មន្ដ្រីរដ្ឋាភិបាលឲ្យដឹងថា ប្រទេសកម្ពុជាមានផែនការបោសសំអាតមីនឲ្យអស់នៅឆ្នាំ២០២៥ខាងមុខ ខណៈផ្ទៃដីដែលមានគ្រាប់មីនមិនទាន់ផ្ទុះ នៅសល់ជិត២ពាន់គីឡូម៉ែត្រក្រឡាទៀត។
រដ្ឋមន្ដ្រីក្រសួងការពារជាតិលោក ទៀ បាញ់ ថ្លែងនៅក្នុងពិធីទទួលសម្ភារៈបច្ចេកទេសកំទេចមីនពីរដ្ឋាភិបាលជប៉ុន ដែលធ្វើឡើងនៅខេត្ដសៀមរាប នាព្រឹកថ្ងៃព្រហស្បត្ដិ៍ទី៦ខែកក្កដានេះថា រយៈពេលជាង២០ឆ្នាំមកនេះ រដ្ឋាភិបាលកម្ពុជា តាមរយៈស៊ីម៉ាក់ កងយុទ្ធពលខេមរៈភូមិន្ទ អង្គការអន្ដរជាតិដោះមីនជាច្រើនទៀត បានធ្វើការរុករកឃើញនិងកំទេចចោលគ្រាប់មីននិងយុទ្ធភ័ណ្ឌមិនទាន់ផ្ទុះគ្រប់ប្រភេទ បានប្រមាណ៤លានគ្រាប់ ដែលស្មើនឹងផ្ទៃដីជាងមួយពាន់បួនរយគីឡូម៉ែត្រក្រឡា។ លោកបន្ដថា តាមការវាយតម្លៃរបស់អាជ្ញាធរមីន គ្រាប់មីនដែលនៅសល់នៅលើផ្ទៃដីជិត២ពាន់គីឡូម៉ែត្រក្រឡាទៀតកម្ពុជា នឹងបោសសំអាត់ឲ្យអស់ នៅឆ្នាំ២០២៥ខាងមុខ ដើម្បីធានាដល់សុវត្ថិភាពនិងភ័យខ្លាចដល់ប្រជាពលរដ្ឋ។
លោកបន្ដថា៖ «កម្ពុជាបានបន្ដការធានាយ៉ាងច្រើនថែមទៀត ដើម្បីធ្វើឲ្យទស្សនៈវិស័យឆ្នាំ២០២៥ កម្ពុជាអស់ ការគំរាមកំហែងដោយសារគ្រាប់មីន ដែលប្រឆាំងមនុស្សដោយជោគជ័យ»។
ប្រធានមជ្ឍមណ្ឌលកំចាត់មីនកម្ពុជា CMAC លោក ហេង រតនា មានប្រសាសន៍ថា អាជ្ញាធរមីនកម្ពុជា ស៊ីម៉ាក់កំពុងបង្កើនកំលាំងស្រាវជ្រាវនៅមូលដ្ឋាន ដើម្បីកំណត់ពីស្ថានភាពចំការមីននីមួយៗ អោយបានច្បាស់លាស់ ដើម្បីងាយស្រួលក្នុងការពង្រាយកម្លាំងនិងប្រើប្រាស់ឧបករណ៍បោសសំអាតមីនអោយចំគោលដៅ ធ្វើយ៉ាងណាឲ្យអនុវត្ដបានសម្រេចកំទេចគ្រាប់យុទ្ធភ័ណ្ឌបានតាមផែនការណ៍។ លោកបន្ដថា បើគិតពីឆ្នាំ១៩៩២ ដល់ខែឧសភាឆ្នាំ២០១៧កន្លងទៅនេះ CMAC សម្រេចលទ្ធផលនៃការរុករកកំទេចចោលគ្រាប់មីនប្រឆាំងមនុស្ស បានជាង៥០ម៉ឺនគ្រាប់ មីនប្រឆាំងរថក្រោះ បានជាងមួយម៉ឺនគ្រាប់ គ្រាប់យុទ្ធភ័ណ្ឌមិនទាន់ផ្ទុះបានជាង២លានមួយសែនគ្រាប់ ដែលលោកថា ទាំងគ្រាប់មីន និងគ្រាប់យុទ្ធភ័ណ្ឌមិនទាន់ផ្ទុះបានជិត៣លានគ្រាប់ ខណៈបោសសំអាតផ្ទៃដីមានគ្រាប់មីនបានជាង៨៥៨គីឡូម៉ែត្រក្រឡា៕