យ៉ាងហោចណាស់មនុស្ស ២២នាក់ ត្រូវបានសម្លាប់ ហើយ ៥៧នាក់ទៀត បានរងរបួស កាលពីថ្ងៃម្សិលមិញនេះ នៅពេលរថយន្តផ្ទុកគ្រាប់បែកមួយគ្រឿង បានផ្ទុះឡើងកម្ទេចផ្សារមួយកន្លែង នៅតំបន់កុលសម្ព័ន្ធនិកាយស៊ីអ៊ីត។ នេះដោយយោងតាមការចុះផ្សាយរបស់ទីភ្នាក់ងារ AFP ដែលផ្សាយថា ពួកឧទ្ទាមតាលីបង់ បានប្រកាសទទួលខុសត្រូវចំពោះការវាយប្រហារនេះ។
ការវាយប្រហារនេះបានកើតឡើងក្រោយពីរលកអំពើហិង្សាបង្កឡើងដោយពួកឧទ្ទាម បានសម្លាប់មនុស្ស ១៣០នាក់ នៅទូទាំងប្រទេសប៉ាគីស្ថាន កាលពីខែកុម្ភៈកន្លងមក ដែលបង្កភាពភ័យខ្លាចដល់ប្រជាពលរដ្ឋ។
អាជីវករម្នាក់ បានប្រាប់ថា មនុស្សម្នាបានស្រែកយំឲ្យជួយ ហើយគ្រប់យ៉ាងពោរពេញទៅដោយធូរលីដី។
គ្រូពេទ្យម្នាក់ប្រចាំនៅមន្ទីរពេ្យក្នុងតំបន់ បានឲ្យដឹងថា សពមនុស្ស ២២នាក់ ត្រូវបានគេបញ្ជូនទៅដល់មន្ទីរពេទ្យ និងមានអ្នករបួស ៥៧នាក់ ក្នុងនោះមានទាំងស្ត្រី និងក្មេងៗផងដែរ។
នាយករដ្ឋមន្ត្រីប៉ាគីស្ថាន លោក ណាវ៉ាស ហ្សារីហ្វ បានថ្កោលទោសចំពោះការវាយប្រហារនេះ ដោយលោកជំរុញឲ្យកម្ទេចចោលទាំងស្រុងនូវក្រុមភេរវកម្មនៅក្នុងប្រទេសប៉ាគីស្ថាន៕
