មេដឹកនំាគណបក្សកាន់អំណាច បានថ្លែងថា សេចក្តីថ្លែងការណ៍របស់ប្រទេសមហាអំណាចមួយ ពាក់ព័ន្ធការចាប់ខ្លួនលោក កឹម សុខា គឺជាការការពារអាយ៉ងរបស់ខ្លួន។
លោក ហ៊ុន សែន អះអាងថា មេដឹកនាំបក្សសង្គ្រោះជាតិលោក កឹម សុខា ត្រូវបានសមត្ថកិច្ចចាប់ខ្លួន ដោយផ្អែកទៅតាមវីដេអូ ផ្សព្វផ្សាយដោយបណ្ដាញព័ត៌មាន CBN។ ផ្អែកតាមវីដេអូនោះ លោកបានចោទលោក កឹម សុខា ថា បានក្បត់ជាតិ និងឃុបឃិតជាមួយបរទេស ដើម្បីផ្ដួលរំលំរដ្ឋាភិបាលស្របច្បាប់។
ក្រោយពីចាប់ខ្លួនលោក កឹម សុខា ក្រសួងការបរទេសអាមេរិក កាលពីថ្ងៃទី៣ខែកញ្ញា បានបង្ហាញក្ដីព្រួយបារម្ភយ៉ាងខ្លាំង ដោយហៅការចាប់ខ្លួនមេបក្សប្រឆំាងរូបនោះថា បង្កប់ហេតុផលនយោបាយ ដោយថា លោក កឹម សុខា ជាបុគ្គលស្អាតស្អំ មានការទទួលស្គាល់ពីសហគមន៍អន្ដរជាតិ ក្នុងការគោរពសិទ្ធិមនុស្ស និងលទ្ធិប្រជាធិបតេយ្យ ដោយអហិង្សា។
យ៉ាងណាក៏ដោយ ក្នុងពិធីសម្ពោធដាក់ឲ្យប្រើប្រាស់វិហារឥស្លាមជើមៀក ក្នុងខេត្តកំពង់ចាម នៅថ្ងៃទី៤ខែកញ្ញានេះ លោកនាយករដ្ឋមន្ត្រីហ៊ុន សែន បានហៅការលើកឡើងរបស់អាមេរិកថា គ្រាន់តែធ្វើដើម្បីការងារអាយ៉ងរបស់ខ្លួន។
លោកថ្លែងថា«យើងគ្រាន់តែផ្តំាផ្ញើថា អ្នកដែលធ្វើសេចក្តីថ្លែងការណ៍[អាមេរិក] ដើម្បីការពារនូវជននេះ[លោក កឹម សុខា]គឺវាគ្រាន់តែជាការការពារអាយ៉ងរបស់ខ្លួនឲ្យរួចផុតពីការចោទប្រកាន់តែប៉ុណ្ណោះ សូមគោរពអតិបតេយ្យជាតិកម្ពុជា មិនត្រូវប្រើប្រាស់វិធីផ្តួលរំលំ[រដ្ឋាភិបាល]តាមរយៈរបស់ ដែលហៅថា បដិវត្តន៍ពណ៌ទេ»។
អ្នកវិភាគនយោបាយ លោកបណ្ឌិត ឡៅ ម៉ុងហៃ យល់ថា ការលើកឡើងរបស់លោកនាយករដ្ឋមន្ត្រីហ៊ុន សែន ធ្វើឲ្យប៉ះពាល់ដល់ទំនាក់ទំនងរវាងកម្ពុជានិងអាមេរិក នាំឲ្យកម្ពុជាដើមចេញពីគន្លងប្រជាធិបតេយ្យ។
លោកនិយាយថា«កន្លែងនេះវិធានការរំលោភសិទ្ធិសេរីភាព ការបញ្ចេញមតិ វិធានការបិទសារព័ត៌មាន វិទ្យុ និងវិធានការប្រឆំាងគណបក្សដទៃទៀត ក្រៅពីគណបក្សកាន់អំណាច ឬក៏វិធានការធ្វើច្បាប់ប្រឆំាង និងបុគ្គល សម រង្ស៊ី ជាដើម គឺវាចាកឆ្ងាយពីប្រជាធិបតេយ្យហើយ»។
មេដឹកនាំគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចកម្ពុជាចាប់ខ្លួនកាលពីម៉ោង ១២ និង ៣៥នាទីរំលងអធ្រាត្រ ឈានចូលថ្ងៃទី០៣ ខែកញ្ញានេះ នៅឯគេហដ្ឋានរបស់លោក។ ក្រោយពីចាប់ខ្លួន ស្ថាប័នរដ្ឋមួយចំនួនបានចេញសេចក្តីថ្លែងការគំាទ្រនិងចំចាត់ការរបស់រដ្ឋាភិបាលលើលោក កឹម សុខា។
ប៉ុន្តែស្របពេលជាមួយគ្នានោះ សង្គមស៊ីវិលជាតិ និងសហគមន៍អន្តរជាតិ រួមទំាងគណបក្សប្រឆំាង បានចេញសេចក្តីថ្លែងការណ៍ជាបន្តបន្ទាប់ ថ្កោលទោសចំពោះវិធានការរបស់រដ្ឋាភិបាលក្នុងការចាប់ខ្លួនមេបក្សប្រឆំាងរូបនោះ ដោយថា ធ្វើឡើងដោយរំលោភបំពានលើអភ័យឯកសិទ្ធិសភា ដែលត្រូវបានធានាដោយរដ្ឋធម្មនុញ្ញ៕