ស្ថាបនិកមន្ទីរពេទ្យគន្ធបុប្ផា ដែលល្បីខាងសង្គ្រោះជីវិតកុមារដោយឥតគិតថ្លៃ លោកវជ្ជបណ្ឌិត បេអាត រីច្នឺ (Beat Richner) បានលាលែងតំណែងរបស់លោកពីប្រធានគ្រប់គ្រងមន្ទីរពេទ្យ ដោយសារមានជំងឺធ្ងន់ធ្ងរ។
សេចក្តីប្រកាសព័ត៌មានថ្ងៃទី២៨មីនា២០១៧ ឲ្យដឹងថា ក្រុមប្រឹក្សាភិបាលមូលនិធិគន្ធបុប្ផា នៅទីក្រុងហ៊្សូរីច (Zurich) ប្រទេសស្វីស (Switzerland) មានការសោកស្តាយដែលប្រកាសថា ស្ថាបនិកមន្ទីរពេទ្យគន្ធបុប្ផា លោកវេជ្ជបណ្ឌិត បេអាត រីច្នឺ មានជម្ងឺជាទម្ងន់ ហើយលោកនឹង លាលែងពីតំណែងរបស់លោកជា នាយកគ្រប់គ្រងជាបន្ទាន់។
សេចក្តីប្រកាសព័ត៌មានបន្តឲ្យដឹងថា លោកវេជ្ជបណ្ឌិត ភីធឺ ស្ទូដឺ (Peter Studer) ដែលជា អនុប្រធានក្រុមប្រឹក្សាភិបាលមូលនិធិគន្ធបុប្ផា នឹងបន្តការងាររបស់លោក បេអាត ជាគណៈគ្រប់គ្រងស្តីទី។
លោកវេជ្ជបណ្ឌិត Beat Richner មានវ័យ៦៩ឆ្នាំ ជាជនជាតិស្វីស ហើយគឺជាគ្រូពេទ្យកុមារនិងជាអ្នកលេង Cello ម្នាក់ផងដែរ។ លោកជាប្រធានមូលនិធិគន្ធបុប្ផា ដែលបានបង្កើតឡើងក្នុងទីក្រុងហ៊្សូរីច (Zurich) ក្នុងឆ្នាំ១៩៩១។
កាលពីឆ្នាំ២០១៦ ព្រះមហាក្សត្រខ្មែរ នរោត្តម សីហមុនី បានតែងតាំងប្រធានមន្ទីរពេទ្យគន្ធបុប្ផាគឺលោកវេជ្ជបណ្ឌិត Beat Richner ជាទីប្រឹក្សាក្រសួងសុខាភិបាល ដោយមានឋានៈស្មើរដ្ឋលេខាធិការ។
ជារៀងរាល់ឆ្នាំមន្ទីរពេទ្យគន្ធបុប្ផា ទទួលព្យាបាលកុមារក្រីក្រកម្ពុជាជាងកន្លះលាននាក់។ ហើយមូលនិធិរបស់លោកបាន រៃអង្គាសថវិកាជួយមកដល់កម្ពុជាមានទំហំ៣៧០លានដុល្លារចាប់តាំងពីបង្កើតមក។