លោកនាយករដ្ឋមន្រ្តីហ៊ុន សែន បានលើកឡើងថាបក្សប្រឆាំងដែលរងការរំលាយចោលនោះ ជាអ្នករុញមនុស្សឲ្យទៅកាប់ឈើ មិនមែនអស់ព្រៃឈើ ដោយសារការដឹកនាំរបស់លោកនោះទេ។
លោកហ៊ុន សែន លើកឡើងបែបនេះថ្ងៃទី ០៤ ខែមីនា ឆ្នាំ២០១៨ នេះក្នុងពិធីជួបសំណេះសំណាល ជាមួយកម្មករ កម្មការនីចំនួន ១៤ ០២៥នាក់ក្នុងខេត្តព្រះសីហនុ និងជាការឆ្លើយតបទៅនិងអ្នកផ្តល់មតិ យោបល់(Comment) នៅក្នុងហ្វេសប៊ុក ផ្សាយផ្ទាល់របស់លោកដែលថាការបាត់បង់ព្រៃឈើក្នុងរបបដឹកនាំរបស់លោក។
លោក ហ៊ុន សែនបានលើកឡើងថា៖ «គ្រាន់តែកំពង់សោមក្បាលឆាយនេះ ខ្ទេចខ្ទីអស់មិនចេះតិចទេ។ អ្នកណាទៅកាប់អាហ្នឹង? ជួនកាលអាបក្សប្រឆាំងនឹងរុញមនុស្សទៅកាប់ហ្មង។…កាប់យកធ្វើស្រែធ្វើចំការចឹងទៅ។ មនុស្សកើនឡើងវាត្រូវការដី»។
លោកហ៊ុន សែន បានលើកឡើងបែបនេះជាការឆ្លើយតបទៅនឹងសារបញ្ចេញមតិនៅក្នុងហ្វេសប៊ុករបស់លោកថា៖ «លោកហ៊ុន សែន និយាយយករួចខ្លួន ដូចនិយាយការពារព្រៃឈើ អស់ព្រៃឈើកាន់តែច្រើន»។
ជាការឆ្លើយតបលោក ហ៊ុន សែន បានលើកឡើងថាការបាត់បងព្រៃឈើនោះគឺដោយសារតែកំណើននៃប្រជាជន និងតម្រូវការដីព្រៃធ្វើកសិកម្ម មិនអស់ដោយសារការដឹកនាំរបស់លោកឡើយ៕