ក្រសួងការបរទេសកម្ពុជា បានប្រកាសថា មេដឹកនាំសិង្ហបុរី គ្រោងនឹងធ្វើដំណើរមកបំពេញទស្សនកិច្ចរយៈពេល ៣ថ្ងៃ នៅក្នុងប្រទេសកម្ពុជា ចាប់ពីចុងសប្ដាហ៍នេះ។
ក្នុងសេចក្ដីប្រកាសព័ត៌មានមួយនៅថ្ងៃនេះ ក្រសួងការបរទេសកម្ពុជា បានប្រកាសថា ប្រធានាធិបតីសិង្ហបុរី លោក តូនី តាន់ កេងយ៉ាំ គ្រោងនឹងមកបំពេញទស្សនកិច្ចផ្លូវរដ្ឋនៅក្នុងប្រទេសកម្ពុជា ចាប់ពីថ្ងៃទី៨ ដល់ថ្ងៃទី១១ ខែមករានេះ។
ក្រសួងការបរទេសកម្ពុជាបន្ថែមថា ក្នុងដំណើរទស្សនកិច្ចនេះ មេដឹកនាំសិង្ហបុរីរូបនេះ គ្រោងចូលក្រាបបង្គំគាល់ព្រះមហាក្សត្រកម្ពុជា សម្ដេចព្រះ នរោត្ដម សីហមុនី មុននឹងជួបពិភាក្សាទ្វេភាគីជាមួយលោកនាយរដ្ឋមន្ត្រី ហ៊ុន សែន។
ឯកសារនៃកិច្ចព្រមព្រៀងចំនួនពីរ ត្រូវបានក្រសួងការបរទេសបញ្ជាក់ថា នឹងត្រូវបានចុះហត្ថលេខាអំឡុងដំណើរទស្សនកិច្ចនេះ៕