ពលរដ្ឋនៅស្រុកមួយ ក្នុងខេត្តបន្ទាយមានជ័យ អំពាវនាវឲ្យរដ្ឋាភិបាល ចាក់គ្រោះក្រហមក្រាលផ្លូវលំមួយខ្សែ ដោយពួកគាត់អះអាងថាបច្ចុប្បន្នផ្លូវនោះ ពិបាកធ្វើដំណើរនៅរដូវវស្សាបង្កការលំបាកដល់សិស្សានុសិស្សនិងពលរដ្ឋមួយចំនួន។
ស្ត្រីម្នាក់ឈ្មោះ ហឿង ឆវី រស់ភូមិបន្ទាយឆ្មារខាងលិច ឃុំបន្ទាយឆ្មារ ស្រុកថ្មពួក បាននិយាយថា ពូកគាត់ពិបាកធ្វើដំណើរ នៅពេលទៅស្រែចម្ការ និងទៅផ្សារម្តងៗ ព្រោះផ្លូវរអិលខ្លាំងពេក បន្ទាប់ពីមានភ្លៀងធ្លាក់ ហើយសិស្សសាលាក៏ពិបាកធ្វើដំណើរទៅរៀនដែរ។
អ្នកស្រីថា៖ «សិស្សសាលាគ្នាដើរទៅរៀន គ្នាដើររអឹលដួលប្រឡាក់ខោអាវ ប្រឡាក់អីអស់ ទម្រាំដល់សាលា គ្នាជិះកង់ជិះអីអត់កើត»។
អ្នកស្រីបន្ថែមទៀតថា នេះជាផ្លូវចាស់យូណាស់មកហើយ ក៏ប៉ុន្តែមិនដែលឃើញមានអាជ្ញាធរណាមកអើពើសោះ។ អ្នកស្រីស្នើឲ្យរដ្ឋាភិបាល ជួយចាក់គ្រោះក្រហមដើម្បី កាត់បន្ថយផលលំបាកសម្រាប់ប្រជាពលរដ្ឋ និងសិស្សានុសិស្សពេលបានទៅសាលារៀន។
ពលរដ្ឋម្នាក់ទៀតលោក សឿន កុសល្យ បាននិយាយថា ផ្លូវនោះពិបាកធ្វើខ្លាំងនៅពេលមានភ្លៀងធ្លាក់។ លោកបញ្ជាក់ថា៖ «រអិលហើយជាប់ជើង ជាប់ជើងម៉ូតូជាប់ជើងកង់ ពេលណាដែលមានភ្លៀងរលឹមម្តងៗ តាំងគោយន្តតាំងម៉ូតូតាំងឡាន តាំងអីនិងឯងជាប់ពេញតានេះឯង គឺវារអឹលប៉ាដោយ រអឹលធ្លាក់ផ្ឡូវ»។
លោកបន្ថែមទៀតថា ផ្លូវនេះមានប្រវែងប្រមាណ២០០០ទៅ៣០០០ម៉ែត្រដែលខូចខាត ហើយគ្មានផ្លូវផ្សេងសម្រាប់ធ្វើដំណើរជំនួសទេ បើសិនជាមានភ្លៀងធ្លាក់សិស្សសាលាចំនួនបីភូមិ គឺភូមិបន្ទាយឆ្មារខាងលិច ភូមិក្បាលទន្សោង និងភូមិត្រពាំងខ្លោក ត្រូវខកខានទៅរៀន។
លោក ហេង សុភ័ក្រ ដែលជាមេឃុំទើបចូលកាន់តំណែងថ្មី បានទទួលស្គាល់ថា ផ្លូវនេះពិតជាបង្កផលលំបាក និងផលប៉ះពាល់ដល់ប្រជាពលរដ្ឋពិតមែន។ លោកប្តេជ្ញាថា ក្រោយពេលលោកចូកកាន់តំណែង លោកនឹងអភិវឌ្ឍន៍ផ្លូវនេះមុនគេ បន្ទាប់ពីទទួលបានកញ្ចប់ថវិកាពីរដ្ឋាភិបាល៕
ម៉ាប់ ស៊ុយ៖ [email protected]