មន្ត្រីនគរបាលមូលដ្ឋាន បានឲ្យដឹងថា អ្នកភូមិជាង ៤០នាក់ ក្នុងនោះមានទាំងកុមារ ៣នាក់ នៅក្នុងស្រុកឆ្លូងខេត្តក្រចេះ ត្រូវបញ្ជូនទៅសង្គ្រោះនៅតាមមណ្ឌលសុខភាព បន្ទាប់ពីពួកគេមានអការៈវិលមុខ និងក្អួតចង្កោកាលពីថ្ងៃម្សិលមិញ ដោយសង្ស័យថា ពុលចំណីអាហារ។
អធិការនគរបាលស្រុកឆ្លូង លោក ឆុង សូរ៉ាន់ បានប្រាប់វីអូឌីតាមទូរស័ព្ទនៅព្រឹកថ្ងៃចន្ទនេះថា ពលរដ្ឋ ៤៤នាក់ រស់នៅក្នុងភូមិប្រម៉ា ស្ថិតក្នុងឃុំកំពង់ដំរី ត្រូវបានបញ្ជូនទៅកាន់មណ្ឌលសុខកំពង់ដំរី កាលពីថ្ងៃម្សិលមិញនេះ បន្ទាប់ពីពួកគេមានអការៈវិលមុខ និងក្អួតចង្អោ។
មន្ត្រីនគរបាលរូបនេះ បានសង្ស័យថា អ្នកភូមិពុលនំអន្សមចេកអាំង បន្ទាប់ពីពួកគេបរិភោគនំអន្សមដែលដាក់លក់នៅក្នុងភូមិ។
ប៉ុន្តែ លោក សូរ៉ាន់ បានប្រាប់ថា អ្នកភូមិទាំងនោះ បានធូរស្បើយវិញហើយ និងបានវិលត្រឡប់ទៅផ្ទះសម្បែងរបស់ពួកគេវិញ បន្ទាប់ពីសម្រាកព្យាបាលកាលពីថ្ងៃម្សិលមិញ។
លោកមានប្រសាសន៍ថា៖ «វាអត់មានអីគ្រោះថ្នាក់ទេបង! គេដាក់សេរ៉ូមដាក់អីទៅ ឥឡូវគាត់បានវិលត្រឡប់ទៅផ្ទះវិញអស់ហើយ។ ធម្មតាអ្នកចម្ការនៅក្នុងភូមិ ព្រឹកឡើង គាត់ចេញទៅចម្ការ គាត់ទៅទិញម្នាក់មួយម្នាក់ពីរ។ នៅតំបន់ដាច់ស្រយាលពីស្រុកទៅហាហុកសិបគីឡូក្នុងព្រៃ។ មួយភូមិមួយក្រវិចហ្នឹង នៅប្រម៉ាផ្ទះប៉ុន្មានរយខ្នង»។
ទោះជាយ៉ាងណា មន្ត្រីនគរបាលរូបនេះ ប្រាប់ថា លោកមិនទាន់ដឹងពីមូលហេតុពុលនេះទេ ខណៈដែលក្រុមមន្ត្រីសុខាភិបាលបានយកនំអន្សមទៅធ្វើពិសោធន៍។
ករណីដាច់ដោយឡែកមួយទៀត មានពលរដ្ឋ ១៣នាក់ នៅឃុំកន្ទួត ស្ថិតក្នុងស្រុកចិត្របុរី ត្រូវបានអាជ្ញាធរខេត្តក្រចេះបញ្ជាក់នៅថ្ងៃនេះថា បានស្លាប់ ខណៈដែលពលរដ្ឋ ១៥១នាក់ទៀត ត្រូវបានបញ្ជូនទៅព្យាបាលនៅមន្ទីរពេទ្យ បន្ទាប់ពីពួកគេធ្លាក់ខ្លួនឈឺ ដោយសង្ស័យថា ពុលទឹក។
ប៉ុន្តែ ក្រសួងសុខាភិបាលបានលើកឡើងនៅក្នុងសេចក្ដីប្រកាសព័ត៌មាននៅថ្ងៃនេះថា ពលរដ្ឋធ្លាក់ខ្លួនឈឺភាគច្រើន សុទ្ធតែមានប្រវត្តិផឹកស្រា ដែលក្រសួងរកឃើញថា មានសារធាតុមេតាណុលខ្ពស់៕
