសុខចិត្តមិនទទួលប្រាក់បៀវត្ស រួមទាំងប្រាក់ឧបត្ថម្ភផ្សេងៗរហូតដល់ជំងឺកូវីដ១៩ ផុតរលត់ជាស្ថាពរ។
ខ្លឹមសារលិខិតបានបញ្ជាក់យ៉ាងដូច្នេះថា៖ «ខ្ញុំបាទ-នាងខ្ញុំ សូមគោរពអនុញ្ញាតស្នើសុំសេចក្តីសណ្តោសប្រោសប្រណីពីសម្តេចតេជោនាយករដ្ឋមន្ត្រី សម្តេចពុក មេត្តារក្សាទុកក្របខណ្ឌរបស់ខ្ញុំបាទ-នាងខ្ញុំ ជាមន្ត្រីរាជការ ដោយខ្ញុំបាទ-នាងខ្ញុំ សុខចិត្តមិនទទួលបៀវត្ស និងប្រាក់ឧបត្ថម្ភផ្សេងៗ រហូតដល់ជំងឺកូវីដ១៩ ផុតរលត់ជាស្ថាពរពីមាតុភូមិជាទីស្នេហានៃយើង»។
ក្នុងលិខិតរបស់ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី២០ ខែមេសា បានឱ្យដឹងដែរថា តាមចំណារឯកភាពលោកនាយករដ្ឋមន្ត្រី ហ៊ុន សែន កាលពីថ្ងៃ៣១ ខែមីនា ឆ្នាំ២០២០ បញ្ជាក់ថាក្នុងបរិការណ៍ដែលកម្ពុជាកំពុងទទួលរងផលប៉ះពាល់ធ្ងន់ធ្ងរពីការរីករាលដាលនៃជំងឺកូវីដ១៩ លោកនាយករដ្ឋមន្ត្រី សម្រេចនិរាករណ៍នូវប្រកាសស្តីពីការជ្រើសរើសមន្ត្រីរាជការ ១៣៥នាក់ ឱ្យចូលក្របខណ្ឌក្រសួងមុខងារសាធារណៈ ចុះថ្ងៃទី១៨ ខែកុម្ភៈ ឆ្នាំ២០២០វិញ និងផ្អាកការផ្តល់ក្របខណ្ឌពិសេស ដែលលើសពីចំនួនមន្ត្រីរាជការចូលនិវត្តន៍ដល់គ្រប់ក្រសួង និងស្ថាប័នដទៃទៀតទាំងអស់ក្នុងឆ្នាំ២០២០។ លើសពីនេះ លិខិតដដែលបញ្ជាក់ទៀតថា លោកនាយករដ្ឋមន្ត្រីក៏ស្នើសុំឱ្យផ្អាកផ្តល់ក្របខណ្ឌពិសេស ដែលលើសពីចំនួនមន្ត្រីចូលនិវត្តន៍ដល់គ្រប់ក្រសួង-ស្ថាប័នដទៃទៀតទាំងអស់ សម្រាប់ឆ្នាំ២០២១ ដល់ឆ្នាំ២០២៣ ផងដែរ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ស្ថាប័នរដ្ឋដែលបញ្ឈប់តួនាទីរបស់មន្ត្រីកម្មសិក្សាក្របខណ្ឌទាំង ១៣៥នាក់ ត្រូវមានការជជែកតទល់គ្នារវាងភាគីទាំងសងខាង និងបង្ហាញព័ត៌មានឱ្យមានតម្លាភាព បើពុំដូច្នេះទេ នឹងធ្វើឱ្យរងការរិះគន់លើប្រព័ន្ធគ្រប់គ្រងស្ថាប័នរដ្ឋនោះផងដែរ។
លោកមានប្រសាសន៍ថា៖ «ប្រសិនបើបញ្ហានេះមិនមានការដោះស្រាយឱ្យមានឈរលើគោលការតម្លាភាពទេ វាអាចធ្វើឱ្យមានការបាត់បង់នូវជំនឿ ឬក៏បាត់បង់ការទុកចិត្តទៅលើប្រព័ន្ធនៃការសម្រេចចិត្តទៅលើកិច្ចការសំខាន់ៗនៃការជ្រើសរើសមន្ត្រីក្របខណ្ឌជាដើម»។
មន្ត្រីកម្មសិក្សាក្របខណ្ឌក្រសួងមុខងារសាធារណៈទាំង ១៣៥នាក់ ត្រូវបានលោក ពេជ្រ ប៊ុនធិន អតីតរដ្ឋមន្ត្រីក្រសួងមុខងារសាធារណៈ កាលពីថ្ងៃទី១៨ ខែកុម្ភៈ ឆ្នាំ២០២០ បានចេញប្រកាសស្តីពីការជ្រើសរើសមន្ត្រីរាជការឱ្យចូលក្របខណ្ឌក្រសួងមុខងារសាធារណៈ។
ប៉ុន្តែ ក្រោយមក នៅថ្ងៃទី១៦ ខែមេសា ឆ្នាំ២០២០ លោក ព្រុំ សុខា ដែលជារដ្ឋមន្ត្រីថ្មី នៃក្រសួងមុខងារសាធារណៈ បានចេញប្រកាសនិរាករណ៍សេចក្តីសម្រេចខាងលើនេះ ជាហេតុធ្វើឱ្យពួកគាត់មានការតវ៉ាទៅលោកនាយករដ្ឋមន្ត្រី ហ៊ុន សែន៕
