សាលាដំបូងរាជធានីភ្នំពេញនៅព្រឹកថ្ងៃសុក្រនេះ បានបើកសវនាការលើសំណុំរឿងសកម្មជនដីធ្លីនៅតំបន់បឹងកក់ចំនួន៦នាក់ ពាក់ព័ន្ធនឹងបទចោទថា ជេរប្រមាថជាសាធារណៈនិងគំរាមសម្លាប់ ប៉ុន្តែសវនាការនេះត្រូវបានលើកពេលទៅថ្ងៃក្រោយ ខណៈដើមបណ្តឹងដកពាក្យបណ្តឹងវិញ។
ការលើកពេលសវនាការនេះ បន្ទាប់ពីមេធាវីការពារក្ដីឲ្យសកម្មជនដីធ្លីទាំងនោះ បានស្នើទៅតុលាការសុំផ្អាកសវនាការ ដោយសារអវត្តមានសាក្សី មេធាវី និងដើមបណ្ដឹង។ ប៉ុន្តែព្រះរាជអាជ្ញា លោក តុប ឈុនឡុង ស្នើឲ្យចៅក្រមបន្តសវនាការករណីនេះបន្តទៀត បើទោះបីគ្មានដើមបណ្ដឹងនិងសាក្សីចូលរួមក៏ដោយ ដោយលើកហេតុផលថា បើទោះសាក្សីនិងដើមបណ្ដឹងមិនមកចូលរួម ក៏អាចបន្តសវនាការបានដែរ ដោយសារសាក្សីនិងដើមបណ្ដឹងបានបំភ្លឺនៅដំណាក់ចៅក្រមស៊ើបសួររួចហើយ។
បន្ទាប់ពីសម្រាកប្រហែលជា១០នាទី ក្រោយមកទៀត ចៅក្រមជំនុំជម្រះនៃសាលាដំបូងរាជធានីភ្នំពេញ លោក ប៊ុន ធី បានប្រកាសលើកពេលសវនាការទៅថ្ងៃក្រោយវិញ ដោយសំអាងថាការស្នើសុំរបស់មេធាវីការពារក្ដីឲ្យសកម្មជដីធ្លីធ្វើឡើងមានមូលហេតុត្រឹមត្រូវ។
សកម្មជនដីធ្លីម្នាក់ក្នុងចំណោម៦នាក់ គឺ អ្នកស្រី គង់ ចាន់ថា ប្រាប់អ្នកសារព័ត៌មានបន្ទាប់ចេញពីសវនាការថា អ្នកស្រី លី មុំ ដែលជាអ្នកប្ដឹងពួកគាត់នោះ បានដកពាក្យបណ្ដឹងពីតុលាការយូរហើយ ប៉ុន្តែបច្ចុប្បន្ននេះ ពួកគាត់នៅជាប់បណ្ដឹងមួយទៀត គឺព្រះរាជអាជ្ញារជាអ្នកចោទ។ អ្នកស្រីស្នើឲ្យតុលាការទម្លាក់ការចោទប្រកាន់មកលើពួកគាត់ ខណៈដែលដើមបណ្ដឹងឈប់ប្ដឹងហើយនោះ។
អ្នកស្រីថា «គាត់បានសំណូមពរឲ្យតុលាការឈប់ថា សូមឲ្យតុលាការកុំកោះហៅពួកទាំង៦នាក់ទៀតអី ចឹងពួកខ្ញុំ៦នាក់មិនជាប់បណ្ដឹង លី មុំ ទេ តែមកជាប់បណ្ដឹងព្រះរាជអាជ្ញារវិញ ហើយព្រះរាជអាជ្ញានេះ គាត់អត់បានដោះលែងពួកខ្ញុំទេ គាត់នៅយកសំណុំរឿង លី មុំ មកធ្វើការចោទប្រកាន់ដល់ពួកខ្ញុំ។ នៅថ្ងៃនេះ គាត់អត់បានបើកសវនាការ ដោយសារ សាក្សីអត់មាន ហើយអ្នកដែល លី មុំ ប្ដឹង២នាក់ទៀតគាត់មកយឺតចឹងគាត់លើកថ្ងៃទៅវិញ»។
អ្នកស្រី លី មុំ ដែលជាដើមបណ្ដឹងប្រាប់អ្នកសាព័ត៌មានវីអូឌីថា អ្នកស្រីបានដកពាក្យបណ្ដឹងយូរ ប៉ុន្តែអ្នកស្រីមិនបានប្រាប់ពីមូលហេតុនៃការដកពាក្យបណ្ដឹងវិញនោះឡើយ។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក សឹង សែនករុណា លោកស្នើឲ្យតុលាការធ្វើការពិចារណាចំពោះសំណុំរឿងនេះ ដោយដោះលែងសកម្មជនដីធ្លីទាំងនោះឲ្យមានសេរីភាព ខណៈម្ចាស់បណ្តឹងឈប់ប្តឹងហើយនោះ។ លោកថា «ខ្ញុំគិតថាតុលាការគួរពិចារណាក្នុងការដោះលែងគាត់ឲ្យមានសេរីភាពហើយ ពីព្រោះអង្គហេតុនៃការកើតឡើងឬការចោទហ្នឹង យើងពិនិត្យឃើញថាវាមានភាពមិនប្រក្រតីច្រើនណាស់ដែលគួរតែតុលាការយកមកពិចារណាដើម្បីឲ្យគាត់មានសេរីភាព»។
កាលពីថ្ងៃ១៦ មីនា ឆ្នាំ២០១៧ សាលាដំបូងរាជធានីភ្នំពេញ បានចោទប្រកាន់សកម្មជនដីធ្លីទាំង៦នាក់មាន អ្នកស្រី ទេព វន្នី អ្នកស្រី ហេង មុំ អ្នកស្រី គង់ ចាន់ថា លោកយាយង៉ែត ឃុន អ្នកស្រី ឆេង លាភ និងអ្នកស្រី តុល ស្រីពៅ ពីបទជេរប្រមាថជាសាធារណៈ និងគំរាមថានឹងសម្លាប់ តាមបណ្ដឹងរបស់អ្នកស្រី លី មុំ ដែលអតីតតំណាងបឹងកក់កន្លងមក។
មេធាវីការពារក្ដីឲ្យសកម្មសជនដីធ្លីទាំង៤នាក់ គឺ លោកស្រី សាម សុគន្ធា មានប្រសាសន៍ថា កូនក្ដីរបស់អ្នកស្រីមិនបានប្រព្រឹត្តបទល្មើសដូចតុលាការចោទប្រកាន់ឡើយ។ លោកស្រី បង្ហាញក្ដីសង្ឃឹមថា តុលាការនឹងទម្លាក់ចោលការចោទប្រកាន់នេះ៕
