នាយកប្រតិបត្តិក្រុមហ៊ុនរថភ្លើង រ៉ូយ៉ាល់ រេលវេ បានអំពាវនាវទៅដល់អ្នកបើកបរយានយន្តទាំងអស់ឲ្យគោរពច្បាប់ចរាចរណ៍ ដោយថា គ្រោះថ្នាក់លើផ្លូវរថភ្លើងបណ្ដាលមកពីអ្នកបើករថយន្ដមិនគោរពច្បាប់។
នាយកប្រតិបត្តិរបស់ក្រុមហ៊ុន រ៉ូយ៉ាល់ រេលវេ លោក ចន គែរី (John Guiry) ស្នើរសុំឲ្យអ្នកដំណើរទាំងអស់គោរពច្បាប់ចរាចរណ៍ ព្រមទាំងបង្កើនការប្រុងប្រយ័ត្នរបស់ខ្លួន ជាពិសេសពេលកំពុងឆ្លងកាត់ផ្លូវរថភ្លើង ក្រោយមានករណីគ្រោះថ្នាក់រវាងរថភ្លើងជាមួយនឹងរថយន្ដកើនឡើង។
លោក ចន គែរី អះអាងថា ករណីគ្រោះថ្នាក់ចរាចរណ៍រវាងរថភ្លើង និងរថយន្តទាំងអស់ សុទ្ធតែកើតឡើងដោយសារអ្នកបើកបររថយន្ដមិនគោរពច្បាប់ចរាចរណ៍ បើទោះបីជាក្រុមហ៊ុន បានចាត់វិធានការណ៍ជាច្រើនមកហើយ ដើម្បីឲ្យប្រជាពលរដ្ឋយល់ដឹងពីសុវត្ថិភាពចរាចរណ៍ តែប្រជាជនមួយចំនួនធំនៅតែមិនទាន់យល់ដឹងពីរឿងនេះ។
លោក ចន គែរី ពន្យល់ថា៖ «អ្នកបើកបរត្រូវជិះរថយន្ដលើផ្លូវថ្នល់ មិនមែនលើផ្លូវរថភ្លើងនោះទេ។ បើអ្នកប្រឹងឡើងជិះតាមផ្លូវរថភ្លើង ឡានរបស់អ្នកនឹងជាប់នៅលើផ្លូវនោះ ហើយវានឹងបណ្ដាលឲ្យមានគ្រោះថ្នាក់។ ពួកយើងបានដាក់ផ្លាកសញ្ញា របាំងការពារ ភ្លើងសញ្ញា ចែកចាយសៀវភៅព័ត៌មាន ព្រមទាំងធ្វើការផ្សព្វផ្សាយតាមទូរទស្សន៍ វិទ្យុ និងកាសែតទៀតផង តែករណីដដែលៗនៅតែកើតឡើង»។
នាយកប្រតិបត្តិរបស់ក្រុមហ៊ុន រ៉ូយ៉ាល់ រេលវេលោក ចន គែរី បន្ថែមថា ករណីគ្រោះថ្នាក់កាលពីម្សិលមិញ ដែលបណ្ដាលមកពីរថយន្ដ Highlander ព្យាយាមបើកឆ្លងផ្លូវរថភ្លើង នៅសង្កាត់ភំ្នពេញថ្មី ខណ្ឌសែនសុខ មិនបណ្ដាលឲ្យមានការរងរបួសនោះទេ គ្រាន់តែមានការខូចខាតរថយន្ដតែប៉ុណ្ណោះ។
គ្រោះថ្នាក់រវាងរថយន្ត និងរថភ្លើង បានកើតឡើងយ៉ាងតិច ៤លើករួចមកហើយ ចាប់តាំងពីដើមខែមេសាកន្លងមកនេះ៕