ក្មួយប្រុសបង្កើតលោកនាយករដ្ឋមន្ត្រី ហ៊ុន សែន គឺលោកឧត្កមសេនីយ៍ ហ៊ុន ជា ត្រូវបានតុលាការកាត់ទោសឲ្យជាប់ពន្ធនាគារចំនួន១៨ខែ បន្ទាប់ពីលោកបានផ្ទុះអាវុធជាង១០គ្រាប់កាលពីយប់ថ្ងៃទី០១ខែឧសភា នៅរាជធានីភ្នំពេញ ខណៈអ្នកតាមដានបង្ហាញការសារទរនិងជម្រុញឲ្យអាជ្ញាធរអនុវត្តចាប់ឲ្យមានប្រសិទ្ធភាព។
បើតាមភ្នំពេញប៉ុស្តិ៍ លោក ហ៊ុន ជា បានដកកាំភ្លើងបាញ់រះប្រមាណជា១០គ្រាប់ កាលពីវេលាម៉ោងប្រមាណ១០និង២០នាទី យប់ថ្ងៃអង្គារ នៅភូមិ១១ សង្កាត់ផ្សារថ្មីទី១ ខណ្ឌដូនពេញ នៅខាងមុខផ្ទះវេរលុយមួយកន្លែង តែថាពុំបណ្តាលឲ្យមនុស្សណាស្លាប់ ឬ រងរបួសទេ។ ក្រោយកើតហេតុ នៅព្រឹកថ្ងៃ០២ខែឧសភា លោក ហ៊ុន ជា ត្រូវបានសមត្ថកិច្ចក្រសួងមហាផ្ទៃឃាត់ខ្លួនយកទៅសាកសួរនិងបានបញ្ជូនខ្លួនទៅតុលាការភ្លាមៗនៅថ្ងៃដដែលដើម្បីបន្តនីតិវិធី។
អ្នកនាំពាក្យសាលាដំបូងរាជធានីភ្នំពេញលោក អ៊ី រិន្ទ ប្រាប់វីអូឌី នៅថ្ងៃនេះថា បន្ទាប់ពីលោក ហ៊ុន ជា ត្រូវបានបញ្ជូនខ្លួនមកកាលពីល្ងាចម្សិលមិញ តុលាការក៏បានបើកសវនាការកាត់ក្តីភ្លាមៗ ដោយសម្រេចចោទប្រកាន់លោកពីបទគំរាមកំហែង សម្លាប់ និងបទធ្វើឲ្យខូចខាតដោយចេតនា តាមមាត្រា២៣៣និងមាត្រា៤១០ នៃក្រមព្រហ្មទណ្ឌ ហើយតុលាការសម្រេចឲ្យលោក ហ៊ុន ជា ជាប់ទោសនិងដាក់ពន្ធនាគារចំនួន១៨ខែ។
ប្រធានផ្នែកស៊ើបអង្កេតនៃអង្គការលីការដូ លោក អំ សំអាត អបអរសាទរចំពោះចំណាត់ការរបស់តុលាការ តែលោកបានកត់សម្គាល់ថា គំរូនៃភាពយុត្តិធម៌នេះ ហាក់មានខ្លះ នៅពេលការបោះឆ្នោតកាន់តែខិតជិតមកដល់។ ទោះជាយ៉ាងណា លោកជំរុញឲ្យអាជ្ញាធរមានសមត្ថិកិច្ចគួរតែអនុវត្តន៍ច្បាប់ជាជាងចាំតែស្តាប់បញ្ជារពីថ្នាក់លើ។
លោកថា៖ «ប្រមុខរាជរដ្ឋាភិបាលក៏លោកបានលើកឡើងដែរថាកុំចាំតែបទបញ្ជារ។ បានន័យថា ត្រូវតែទទួលខុសត្រូវទៅលើភារកិច្ចរៀងៗខ្លួន ក្នុងការអនុវត្តន៍ច្បាប់នីតិវិធី ដើម្បីឲ្យប្រទេសយើងហ្នឹងវាមាន លទ្ធិប្រជាធិបតេយ្យបានន័យថាពង្រឹងនៃការអនុវត្តន៍ច្បាប់ »។
លោក ហ៊ុន ជា ដែលត្រូវជាកូនលោក ហ៊ុន សាន បងបង្កើតលោក ហ៊ុន សែន ត្រូវបាន លោកហ៊ុន សែន ស្នើទៅកាន់ព្រះមហាក្សត្រឲ្យតម្លើងឋានន្តរស័ក្កិពីឧត្តមសេនីយទោផ្កាយ២ ទៅជាឧត្តមសនីយ៍ឯកផ្កាយ៣ ក្នុងក្របខណ្ឌក្រសួងមហាផ្ទៃ កាលពីចុងខែធ្នូឆ្នាំ២០១៧កន្លងមក។
កាលពីឆ្នាំ២០១០ លោកនាយករដ្ឋមន្ត្រី ហ៊ុន សែន ក៏ធ្លាប់បានថ្លែងជាសាធារណៈឲ្យក្មួយប្រុស គឺលោក ហ៊ុន ជា ត្រឡប់ចូលផ្ទះវិញ ក្រោយមានការចោទប្រកាន់ថាបានបោកប្រាស់ប្រពន្ធនិងប្រើប្រាស់គ្រឿងញៀន។ ចំណែកក្នុងឆ្នាំ២០១២ លោក ហ៊ុន ជា ជាមួយលោក ហ៊ុន តូ ក៏ត្រូវបានជាប់ចោទពីករណីបាញ់បោះ ដែលធ្វើឲ្យរបួសមនុស្ស២នាក់ តែត្រូវបានទម្លាក់បទចោទចោលវិញ ដោយសារគ្មានភស្តុតាងគ្រប់គ្រាន់៕