មេដឹកនាំគណបក្សប្រឆាំង លោកស្រី មួរ សុខហួរ បានហៅការចាប់ខ្លួនលោក កឹម សុខា ថា ដៃគូប្រកួតបានរុញស្ថានការណ៍នយោបាយ ឲ្យស្ថិតក្នុងស្ថានភាពធ្ងន់ធ្ងរ មុនការបោះឆ្នោតមកដល់។
ប្រធានគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចចាប់ខ្លួននៅម៉ោង ១២ និង ៣៥នាទី រំលងអធ្រាត្រ ឈានចូលថ្ងៃទី០៣ ខែកញ្ញា នៅឯគេហដ្ឋានរបស់លោក ទាំងមិនបង្ហាញដីកាបង្គាប់ពីតុលាការ។
រដ្ឋាភិបាលបានចោទលោក កឹម សុខា ថា បានឃុបឃិតជាមួយអាមេរិក រៀបចំផែនការសម្ងាត់ចង់ផ្ដួលរំលំរដ្ឋាភិបាល ដោយចាត់ទុកទំនាក់ទំនងនេះថា ជាអំពើ«ក្បត់ជាតិ »ល្មើសនឹងក្រមព្រហ្មទណ្ឌកម្ពុជា។
ប៉ុន្តែ អនុប្រធានគណបក្សសង្គ្រោះជាតិ លោកស្រី មួរ សុខហួរ ប្រាប់អ្នកសារព័ត៌មានថ្ងៃទី៣ ខែវិច្ឆិកានេះថា ស្ថានការណ៍នយោបាយ នៅពេលនេះស្ថិតក្នុងស្ថានភាពធ្ងន់ធ្ងរ មុនការបោះឆ្នោតជាតិមកដល់។
ទោះជាយ៉ាងណា លោកស្រី មួរ សុខហួរ នៅតែអំពាវនាវឲ្យដៃគូប្រកួតងាកមកចាប់ដៃគ្នាឡើងវិញ ដោយថា ដើម្បីធានាឲ្យការបោះឆ្នោតជ្រើសតាំងតំណាងរាស្ត្រឆ្នាំ២០១៨ ដំណើរការទៅដោយសេរី ត្រឹមត្រូវ និងយុត្តិធម៌។
លោកស្រីថា៖ «ជំហរបស់យើងច្បាស់ណាស់ សុំឲ្យមានការបោះឆ្នោតដោយសេរីត្រឹមត្រូវ និងយុត្តិធម៌ ហើយរឿងនេះភាគីណាដែលទទួលខុសត្រូវ ភាគីនោះត្រូវតែទទួលខុសត្រូវ រួមកម្លាំងជាមួយគ្នាធ្វើឲ្យមានការបោះឆ្នោតដ៏ត្រឹមត្រូវ សេរី និងយុត្តិធម៌»។
បើទោះបីរដ្ឋាភិបាលអះអាងថា ការចាប់ខ្លួនលោក កឹម សុខា ជាការអនុវត្តច្បាប់របស់កម្ពុជាក៏ដោយ ប៉ុន្តែ អង្គការឃ្លាំមើលការរំលោភសិទ្ធិមនុស្សអន្តរជាតិ Human Rights Watch ចាត់ទុកការចាប់ខ្លួន លោក កឹម សុខា ថា ជាបរាជ័យដ៏ធំធេងសម្រាប់ស្ថានការណ៍សិទ្ធិមនុស្សនៅកម្ពុជា និងថា ជាការប្រើប្រាស់ប្រព័ន្ធច្បាប់មិនត្រឹមត្រូវ គំរាមកំហែងដល់ក្រុមអ្នករិះគន់ និងគូប្រជែងនយោបាយ។
Human Rights Watch បានអំពាវនាវទៅប្រទេសជាសម្ព័ន្ធមិត្តរបស់កម្ពុជា និងម្ចាស់ជំនួយ គួរតែថ្កោលទោសរដ្ឋាភិបាលកម្ពុជា និងជំរុញឲ្យកោះហៅអគ្គរាជទូតកម្ពុជានៅបរទេស ឲ្យពន្យល់ពីសកម្មភាពរបស់រដ្ឋាភិបាលនេះ៕
