អ្នកជំនាញខាងប្រព័ន្ធបច្ចេកវិទ្យា បានចាប់អារម្មណ៍ថាការប្រើប្រព័ន្ធអ៊ិនធើណែតកំពុងធ្វើឲ្យមានឥទ្ធិពលទៅលើរបបដឹកនាំប្រទេសមួយចំនួន និងជាពិសេសទៅលើការបោះឆ្នោតនៅកម្ពុជាផងដែរ ខណៈដែលប្រព័ន្ធផ្សព្វផ្សាយពីមុនៗមានទូរទស្សន៍ វិទ្យុជាដើមហាក់មិនត្រូវបានគេយកចិត្តទុកដាក់ដូចកាលពីមុនទៀតនោះទេ។
ថ្លែងប្រាប់អ្នកយកព័ត៌មានវីអូឌីនៅព្រឹកថ្ងៃទី០១ មិថុនានេះ បន្ទាប់ពីបើកព្រឹត្តិការណ៍ទស្សនៈទានអ៊ិនធើណែតបើកទូលាយលើកទី៣ ប្រធានបណ្តាញយុវជនកម្ពុជាលោក ទឹម ម៉ាឡៃ មានប្រសាសន៍ថាប្រព័ន្ធអ៊ិនធើណែតនាពេលបច្ចុប្បន្នកំពុងតែមានឥទ្ធិពលជាច្រើនទៅលើការបោះឆ្នោតខាងមុខ ដោយសារតែប្រព័ន្ធនេះមានភាពងាយស្រួលនិងចម្រុះជាងបណ្តាញទូរទស្សន៍ ឬវិទ្យុ ជាពិសេសទៅទៀតខណៈដែលការបោះឆ្នោតខាងមុខ ក្រសួងព័ត៌មានបានហាមឃាត់ទូរទស្សន៍ និងវិទ្យុក្នុងការរាយការណ៍ពីការបោះឆ្នោតនោះ លោកប្រព័ន្ធអ៊ិនធើណែតនេះនឹងដើរតួជាឆ្លើយតបទៅនឹងប្រជាជនងាយស្រួលជាងគេ។
លោកថា៖ «អញ្ចឹងអ្វីដែលមានគុណប្រយោជន៍នេះវានឹងធ្វើឲ្យប្រជាពលរដ្ឋនឹងដឹងពីព័ត៌មានភ្លាមៗអំពីព័ត៌មានដែលមានក្នុងប្រទេសពីទីតាំងនៃការបោះឆ្នោតនៅគ្រប់ការិយាល័យ ហើយយើងឃើញថាវាក៏ជាផ្នែកមួយដែលជួយឲ្យប្រជាពលរដ្ឋទុកចិត្តពេលដែលរង់ចាំលទ្ធផលរយៈពេលយូរ ជាធម្មតានៅពេលដែលដឹងពីព័ត៌មានភ្លាមៗធ្វើឲ្យប្រជាពលរដ្ឋរំសាយនូវអំពើហិង្សាណាមួយដែលកើតមាននៅពេលដែលគាត់ទន្ទឹងរង់ចាំ អញ្ចឹងវាអាចជួយឲ្យមានការរំសាយនូវអំពើហិង្សាដែលកើតមាននៅកម្ពុជាផងដែរ»។
ប្រធានផ្នែកព័ត៌មាននិងទំនាក់ទំនងនៃអង្គការសង់ត្រាល់ លោក ង៉ែត ម៉ូសេ មានប្រសាសន៍ថា ប្រព័ន្ធអ៊ិនធើណែតកំពុងតែធ្វើឲ្យប្រព័ន្ធគ្រប់គ្រងនៃប្រទេសមួយចំនួនមានការផ្លាស់ប្តូរ ជាពិសេសទាក់ទងនឹងការបោះឆ្នោត។ ខណៈដែលការបោះឆ្នោតនៅកម្ពុជាកាន់តែខិតជិតចូលមកដល់នោះ លោកមើលឃើញថា ការផ្សព្វផ្សាយគោលនយោបាយរបស់គណបក្សនីមួយៗហាក់បានសម្រុកខ្លាំងទៅលើប្រព័ន្ធហ្វេសប៊ុក ជាជាងប្រព័ន្ធផ្សព្វផ្សាយដែលមានពីមុនៗ។
លោកថា៖ «ខ្ញុំគិតថាមិនចាំបាច់ទៅដល់ថ្ងៃបោះឆ្នោតទេ គ្រាន់តែពេលឥឡូវហ្នឹងអ្នកនយោបាយប្រើប្រាស់អាហ្នឹងច្រើនជាការប្រើប្រាស់វិទ្យុទូរទស្សន៍ទៀតណា! បើទោះបីគជប គាត់មានម៉ោងវិទ្យុ មានម៉ោងទូរទស្សន៍ក្តីយើងមើលទៅវាមិនសូវមានគេស្តាប់ប៉ុន្មានទេ! តែនៅតាមហ្វេសប៊ុកវិញសូម្បីតែនៅ poll live យើងឃើញថា គជប ឲ្យទម្លាក់ចុះដែរណា យើងមើលទៅមើលឥទ្ធិពលហ្នឹងគឺវាមានឥទ្ធិពលច្រើន ខ្ញុំគិតថាទំរាំទៅដល់ថ្ងៃបោះឆ្នោតទៀតវាកាន់តែមានឥទ្ធិពលទៅទៀតតែខ្ញុំមិនដឹងថាឥទ្ធិពលល្អឬមិនល្អទេយើងចាំតែមើលជុំគ្នាពេលហ្នឹងតែម្តង»។
នាយកប្រតិបត្តិគណៈកម្មាធិការសហប្រតិបត្តិការដើម្បីកម្ពុជាលោក សឿង សារឿន មានប្រសាសន៍ថាប្រព័ន្ធអ៊ិនធើណែតកំពុងតែជះឥទ្ធិពលជាច្រើនដល់សង្គមកម្ពុជាពេលបច្ចុប្បន្ន ដោយថាវាមានភាពងាយស្រួល ហើយប្រជាជនឆាប់ទទួលព័ត៌មានលឿនជាងគេ។ លោកបន្ថែមថា ភាពរីកចម្រើននៃបច្ចេកវិទ្យានេះលោកមើលឃើញថាវានឹងធ្វើឲ្យការបោះឆ្នោតខាងមុខមានការប្រែប្រួលខ្លាំងជាងការបោះឆ្នោតឃុំសង្កាត់ឆ្នាំ២០១២។
លោកថា៖ «ប្រជាជនជិត៤លាននាក់ដែលមានលទ្ធភាពប្រើប្រាស់ប្រព័ន្ធហ្វេសបុកហ្នឹង គាត់មានលទ្ធភាពទទួលព័ត៌មានពីគណបក្សនយោបាយនានាតាមទូរស័ព្ទដៃរបស់គាត់ហ្នឹង! ហើយនៅពេលដែលគាត់ទទួលបានព័ត៌មានហ្នឹងហើយគាត់អាចពេញចិត្ត និងការសម្រេចសម្រេចចិត្តរបស់គាត់ហ្នឹងគឺប៉ះពាល់ទៅដល់ការបោះឆ្នោត អញ្ចឹយើងឃើញថាកាលពីឆ្នាំ២០១២ យើងឃើញថាឃុំជាង១៦០០ជាងហ្នឹងភាគច្រើនអ្នកទទួលបានសំឡេងច្រើនទៅលើបក្សកាន់អំណាចសព្វថ្ងៃ ហើយប្រហែលជាយើងអាចមើលឃើញហើយថាព័ត៌មាននេះនឹងអាចប៉ះពាល់ទៅលើការបោះឆ្នោតហ្នឹងតែម្តង»។
ដោយសារតែភាពរីកចំរើននៃប្រព័ន្ធបច្ចេកវិទ្យានេះកាលពីឆ្នាំ២០១៣ រដ្ឋាភិបាលកម្ពុជាបានបង្ហាញជំហរក្នុងការបង្កើតច្បាប់ស្តីពីឧក្រិដ្ឋកម្មតាមប្រព័ន្ធបច្ចេកវិទ្យាប៉ុន្តែសង្គមស៊ីវិលមើលឃើញថាច្បាប់នេះមានមាត្រាមួយចំនួនបានកម្រិតនូវសិទ្ធិនៃការប្រើប្រាស់អ៊ិនធើណែត និងការបញ្ចេញមតិនៅលើអ៊ិនធើណែត។ តែទោះជាយ៉ាងណាក្រសួងប្រៃសណីយ៍ និងទូរគមនាគមន៍បានអះអាងថាច្បាប់នេះកំពុងសិក្សាចងក្រងនៅឡើយ តែសង្គមស៊ីវិលយល់ថា រដ្ឋាភិបាលអាចនឹងបញ្ចេញច្បាប់នេះដាក់ឲ្យអនុម័តនៅមុនការបោះឆ្នោតឆ្នាំ២០១៨ខាងមុខ។
តាមការដកស្រង់ចេញពីគេហទំព័រមួយឈ្មោះថា geeksincambodia.com បានឲ្យដឹងថាចំនួនអ្នកប្រើប្រាស់អ៊ិនធើណែតនៅកម្ពុជាបច្ចុប្បន្ននេះមានចំនួន៧,១លាននាក់នៃប្រជាជនសរុប ១៥,៩លាននាក់ ចំនួននេះគឺមានការកើនឡើងយ៉ាងគំហុក ដែលពីឆ្នាំ២០១០ អ្នកប្រើប្រាស់អ៊ិនធើណែតនៅកម្ពុជាមានតែជាង៣០ម៉ឺននាក់ប៉ុណ្ណោះ៕
