រដ្ឋាភិបាលអំពាវនាវឲ្យអាជ្ញាធរខេត្តជាប់ព្រំដែនជាមួយប្រទេសថៃ យកចិត្តទុកដាក់ចំពោះពលករខ្មែរដែលអាជ្ញាធរចាប់បញ្ជូនត្រឡប់មកកម្ពុជាវិញ។
កាលពីចន្លោះថ្ងៃទី២៣ ដល់ថ្ងៃទី២៨ ខែមិថុនា ឆ្នាំ២០១៧នេះ ពលករខ្មែររាប់ពាន់នាក់ត្រូវបានតម្រួតថៃ ចាប់បញ្ជូនត្រឡប់មកវិញ តាមច្រកព្រំដែនអន្តរជាតិប៉ោយប៉ែត ខណៈដែលអ្នកឃ្លាំមើលសិទ្ធិមនុស្សនៅខេត្តបន្ទាយមានជ័យ សង្កេតឃើញថា ពលករខ្មែរមិនក្រោម ៦០០នាក់នោះឡើយក្នុងមួយថ្ងៃៗត្រូវបានអាជ្ញាធរថៃចាប់បញ្ជូនត្រឡប់មកវិញនៅតាមច្រកព្រំដែនមួយនេះ។
ក្នុងលិខិតចុះថ្ងៃទី៤កក្តដាឆ្នាំ២០១៧ ក្រសួងមហាផ្ទៃបានបញ្ជាទៅអភិបាលខេត្តទាំងអស់នៅជាប់ព្រំប្រទល់ប្រទេសថៃឲ្យធ្វើការសហការជាមួយភាគីថៃដោយ ធ្វើយ៉ាងណាសុំឲ្យអាជ្ញាធរថៃយកចិត្តទុកដាក់លើការដឹកជញ្ជូនពលករខ្មែរត្រឡប់មកវិញ ប្រកបដោយការគោរពសិទ្ធិ សុវត្ថិភាព និងផ្តល់ស្បៀងអាហារឲ្យសមស្របផងដែរ។
ជាមួយគ្នានេះដែរក្រសួងមហាផ្ទៃក៍បញ្ជាឲ្យអាជ្ញាធរជាប់ព្រំដែនថៃទាំងនោះជួយឧបត្ថម្ភ និង ដឹកជញ្ជូនពលករដែលមានស្រុកកំណើតនៅក្នុងដែនសមត្ថកិច្ចរបស់ខ្លួន ពីព្រំដែនទៅលំនៅ ឋានរបស់ពួកគេដោយយកចិត្តទុកដាក់ខ្ពស់ពីសុវត្ថិភាព សុខភាព និងត្រូវរៀបចំជម្រកបណ្តោះ អាសន្នជូនពលករជាដើម។
ក្រសួងមហាផ្ទៃក៏បានអំពាវនាវសប្បុរជនឲ្យជួយឧបត្ថម្ភដោយស័្មគ្រចិត្តនូវថវិកា សម្ភារ គ្រឿងឧបភោគបរិភោគ ថ្នាំពេទ្យ ទីជម្រកបណ្ដោះអាសន្ន និងមធ្យោបាយដឹកជញ្ជូន ដើម្បីចូលរួមចំណែកដោះស្រាយការលំបាកនានារបស់ពលរដ្ឋខ្មែរនេះដែរ។
វិអូឌីមិនអាចសុំការឆ្លើយតបពីអភិបាលខេត្តនីមួយៗជាប់ព្រំដែនថៃបានទេដោយអភិបាលខេត្ត ខ្លះទូរសព្ទមិនចូលខណៈអភិបាលខេត្តបាត់ដំបងលោក ច័ន្ទ សុផល ថារវល់ប្រជុំមិនអាចនិយាយបាន។
មន្ត្រីឃ្លាំមើលសិទ្ធិមនុស្សសមាគមអាដហុកប្រចំាខេត្តបន្ទាយមានជ័យ លោក ស៊ុំ ចន្ទគា បាន គាំទ្រចំពោះការអំពាវនាវរបស់ក្រសួងមហាផ្ទៃនេះ ប៉ុន្តែលោកសុំឲ្យរដ្ឋាភិបាលសហការ ជាមួយភាគីថៃកុំឲ្យបញ្ជូនពលករខ្មែរមកវិញយ៉ាងគំហុកដោយឲ្យពួកគេមកតាមសម្រួល។
លោកបន្តថា ដើម្បីទប់ស្កាត់ពលករចំណាកស្រុកឲ្យមានប្រសិទ្ធភាពបាន រដ្ឋាភិបាលត្រូវបង្កើតការងារក្នុងស្រុកឲ្យបានច្រើន និងរកទីផ្សារសម្រាប់កសិផលដែលប្រមូលបានស្រប តាមសេដ្ឋកិច្ចជាក់ស្តែង និងត្រូវបញ្ចុះតម្លៃធ្វើលិខិតឆ្លងដែនដើម។
លោកបន្ថែមថា «ខ្ញុំយល់ថារដ្ឋាភិបាលគួរតែបង្កើតការងារក្នុងស្រុកឲ្យបានច្រើនដល់ពលករទី១ ទី២ជួយធ្វើយ៉ាងម៉េចឲ្យទីផ្សារកសិផលរបស់កសិករហ្នឹងឲ្យបានមានតម្លៃដែលអាចជួយជីវភាពពួកគាត់បាននោះនឹងជៀសវាងការចាក់ចេញចំណាកស្រុកនេះមិនខាន មួយទៀតរដ្ឋាភិបាលត្រូវត្រូវពិចារណាវិញចំពោះរយៈនៃការធ្វើលិខិតឆ្លងដែននិងត្រូវបញ្ជុះតម្លៃបន្ថែមទៀត ដើម្បីពលករក្រីក្រគាត់មានលទ្ធិភាពបានដែរ»។
កាលពីខែមិថុនាឆ្នាំ២០១៤ អាជ្ញាធរថៃបានចាប់បញ្ជូនពលករខ្មែរជាង២២ម៉ឺននាក់មកប្រទេសកម្ពុជាវិញក្រោយពីរកឃើញថាពួកគេចូលធ្វើការក្នុងប្រទេសថៃដោយខុសច្បាប់។ ក្រោយមកអាជ្ញាធរថៃបានទទួលយកពលករខ្មែរវិញដោយឲ្យបំពេញបែបបទតាមផ្លូវច្បាប់។
ប៉ុន្តែនៅពាក់កណ្តាលឆ្នាំ២០១៧នេះ រដ្ឋាភិបាលយោធាថៃបានអនុវត្តវិធានការថ្មីមួយទៀត ដោយបានចាប់បញ្ជូនពលករបរទេសទៅប្រទេសកំណើតរបស់ពួកគេវិញ ដោយថា ជាផ្នែកមួយនៃការអនុវត្តច្បាប់គ្រប់គ្រងពលករបរទេសខុសច្បាប់នៅក្នុងប្រទេសមួយនេះ។
បើតាមសេចក្ដីរាយការណ៍ពីសារព័ត៌មានថៃបានឲ្យដឹងថា ក្រៅពីការចាប់បញ្ជូនត្រឡប់ទៅប្រទេសកំណើតវិញ ពលករបរទេសខុសច្បាប់ប្រហែល ៦ម៉ឺននាក់ មិនថាជាពលករខ្មែរ ឬពលករភូមាទេ បានរត់គេចចេញពីប្រទេសថៃ នៅចន្លោះថ្ងៃទី២៣ ដល់ថ្ងៃទី២៨ ខែមិថុនា ដោយបារម្ភអំពីការប្រឈមមុខនឹងការផាកពិន័យយ៉ាងធ្ងន់ធ្ងររហូតដល់រាប់ម៉ឺនបាត ហើយថៅកែដែលជួលពលករបរទេសដោយខុសច្បាប់ ក៏ត្រូវប្រឈមមុខនឹងការផាកពិន័យដល់ ៨សែនបាត ឬជាង ២ម៉ឺន ៣ពាន់ដុល្លារឯណោះ។
បន្ទាប់ពីចលនាពលករបរទេសគេចខ្លួនដ៏ច្រើនបែបនេះ រដ្ឋាភិបាលថៃក៏បានផ្អាកអនុវត្តផ្នែកខ្លះនៃច្បាប់ថ្មីនេះក្នុងរយៈពេល ១២០ថ្ងៃ ឬ ៤ខែ ក្នុងនោះក៏ផ្អាកអនុវត្តប្រការផាកពិន័យទៅលើថៅកែជួលពលករបរទេសខុសច្បាប់ដោយគ្មានលិខិតអនុញ្ញាតការងារផងដែរ៕
