អង្គការមួយ ដែលធ្វើការលើកកម្ពស់សិទ្ធិពលករចំណាកស្រុកអះអាងថា ពលរដ្ឋដែលចំណាកស្រុកទៅធ្វើការងារនៅប្រទេសថៃ បានចូលរួមការបោះឆ្នោតមានចំនួនតិចតួច ពោលគឺមានប្រមាណ១% ប៉ុណ្ណោះ។
មន្រ្តីកម្មវិធីការពារសិទ្ធិពលករចំណាកស្រុក នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក ឌី ថេហូយ៉ា ឲ្យដឹងថា តាមការសង្កេត និងចុះធ្វើការងារផ្ទាល់ ជាមួយពលកររកឃើញថា ពលករខ្មែរនៅប្រទេសថៃ គឺបានមកបោះឆ្នោតប្រមាណ១%ប៉ុណ្ណោះ។
លោកថា មូលហេតុដែលនាំឲ្យពលករទាំងនោះមកបោះឆ្នោតបានតិចបែបនេះ ដោយសារពួកគេមិនមានពេលវេលាគ្រប់គ្រាន់ ខ្វះថវិកាសម្រាប់ធ្វើដំណើរ និងត្រូវថៅកែមិនអនុញ្ញាតច្បាប់ជាដើម។
លោកបន្ថែមថា មុនពេលបោះឆ្នោត មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស បានដាក់លិខិតមួយស្នើសុំ គ.ជ.ប សហការជាមួយក្រសួងការបរទេសឲ្យជួយសម្រួលដល់ពលករខ្មែរនៅប្រទេសថៃ ដើម្បីបានមកបោះឆ្នោត ដោយធ្វើយ៉ាងណា ឲ្យថៅកែថៃផ្តល់ពេលវេលាឈប់សម្រាកគ្រប់គ្រាន់ ដោយមិនកាត់លុយ និងជួយសម្រួលពិសេសនៅតាមច្រកព្រំដែនឲ្យពលករទាំងនោះចូលមកដោយយកលុយជាដើម ប៉ុន្តែលោកថា ទាំង គ.ជ.ប និងក្រសួងមិនបានឆ្លើយតបឡើយ។
កាលពីឆ្នាំ២០១៦ ក្រសួងការបរទេសបានឲ្យដឹងថា ក្រសួងបានជួយសម្រួលទិដ្ឋាការជូនពលករ-ពលការិនីកម្ពុជាទៅធ្វើការស្របច្បាប់នៅប្រទេសថៃចំនួនជិត១០ម៉ឺននាក់ (៩៧ ១០២នាក់) បើធៀបនឹងឆ្នាំ២០១៥ មានចំនួនជិត៧ម៉ឺននាក់។ ចំណែករបាយការណ៍ក្រសួងការងារថៃបានបង្ហាញថា បច្ចុប្បន្នពលរដ្ឋខ្មែរជាង១លាននាក់កំពុងស៊ីឈ្នួលនៅក្នុងប្រទេសរបស់ខ្លួន៕