គណៈកម្មាធិការជាតិរៀបចំការបោះឆ្នោត (គ.ជ.ប) បានអំពាវនាវកុំឲ្យសាធារណជនភាន់ច្រឡំ បន្ទាប់ពីសង្កេតឃើញថា មានបណ្ដាញសារព័ត៌មានមួយចំនួនចុះផ្សាយពីចំនួនអាសនៈឃុំ សង្កាត់ ដោយខ្លួនឯង ហើយបែរជាថាយកប្រភពពី គ.ជ.ប ទៅវិញ។
ក្នុងសេចក្ដីប្រកាសព័ត៌មាន ចេញផ្សាយនៅថ្ងៃពុធនេះ គ.ជ.ប បំភ្លឺថា មានបណ្ដាញព័ត៌មានក្នុងស្រុកមួយចំនួន បានផ្សាយខុសពីការពិត ដោយពួកគេបានចុះផ្សាយពីចំនួនអាសនៈ ដែលបណ្ដាគណបក្សទទួលបាន។
គ.ជ.ប ប្រកាសបដិសេធរាល់ការចុះផ្សាយរបស់បណ្ដាញសារព័ត៌មានទាំងនោះ ដោយថា នេះដំណាក់កាលដែលគណៈកម្មការរាជធានីខេត្ត ធ្វើការដោះស្រាយបណ្ដឹង ពាក់ព័ន្ធនឹងលទ្ធផលបោះឆ្នោតឃុំសង្កាត់ ហើយថា គ.ជ.ប ក៏កំពុងត្រៀងដោះស្រាយបណ្ដឹងទាំងនោះ ក្នុងករណីភាគីណាមួយជំទាស់ ឬមិនពេញចិត្ត។
បើតាមសេចក្ដីប្រកាស គ.ជ.ប ថាខ្លួនត្រឹមតែបានផ្សាយលទ្ធផលបោះឆ្នោតបឋម តាមទូរទស្សន៍ជាតិកម្ពុជា វិទ្យុជាតិកម្ពុជា និងគេហទំព័រ គ.ជ.ប ប៉ុណ្ណោះ។
ចំពោះលទ្ធបោះឆ្នោតឃុំសង្កាត់ផ្លូវការពីចំនួនអាសនៈ និងបេក្ខជនមកពីគណបក្សជាប់ឆ្នោតនោះ គ.ជ.ប ថា នឹងប្រកាសយ៉ាងយូរត្រឹមថ្ងៃទី២៥មិថុនា ក្រោយផ្ទៀងផ្ទាត់ និងដោះស្រាយបណ្ដឹងចប់សព្វគ្រប់៕