ក្រសួងអប់រំបានសម្រេចច្រានចោលពាក្យសុំបម្រើការងារ និងលុបឈ្មោះលោក រ៉ុង ឈុន ចេញពីក្របខ័ណ្ឌមន្ត្រីរាជការ ដោយលើកហេតុផលថា លោកអវត្តមានពីការងារដោយគ្មានច្បាប់អនុញ្ញាត ដែលការសម្រេចនេះ ត្រូវបានធ្វើឡើងតែប៉ុន្មានខែប៉ុណ្ណោះបន្ទាប់ពីលោកលាលែងពីសមាជិក គ.ជ.ប.។
ក្នុងសេចក្តីសម្រេចចុះថ្ងៃទី៣០ មករា ឆ្នាំ២០១៨ រដ្ឋមន្ត្រីក្រសួងអប់រំ លោក ហង់ ជួនណារ៉ុន បានសម្រេចលុបឈ្មោះ លោក រ៉ុង ឈុន ពីបុគ្គលិកនៃនាយកដ្ឋានស្រាវជ្រាវវិទ្យាសាស្ត្រ នៃក្រសួងអប់រំពីថ្ងៃទី១ មករា ឆ្នាំ២០១៨តទៅ ដោយលើកហេតុផលថា លោកអវត្តមានពីការងារដោយគ្មានច្បាប់អនុញ្ញាត។
លោក រ៉ុង ឈុន ដែលបច្ចុប្បន្នជាទីប្រឹក្សាសមាគមគ្រូបង្រៀនកម្ពុជាឯករាជ្យ បានប្រាប់វីអូឌីថា លោកអស់សំណើចទៅនឹងអ្វីដែលរដ្ឋមន្ត្រីសម្រេចបែបនេះ ដោយថា ធ្វើឡើងហាក់មិនសមទំនង គ្មានហេតុផលណាមួយក្នុងការបញ្ឈប់រូបលោក។ លោកយល់ថា ការបញ្ឈប់លោកពីក្របខ័ណ្ឌនេះ គឺមកពីហេតុផលនយោបាយច្រើនជាង។
លោកថា៖ «បន្ទាប់ពីនេះ សមាគមនឹងធ្វើលិខិតឲ្យលោករដ្ឋមន្ត្រីបំភ្លឺឡើងវិញពីបញ្ហាដែលលោកបញ្ឈប់ខ្ញុំនេះ ហើយទីពីរយើងនឹងសរសេរទៅកាន់អង្គការអប់រំអន្តរជាតិពីព្រោះសមាគមគ្រូបង្រៀនកម្ពុជាឯករាជ្យក៏ជាសមាជិកអង្គការអប់រំអន្តរជាតិដែលមានសមាជិកជាង ៣០លាននាក់ជាងដែលមានអាជីពគ្រូបង្រៀនហ្នឹង ដើម្បីឲ្យគេដឹងថា ការបញ្ឈប់ហ្នឹង វាត្រឹមត្រូវឬមួយក៏មិនត្រឹមត្រូវ ឲ្យអន្តរជាតិធ្វើការលើរឿងហ្នឹងបន្ថែមទៀត»។
លោក លោក រ៉ុង ឈុន គឺជាអតីតសមាជិក គ.ជ.ប. មកពីកូតាគណបក្សសង្គ្រោះជាតិ ហើយលោកបានលាលែងចេញពីតួនាទីនៅស្ថាប័នរៀបចំការបោះឆ្នោត ៤ថ្ងៃក្រោយពីគណបក្សសង្គ្រោះជាតិត្រូវបានតុលាការកំពូលសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុន ពាក់ព័ន្ធនឹងអ្វីដែលរដ្ឋាភិបាលចោទថា បានឃុតឃិតជាមួយបរទេស ក្នុងបំណងផ្ដួលរំលំរដ្ឋាភិបាលស្របច្បាប់ដឹកនាំដោយគណបក្សប្រជាជនកម្ពុជា៕